ប្រជាពលរដ្ឋ និងមន្ត្រីសង្គមស៊ីវិលខេត្តកោះកុង បន្តរិះគន់សមត្ថកិច្ចជំនាញស្ថាប័នពាក់ព័ន្ធ ប្រចាំការនៅច្រកទ្វារអន្តរជាតិព្រំដែនកម្ពុជា-ថៃ ចាំយាម ថាបានបណ្ដែតបណ្ដោយឲ្យឈ្មួញនាំចូលទំនិញគេចពន្ធ។ ទំនិញទាំងនោះរួមមាន ម្ហូបអាហារ សាច់ស្រស់ខូចគុណភាព ជាដើម ត្រូវបាននាំចូលមកកម្ពុជា តាមច្រកទ្វារនេះដោយមិនត្រួតពិនិត្យគុណភាពទំនិញឲ្យបានត្រឹមត្រូវទេ។
ក្រុមប្រជាពលរដ្ឋ និងមន្ត្រីសង្គមស៊ីវិលអះអាងថា មុខទំនិញគ្រប់ប្រភេទមានគ្រឿងភេសជ្ជៈកំប៉ុង ឬដប គ្រឿងសំអាង និងគ្រឿងឧបភោគបរិភោគជាច្រើនមុខ ជាពិសេសសាច់ស្រស់ មានសាច់មាន់ជាដើម ត្រូវបានបន្តនាំចូលតាមច្រកទ្វារចាំយាមព្រំដែនកម្ពុជា-ថៃ នាខេត្តកោះកុង នៅពេលជិតភ្លឺជារៀងរាល់ថ្ងៃ។
អាជីវករដែលមានរបរចិញ្ចឹមជីវិតនៅតាមច្រកទ្វារចាំយាមខេត្តកោះកុង អះអាងប្រាប់អ្នកយកព័ត៌មានវិទ្យុអាស៊ីសេរី ដែលបានចុះផ្ទាល់ដល់ច្រកចាំយាម ថា ទំនិញគ្រប់ប្រភេទទាំងខូចគុណភាព និងទំនិញគេចពន្ធ ត្រូវបានឈ្មួញនាំចូលតាមរថយន្ត និងរទេះអូសជាដើម។ ពួកគេសង្ស័យថា អ្នកនាំចូលទំនិញទាំងនោះបានឃុបឃិតជាមួយមន្ត្រីជំនាញមួយចំនួននៃស្ថាប័នកាំកុងត្រូលសាខាខេត្តកោះកុង និងសាខាគយ និងរដ្ឋាករខេត្តនេះជាដើម ជាថ្នូរទទួលបានសំណូកពុករលួយ។
ទាក់ទងបញ្ហានេះដែរ មន្ត្រីសង្គមស៊ីវិលចំនួនពីរស្ថាប័ន មានអង្គការលីកាដូ (LICADHO)និងសមាគមអាដហុក (ADHOC)ប្រចាំខេត្តកោះកុង ក៏បង្ហាញកង្វល់នៃការនាំចូលសាច់ស្រស់ខូចគុណភាព និងទំនិញគេចពន្ធ ដោយមិនបានត្រួតពិនិត្យគុណភាព ឬកាលបរិច្ឆេទប្រើប្រាស់ឲ្យបានត្រឹមត្រូវពីមន្ត្រីស្ថាប័នជំនាញច្រកទ្វារចាំយាម ដូចកង្វល់ពលរដ្ឋដែរ។
មន្ត្រីសម្របសម្រួលនៃអង្គការលីកាដូ ខេត្តកោះកុង លោក អ៊ិន គង់ជិត មានប្រសាសន៍ថា កន្លងមកឃើញមានសកម្មភាពរបស់មន្ត្រីជំនាញ បានយកចិត្តទុកដាក់ក្នុងការងារត្រួតពិនិត្យទំនិញខូចគុណភាព និងទំនិញគេចពន្ធនៅតាមច្រកទ្វារនេះ ប៉ុន្តែលោកទទួលស្គាល់ថា សាច់ស្រស់ខូចគុណភាព ភេសជ្ជៈគ្រប់ប្រភេទ និងគ្រឿងសំអាង ជាដើម នៅតែត្រូវគេនាំចូលតាមច្រកទ្វារចាំយាម រាល់ថ្ងៃ៖ « ប្រហែលជាមានការឆកល្វែងរបស់សមត្ថកិច្ចទាំងនោះនៅតាមព្រំដែនច្រកចាំយាម នាំឲ្យការរត់ពន្ធទំនិញគ្រប់ប្រភេទមានមានគ្រឿងសំអាង អាហារហូបចុក និងសាច់មាន់ជាដើម ដោយមិនបានត្រួតពិនិត្យត្រឹមត្រូវ នៅតែបន្តនាំចូលតាមច្រកចាំយាម ខេត្តកោះកុង ដដែល »។
ចំណែកមន្ត្រីសម្របសម្រួលនៃសមាគមអាដហុក ប្រចាំខេត្តកោះកុង លោក ញៀប សំអឿន មើលឃើញថា សមត្ថកិច្ចជំនាញខ្លះនាមូលដ្ឋាននេះជាអ្នកបើកដៃឲ្យឈ្មួញនាំចូលទំនិញគេចពន្ធ ឬសាច់ស្រស់ខូចគុណភាព ជាដើម ជាថ្នូរចែកផលប្រយោជន៍ឲ្យគ្នាទៅវិញទៅមក។ លោកថា កន្លងមកនេះ សមត្ថកិច្ចជំនាញស្ថាប័នខ្លះធ្លាប់យកចិត្តទុកដាក់ចុះបង្ក្រាប ទប់ស្កាត់ទំនិញគេចពន្ធ ឬខូចគុណភាពនេះដែរ ប៉ុន្តែបទល្មើសទាំងនេះនៅតែបន្តកើតមានរាល់ថ្ងៃ។ លោក ញៀប សំអឿន ព្រួយបារម្ភពីសុខភាពរបស់ប្រជាពលរដ្ឋដែលប្រើប្រាស់ទំនិញទាំងនោះ៖ « ធាតុពិតទៅការនាំចូលទំនិញគេចពន្ធ ពិសេសទំនិញខូចគុណភាពធ្លាប់កើតមានជាយូរលង់ណាស់មកហើយ។ កន្លងមក យើងបានមើលអាជ្ញាធរជំនាញ បានទប់ស្កាត់ ឬបង្ក្រាបខ្លះៗដែរ ប៉ុន្តែទំនិញគេចពន្ធ ឬខូចគុណភាពនេះ នៅតែបន្តកើតមាននៅតាមច្រកទ្វារចាំយាម រហូតមកដល់ពេលនេះ »។
ទោះបីជាយ៉ាងណា វិទ្យុអាស៊ីសេរី មិនទាន់អាចទាក់ទង លោក ថេង ម៉ុងហ៊ួន ប្រធានការិយាល័យគយច្រកទ្វារអន្តរជាតិចាំយាម បានទេតាមទូរស័ព្ទ នៅថ្ងៃសៅរ៍ ទី១៩ ខែមីនា។
នៅគ្រាប្រធានទីស្នាក់ការកាំកុងត្រូលច្រកទ្វារអន្តរជាតិចាំយាម ខេត្តកោះកុង លោក ជា នី បានចុចផ្តាច់ទូរស័ព្ទមិនឆ្លើយបំភ្លឺជុំវិញបទល្មើសទំនិញគេចពន្ធ និងសាច់ស្រស់ខូចគុណភាពនាំចូលតាមច្រកទ្វារចាំយាម រាល់ថ្ងៃនេះទេ។
ផ្ដើមពីបញ្ហានេះ ទាំងប្រជាពលរដ្ឋ និងមន្ត្រីសង្គមស៊ីវិល អំពាវនាវដល់ថ្នាក់ដឹកនាំនៅតាមក្រសួងស្ថាប័នពាក់ព័ន្ធថ្នាក់ជាតិ ជួយមានវិធានការទប់ស្កាត់ទំនិញគេចពន្ធ និងសាច់ស្រស់ខូចគុណភាព ដែលបន្តនាំចូលតាមច្រកអន្តរជាតិចាំយាម ខេត្តកោះកុង ឲ្យមានប្រសិទ្ធភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។