សមាគមការពារសិទ្ធិមនុស្សអាដហុក (adhoc) ខេត្តព្រះវិហារ ជំរុញឱ្យអាជ្ញាធរពាក់ព័ន្ធ ត្រូវតែមានវិធានការទប់ស្កាត់ការប្រើអាវុធច្នៃ និងអាវុធពិត ដើម្បីបាញ់សត្វព្រៃយកមកលក់ដូរស្ទើរតែរៀងរាល់ថ្ងៃ នៅក្នុងស្រុកសង្គមថ្មី។
ការជំរុញនេះ នៅស្របពេលដែលការប្រើប្រាស់អាវុធបាញ់សម្លាប់សត្វព្រៃទាំងនោះ មិនត្រឹមតែបង្កគ្រោះថ្នាក់ដល់សត្វព្រៃប៉ុណ្ណោះទេ គឺថែមទាំងបង្កគ្រោះថ្នាក់ដល់អាយុជីវិតប្រជាពលរដ្ឋខ្លះផងដែរ។
ប្រភពពីប្រជាពលរដ្ឋនៅស្រុកសង្គមថ្មី ខេត្តព្រះវិហារ ឱ្យដឹងថា ការបាញ់សម្លាប់សត្វព្រៃយកទៅធ្វើម្ហូប និងជួញដូរខុសច្បាប់ កំពុងកើតមាននៅតាមតំបន់ជាច្រើនក្នុងស្រុកនេះ។
បទល្មើសនៃការបាញ់សម្លាប់សត្វព្រៃទាំងនោះ ភាគច្រើនគេមិនសូវឃើញសមត្ថកិច្ចចាត់វិធានការបង្ក្រាបឱ្យតឹងរ៉ឹងទេ។
បុរសម្នាក់ គឺជាប្រជាពលរដ្ឋរស់នៅស្រុកសង្គមថ្មី ដែលសុំមិនបញ្ចេញឈ្មោះ មានប្រសាសន៍កាលពីព្រឹកថ្ងៃអង្គារ ទី២៨ ខែតុលា ថា កាលពីពីរថ្ងៃមុន គាត់បានទៅសម្រាកក្នុងព្រៃនៃភូមិដីក្រហម ឃុំល្អាង ដើម្បីធ្វើចម្ការ។ នៅពេលយប់ គឺមានក្រុមអ្នកប្រមាញ់សត្វព្រៃជាច្រើន បានប្រើអាវុធដើរបាញ់សត្វ។ សំឡេងកាំភ្លើងដែលផ្ទុះឡើងនៅក្នុងព្រៃពេលយប់ ធ្វើឱ្យរូបគាត់ និងអ្នកភូមិជាច្រើន មានការភ័យខ្លាចចំពោះគ្រោះថ្នាក់ដែលអាចកើតឡើងជាយថាហេតុ៖ «អាថ្ងៃខ្ញុំមកហ្នឹងបាញ់ឈ្លូសមើលទៅ។ ប្រជាជននៅដាំសៀងដាំអី មនុស្សវាច្រើនណាស់ដល់ពេលបាញ់អ៊ីចឹង វាប៉ះពាល់ខ្លាចចំគេចំឯងដែរ។ កាំភ្លើងហ្នឹងបែប AK47 អាវុធនោះបែបចេញពីក្រុមហ៊ុនដែលនៅក្បែរនោះតាមមើលទៅ។ ហើយប៉ូលិសអត់បានគ្រប់គ្រងអាពួកក្រុមហ៊ុនហ្នឹង ឱ្យបាញ់ឆ្វេចឆ្វាចខ្លាចចំប្រជាពលរដ្ឋ»។
ទោះយ៉ាងណា វិទ្យុអាស៊ីសេរី មិនអាចទាក់ទងសុំការបំភ្លឺពីមេប៉ុស្តិ៍នគរបាលឃុំល្អាង លោក ឃី សុផល និងអធិការប៉ូលិសស្រុកសង្គមថ្មី លោក អ៊ុយ ស៊ីថា ជុំវិញរឿងនេះបានថាយ៉ាងណានៅឡើយ។
ជាច្រើនឆ្នាំមកហើយនៅស្រុកសង្គមថ្មី គឺតំបន់ជាច្រើនមានការប្រើប្រាស់កាំភ្លើងខ្យល់ និងកាំភ្លើងមែនទែនខ្លះទៀត ដើម្បីបរបាញ់សត្វព្រៃយកទៅធ្វើម្ហូប និងលក់ដូរខុសច្បាប់។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តព្រះវិហារ លោក ឡោ ចាន់ មានប្រសាសន៍ថា ការប្រើប្រាស់អាវុធច្នៃ និងអាវុធចេញពីអង្គភាពកងកម្លាំង ដើម្បីបាញ់សត្វព្រៃនៅស្រុកសង្គមថ្មី នៅតែកើតមានជាច្រើនកន្លែងគួរឱ្យព្រួយបារម្ភ។ លោក ឡោ ចាន់ អំពាវនាវឱ្យអាជ្ញាធរពាក់ព័ន្ធ ត្រូវតែចាត់វិធានការទប់ស្កាត់ការបរបាញ់សត្វព្រៃទាំងនោះ៖ «យើងឃើញថាការប្រើប្រាស់អាវុធកែច្នៃក្ដី ការប្រើប្រាស់អាវុធជាក់ស្ដែងក្ដី គឺនៅតែមានអ៊ីចឹងហើយ ជាការព្រួយបារម្ភរបស់សង្គមស៊ីវិល ជាពិសេសសមាគមអាដហុក តែងតែព្រួយបារម្ភ ពីព្រោះមានប្រជាពលរដ្ឋក៏គាត់នៅតែបន្តការប្រើប្រាស់ស្នាតេះ ដើម្បីបរបាញ់សត្វព្រៃ។ ចំណែកអាជ្ញាខ្លះ ក៏គាត់បានប្រើប្រាស់អាវុធក្នុងការរកសត្វព្រៃដែរ»។
របាយការណ៍របស់សមាគមការពារសិទ្ធិមនុស្សអាដហុក ខេត្តព្រះវិហារ ឱ្យដឹងថា កាលពីឆ្នាំ២០១៣ កន្លងទៅ មានប្រជាពលរដ្ឋចំនួន ២នាក់ក្នុងស្រុកសង្គមថ្មី បានស្លាប់ នៅពេលដែលក្រុមអ្នកប្រមាញ់បាញ់អាវុធចំ នៅពេលដែលពួកគេដេញតាមបាញ់សត្វព្រៃនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។