មន្ត្រីអធិការកិច្ចរបស់ក្រសួងកសិកម្ម កំពុងសហការជាមួយតុលាការខេត្តព្រះវិហារ ដើម្បីចុះបង្ក្រាបសិប្បកម្មកែច្នៃឈើជាច្រើនកន្លែង នៅក្នុងទីរួមខេត្តព្រះវិហារ។ ប៉ុន្តែ សកម្មភាពចុះបង្ក្រាបការទិញឈើខុសច្បាប់ដើម្បីកែច្នៃនៅតាមរោងសិប្បកម្មនោះ មិនបានធ្វើឱ្យក្រុមអង្គការក្រៅរដ្ឋាភិបាល អបអរសាទរទេ។
អង្គការផ្នែកការពារព្រៃឈើ រួមនិងសមាគមការពារសិទ្ធិមនុស្សអាដហុក (adhoc) ប្រចាំខេត្តព្រះវិហារ សម្ដែងការសង្ស័យថា មន្ត្រីរដ្ឋបាលព្រៃឈើខ្លះក្នុងខេត្តនេះ អាចនឹងជាប់ពាក់ព័ន្ធជាមួយនឹងក្រុមម្ចាស់សិប្បកម្មកែច្នៃឈើខុសច្បាប់។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តព្រះវិហារ គឺលោក ឡោ ចាន់។ លោកមានប្រសាសន៍កាលពីរសៀលថ្ងៃពុធ ទី២៩ ខែតុលា ថា ជាធម្មតានៅក្នុងទីរួមខេត្តព្រះវិហារ គឺមានសិប្បកម្មកែច្នៃឈើច្រើនជាង ១០កន្លែង ហើយមានសកម្មភាពឈូស និងអារឈើជារៀងរាល់ថ្ងៃធ្វើជាតុ ទូ និងកៅអី ដើម្បីលក់ដូរ ក៏ប៉ុន្តែនៅពេលមន្ត្រីអធិការកិច្ចរបស់ក្រសួងកសិកម្ម រុក្ខាប្រមាញ់ និងនេសាទ រួមគ្នាជាមួយតុលាការ ចុះបង្ក្រាប បែរជាសិប្បកម្មទាំងនោះដឹងមុន ហើយបិទទ្វារស្ងាត់ច្រៀប ហាក់ដូចជាមានអ្នកប្រាប់។
លោក ឡោ ចាន់ សង្ស័យថា មន្ត្រីរដ្ឋបាលព្រៃឈើខ្លះ អាចជាប់ពាក់ព័ន្ធក្នុងការទទួលផលប្រយោជន៍ពីសិប្បកម្មទាំងនោះ ហើយប្រាប់ដំណឹងឱ្យក្រុមម្ចាស់សិប្បកម្មដឹងជាមុន៖ «ឥឡូវចុះមកដូចជាដឹងខ្លួនអស់រលីងខាងសិប្បកម្ម។ ស្ងាត់ច្រៀប ម៉ាស៊ីនដកអស់ ឈើដកអស់ ខ្ញុំសន្និដ្ឋានថា មន្ត្រីជំនាញអស់ហ្នឹងរស់បានដោយសារសិប្បកម្មខុសច្បាប់ទាំងអស់ហ្នឹង។ ខាងថ្នាក់ក្រសួងចុះមក ឥឡូវខ្ញុំចង់ដឹងជិះម៉ូតូក្រឡឹងជុំវិញខេត្ត ស្ងាត់អស់រលីង អត់មានឈើអីមួយតាមសិប្បកម្មស្ងាត់»។
ចំណែកមន្ត្រីផ្នែកតស៊ូមតិរបស់អង្គការពន្លកខ្មែរ ដែលតែងចងក្រងបណ្ដាញសហគមន៍ការពារព្រៃឈើ លោក ប៉ិក សោភ័ណ មានប្រសាសន៍ថា នៅខេត្តព្រះវិហារ បច្ចុប្បន្ន មន្ត្រីខ្លះ គឺមានភាគហ៊ុននៅតាមរោងសិប្បកម្មកែច្នៃឈើ។ ដូច្នេះ បើសិនជាមានបទបញ្ជាពីថ្នាក់ក្រសួង ឲ្យចុះបង្ក្រាបបទល្មើសព្រៃឈើ គឺគាត់តែងផ្ដល់ព័ត៌មានទៅឱ្យម្ចាស់សិប្បកម្មផ្អាកសកម្មភាពមួយរយៈសិន។
ការរិះគន់របស់ក្រុមអង្គការក្រៅរដ្ឋាភិបាលនេះ ធ្វើឡើងបន្ទាប់ពីក្រុមអធិការកិច្ចរបស់ក្រសួងកសិកម្ម រួមនិងមន្ត្រីតុលាការខេត្តព្រះវិហារ ចុះបង្ក្រាប និងឆែកឆេរសិប្បកម្មកែច្នៃឈើក្នុងទីរួមខេត្ត ដោយបង្ក្រាបបានឈើខុសច្បាប់តិចតួច ប៉ុន្តែសិប្បកម្មកែច្នៃឈើជាច្រើនកន្លែងទៀត ហាក់ដឹងខ្លួនមុន ហើយគេចមួយរយៈ។
ទោះយ៉ាងណា វិទ្យុអាស៊ីសេរី មិនអាចទាក់ទងនាយខណ្ឌរដ្ឋបាលព្រៃឈើខេត្តព្រះវិហារ លោក អ៊ិត ភូមិរ៉ា ដើម្បីសុំប្រតិកម្មជុំវិញការរិះគន់នេះបានថាយ៉ាងណានៅឡើយ។
ចំណែកព្រះរាជអាជ្ញាអមសាលាដំបូងខេត្តព្រះវិហារ លោក លី លន់ មានប្រសាសន៍ថា ការចុះបង្ក្រាបឈើខុសច្បាប់តាំងពីថ្ងៃទី២៨ ខែតុលា គឺសមត្ថកិច្ចមិនបានលទ្ធផលល្អទាំងអស់ទេ ដោយទើបតែពិនិត្យទៅលើសិប្បកម្មចំនួន ៦កន្លែង និងបានដកហូតឈើខុសច្បាប់នៅស្រុកជាំក្សាន្ត ប្រមាណ ៣០ម៉ែត្រគូប។
លោក លី លន់ មិនហ៊ានឆ្លើយតបចំពោះការរិះគន់របស់ក្រុមអង្គការក្រៅរដ្ឋាភិបាល ដែលថា អាចមានមន្ត្រីជំនាញខ្លះអាចពាក់ព័ន្ធនឹងម្ចាស់សិប្បកម្មឈើ ដោយឱ្យដំណឹងជាមុននៅពេលមន្ត្រីថ្នាក់ក្រសួង ចុះពិនិត្យនោះយ៉ាងណាទេ ដោយលោកគ្រាន់តែចុះសហការតាមការស្នើសុំប៉ុណ្ណោះ៖ «យើងចូលរួមសហការជាមួយគេទៅ អ៊ីចឹងយើងបង្ក្រាបបានប៉ុណ្ណឹង ហើយគេចង្អុលបង្ហាញថា កន្លែងនេះកន្លែងនោះចុះតាមគេទៅ។ ចំពោះសិប្បកម្មដទៃទៀតដែលគេច ដឹងមុនដឹងអី យើងក្ដាប់មិនបានដែរ មិនដឹងគេដឹងតាមរយៈអ្នកណា»។
ប្រធានអង្គការការពារធនធានធម្មជាតិ លោក ឈឹម សាវុធ ឱ្យដឹងថា នៅខេត្តព្រះវិហារ គ្រាន់តែនៅស្រុកជ័យសែន ស្រុកសង្គមថ្មី ស្រុកជាំក្សាន្ត និងទីរួមខេត្តព្រះវិហារ គឺមានសិប្បកម្មកែច្នៃឈើមិនតិចជាង ៦០កន្លែង ដោយបំផ្លាញព្រៃឈើអស់រាប់រយម៉ែត្រគូបក្នុង១ខែៗ។ លោក ឈឹម សាវុធ ចាត់ទុកការចុះបង្ក្រាបឈើខុសច្បាប់របស់សមត្ថកិច្ច គឺគ្រាន់តែជាសកម្មភាពធ្វើឱ្យតែល្អមើល មិនមានចេតនាបង្ក្រាបពិតប្រាកដឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។