អង្គការអន្តរជាតិខាងការងារ (ILO) បង្ហាញពីរបៀបគិតប្រាក់ឈ្នួលកម្មករអប្បបរមាសម្រាប់ឆ្នាំ២០១៦ ដល់សមាជិកគណៈកម្មការប្រឹក្សាការងារ (LAC) តំណាងកម្មករ និយោជិត នៅថ្ងៃទី២ ខែកក្កដា ដើម្បីធ្វើការសិក្សាស្រាវជ្រាវរកតួលេខជាក់លាក់មួយក្នុងការកំណត់ប្រាក់ឈ្នួលជូនកម្មករក្នុងវិស័យឧស្សាហកម្មកាត់ដេរ។ ទាក់ទិនបញ្ហានេះ មេដឹកនាំសហជីពមួយចំនួនមិនចង់ឃើញការកំណត់ប្រាក់ឈ្នួលតាមបន្ទាត់នៃភាពក្រីក្រនោះទេ ព្រោះមិនអាចធានាឲ្យកម្មកររស់នៅដោយសមរម្យ។
រដូវកាលនៃការសិក្សាស្រាវជ្រាវរកតួលេខនៃការកំណត់ប្រាក់ឈ្នួល ដើម្បីធ្វើជាមូលដ្ឋានក្នុងការពិភាក្សាកំណត់ប្រាក់ឈ្នួលអប្បបរមាផ្នែកវាយនភណ្ឌកាត់ដេរ និងផលិតស្បែកជើងឆ្នាំ២០១៦ ខាងមុខ បានមកដល់ហើយ។
អង្គការអន្តរជាតិខាងការងារ បានបង្ហាញនូវទឡ្ហីករណ៍ និងផ្ដល់បច្ចេកទេស ព្រមទាំងបទពិសោធន៍ជាច្រើនទៀត នៅក្នុងការកំណត់ប្រាក់ឈ្នួលរបស់ប្រទេសនៅលើពិភពលោក នៅក្នុងកិច្ចប្រជុំឯកតោភាគីរបស់សមាជិកគណៈកម្មការប្រឹក្សាការងារតំណាងឲ្យភាគីកម្មករនិយោជិត នៅថ្ងៃទី២ ខែកក្កដា ដែលរៀបចំធ្វើនៅភោជនីយដ្ឋានទន្លេបាសាក់២។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរ ហៅកាត់ថា ស៊ីខាវឌូ (C-CAWDU) លោក អាត់ ធន់ អោយដឹងថា ទឡ្ហីករណ៍ដែលអង្គការអន្តរជាតិខាងការងារផ្ដល់ជាមេរៀនសម្រាប់សិក្សាស្រាវជ្រាវកំណត់ប្រាក់ឈ្នួលនោះ ដូចជា កម្រិតជីវភាពរស់នៅរបស់កម្មករ អត្រាអតិផរណា កត្តាផលិតភាព ភាពប្រកួតប្រជែងនៃប្រទេសក្នុងតំបន់ ផលប៉ះពាល់នៃកំណើនប្រាក់ឈ្នួលកន្លងមកទៅលើទីផ្សារការងារ និងអត្រាចំណេញនៅក្នុងវិស័យរោងចក្រជាដើម។
យ៉ាងណាក៏ដោយ លោក អាត់ ធន់ អះអាងថា ការកំណត់ប្រាក់ឈ្នួលនៅក្នុងប្រទេសកម្ពុជា គឺយោងតាមបន្ទាត់នៃភាពក្រីក្រទៅវិញ។ លោកបន្តថា រដ្ឋាភិបាល និងភាគីក្រុមហ៊ុន គួរតែសិក្សាស្រាវជ្រាវកំណត់ប្រាក់ឈ្នួលទៅតាមតម្រូវការរស់នៅរបស់កម្មករ៖ «នៅប្រទេសផ្សេងទៀតលើពិភពលោក គេមិនយកបន្ទាត់ភាពក្រីក្រដើម្បីកំណត់ប្រាក់ឈ្នួលអប្បបរមាទេ ពោលគឺធ្វើការសិក្សាស្រាវជ្រាវមួយអំពីកម្រិតនៃជីវភាពរស់នៅរបស់កម្មករនិយោជិត បន្ទាប់មកគឺគេកំណត់ប្រាក់ឈ្នួលទៅតាមតម្រូវការរស់នៅរបស់កម្មកររបស់គេ ដូចជានៅវៀតណាម អូស្ត្រាលី កូរ៉េ បង់ក្លាដេស ជាដើម»។
លោក អាត់ ធន់ បញ្ជាក់ថា ការកំណត់ប្រាក់ឈ្នួលតាមបន្ទាត់នៃភាពក្រីក្រនេះ គឺមិនអាចដោះស្រាយបញ្ហាទុក្ខលំបាករបស់កម្មករបានឡើយ ដែលជាហេតុនាំឲ្យកម្មករជាច្រើនដើរចេញពីវិស័យកាត់ដេរ ទៅរកការងារនៅវិស័យផ្សេងទៀត ជាពិសេសចំណាកស្រុកទៅធ្វើការនៅបរទេស។ ដោយឡែក កម្មករភាគច្រើនបង្ខំចិត្តធ្វើការថែមម៉ោង និងចំណាយត្បិតត្បៀតលើម្ហូបអាហារ បណ្ដាលអោយថមថយកម្លាំង ដួលសន្លប់ជាញឹកញយនៅក្នុងរោងចក្រ។
ជាមួយគ្នានេះ ប្រធានសហភាពសហព័ន្ធសហជីពជាតិកម្ពុជា និងជាអនុប្រធានគណៈកម្មការប្រឹក្សាការងារ លោក ជួន មុំថុល មានប្រសាសន៍ថា សហជីពបានយល់ដឹងច្រើនក្នុងការគិតប្រាក់ឈ្នួលអប្បបរមាជូនកម្មករដោយផ្អែកតាមបន្ទាត់នៃភាពក្រីក្រនោះ ក្រោយស្ដាប់បទបង្ហាញរបស់អង្គការអាយឡូ។
យ៉ាងនេះក្តី លោកមិនរំពឹងទុកថា ប្រាក់ខែកម្មករ នឹងបានឡើងច្រើននោះទេ៖ «ការកំណត់ប្រាក់ឈ្នួលនៅឆ្នាំ២០១៥ នេះ ប្រហែលជាមិនបានខ្ពស់ដូចដែលយើងចង់បានទេ បើផ្អែកតាមបន្ទាត់ភាពក្រីក្រ និងតាមរូបមន្តរបស់អាយឡូ»។
កាលពីពេលថ្មីៗនេះ ក្រសួងការងារបានចេញសេចក្ដីប្រកាសព័ត៌មានផ្លូវការ ដែលមានសហព័ន្ធសហជីពចំនួន ៨០ ទូទាំងប្រទេស បានព្រមព្រៀងគ្នាថា នៅក្នុងខែកក្កដានេះ ភាគីទាំងអស់ត្រូវអង្គុយជុំគ្នាដើម្បីពិនិត្យឡើងវិញទាក់ទងរឿងគោលការណ៍ដំឡើងប្រាក់ឈ្នួលជូនកម្មករ។
នៅខែសីហា ខាងមុខ ភាគីនីមួយៗនឹងទទួលបានគោលជំហរមួយក្រោយកិច្ចប្រជុំនោះ នឹងលើកទៅជជែកទល់មុខគ្នា។ បន្ទាប់មកនៅខែកញ្ញា ឆ្នាំ២០១៥ ភាគីសហជីព ក្រសួងការងារ និងអង្គការអាយឡូ អង្គុយជុំគ្នាថ្លឹងថ្លែងចំពោះការទាមទារដំឡើងប្រាក់ឈ្នួលនេះរួមគ្នា។ ដំណាក់កាលចុងក្រោយនៅខែតុលា ក្រុមការងារនឹងសម្រេចប្រាក់ឈ្នួលគោលជូនកម្មករតែម្ដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។