ពលរដ្ឋនៅខេត្តស្វាយរៀង ដែលទៅធ្វើការនៅប្រទេសថៃ ចោទប្រកាន់ក្រុមហ៊ុន ខេមា (Kama) ថាបោកប្រាស់ពលករ ដោយនាំពួកគេយកដាក់ចោលនៅប្រទេសថៃ មិនផ្ដល់លិខិតឆ្លងដែន ព្រមទាំងយកទៅដាក់ឲ្យធ្វើការងារប្រឈមមុខគ្រោះថ្នាក់ដល់អាយុជីវិត ហើយបានប្រាក់ខែតិចខុសពីការសន្យា។ ដោយសារតែបញ្ហានេះ ពលករមួយចំនួនលួចរត់មកកម្ពុជា វិញបាតដៃទទេទាំងខុសច្បាប់។
ពលករចំណាកស្រុកទៅធ្វើការតាមរយៈក្រុមហ៊ុន ខេមា ដែលទើបត្រឡប់ពីប្រទេសថៃ បញ្ជាក់ថា កាលពីធ្វើការនៅប្រទេសថៃ នោះ ពលករខ្មែរជាច្រើនតែងត្អូញត្អែរថា លង់ខ្លួនជាមួយក្រុមហ៊ុននេះ ដោយម្នាក់ៗទៅមុខមិនរួចចង់ថយក្រោយក៏ពិបាក គឺក្រុមហ៊ុននេះពុំទទួលខុសត្រូវចំពោះពលករទេ ទុកឲ្យពួកគេរស់នៅប្រថុយប្រថានដូចពលករចំណាកស្រុកខុសច្បាប់។
ពលករម្នាក់ លោក ស សុផៃ រស់នៅភូមិសាម៉ ឃុំស្វាយរំពារ ស្រុកស្វាយទាប ខេត្តស្វាយរៀង ថ្លែងនៅថ្ងៃទី៤ កក្កដា ថា តាមការសន្យារបស់ក្រុមហ៊ុន ថានាំពួកគេទៅធ្វើការរោងចក្រទឹកដោះគោនៅប្រទេសថៃ ដោយពលករម្នាក់បានប្រាក់ឈ្នួលមួយថ្ងៃ ៣០០បាត។ ប៉ុន្តែនៅពេលដល់ប្រទេសថៃ ក្រុមហ៊ុនយកពួកគេទៅធ្វើការនៅកន្លែងផ្សេង ហើយការងារប្រថុយនឹងគ្រោះថ្នាក់ដល់អាយុជីវិត បានប្រាក់ឈ្នួលតិច ធ្វើការទាំងលំបាកលំបិន។ ពេលបើកប្រាក់រៀងរាល់ខែ សល់ពីក្រុមហ៊ុនប្រមាណម្នាក់ ៦០ដុល្លារអាមេរិក។ ជាងនេះទៅទៀត ពលករទាំងអស់គ្មានលិខិតឆ្លងដែនទេ គឺរស់នៅទាំងភ័យខ្លាចប៉ូលិសថៃ ចាប់ផង។
លោក ស សុផៃ៖ «ពេលខ្លះបាញ់អាកាំភ្លើងខ្យល់ យើងបាញ់ដែកគោលអូស! មានបាក់ជើងបាក់ឆ្អឹងជំនីទៀត។ ដល់ពេលអ៊ីចឹង ខ្ញុំធ្វើការកន្លែងហ្នឹង ដល់ខ្ញុំឃើញផ្ទាល់ៗខ្លះដែរ បានខ្ញុំអត់នៅទេ ខ្ញុំមកវិញ។ ព្រោះអីដូចគ្នាអ៊ីចឹងបង! ទាំងមុនទាំងក្រោយ គេអ្នកស្គាល់ខ្ញុំ ហើយអ្នកគេមកមុន ខ្ញុំទៅក្រោយ គេជួបគេនៅហ្នឹងដែរ គេទៅតាមក្រុមហ៊ុនហ្នឹងដែរបងណាស់បាទ! ហើយអ្នកគេនៅផ្ទះជួលហ្នឹង គេប្រាប់ខ្ញុំគេទៅធ្វើបានតែបួនប្រាំថ្ងៃអី គេមកវិញ អ៊ីចឹងគេរកកន្លែងបងប្អូនគេធ្វើការកន្លែងផ្សេង សុខចិត្តចោលប៉ាសស្ព័រគ្រប់គ្នាបង!»។
វិទ្យុអាស៊ីសេរី ពុំអាចទាក់ទងមន្ត្រីក្រុមហ៊ុន ខេមា នាំពលករទៅធ្វើការនៅថៃ ដើម្បីអត្ថាធិប្បាយជុំវិញបញ្ហានេះបានទេ នៅថ្ងៃទី៤ កក្កដា។
ប៉ុន្តែ មន្ត្រីរបស់ក្រុមហ៊ុន ខេមា អ្នកស្រី ដា ធ្លាប់មានប្រសាសន៍កាលពីចុងខែមិថុនា កន្លងទៅថា ក្រុមហ៊ុនពុំមែននាំពលករទៅទុកចោលប្រទេសថៃ ដោយមិនទទួលខុសត្រូវដូចការលើកឡើងនោះទេ គឺពលករទៅដល់កន្លែងធ្វើការនៅក្រៅប្រទេសដំបូងនោះ ការចាយវាយជាបន្ទុករបស់ពួកគេ។ ចំណែកការមិនផ្ដល់លិខិតឆ្លងដែននោះ អ្នកស្រីបញ្ជាក់ថា ការធ្វើដូចនេះ ជាតម្រូវការរបស់ក្រុមហ៊ុន ដើម្បីបញ្ចៀសបញ្ហាពេលធ្វើការនៅប្រទេសថៃ៖ «អត់ទេបង ពលករ បងអាចស៊ើបសួរកន្លែងផ្សេងបាន ពលករអត់មានក្រុមហ៊ុនណាឲ្យពលករកាន់ប៉ាសស្ព័រខ្លួនឯងទេបង! គេមានឲ្យប័ណ្ណចេញចូល ប័ណ្ណអន្តោប្រវេសន៍ លិខិតថ្កោលទោសអីផ្សេងៗទៀតមួយកំផ្លេរួចបាត់ទៅហើយណាស់។ ហើយម្ចាស់ថៅកែនៅថៃ បានធានាឈ្មោះម្នាក់ហ្នឹងរួចបាត់ទៅហើយ អត់មានបញ្ហាទេ»។
នាយកប្រតិបត្តិអង្គការខារាមកម្ពុជា លោក យ៉ា ណាវុធ ចាត់ទុកការដកហូតលិខិតឆ្លងដែនពីពលកររបស់ក្រុមហ៊ុននេះ ថាជាការរំលោភសិទ្ធិស្របច្បាប់របស់ពលករនៅក្រៅប្រទេស ធ្វើឲ្យបាត់បង់សិទ្ធិធ្វើដំណើរ និងការរស់នៅរបស់ពលករ។ លោក យ៉ា ណាវុធ កត់សម្គាល់ថា កន្លងមក ក្រុមហ៊ុនជាច្រើនដែលនាំពលករទៅធ្វើការប្រទេសថៃ នោះ តែងកើតមានបោកពលករ និងមានការប្ដឹងផ្ដល់គ្នាជាមួយក្រុមហ៊ុនបន្តបន្ទាប់៖ «អ៊ីចឹងពលករត្រូវតែដឹងអំពីសិទ្ធិរបស់ខ្លួន ហើយត្រូវអឺ! ប្ដឹងទៅស្ថាប័នណាដែលពាក់ព័ន្ធ ដើម្បីឲ្យគាត់ជួយអន្តរាគមន៍ក្នុងវិស័យហ្នឹង។ បាទ! កាលណាដកយកឯកសារផ្សេងៗ ពេលដែលតម្រួតថៃ ឬសមត្ថកិច្ចគេឆែកទៅ យើងអត់មានឯកសារ យើងប្រឈមមុខទៅនឹងការចាប់ខ្លួន ឬក៏ឃុំខ្លួននៅក្នុងប្រទេសគេហើយ។ អ៊ីចឹងការធ្វើដូច្នេះ វាមិនមែនជារឿងត្រឹមត្រូវទេ ការរំលោភសិទ្ធិឯកជនរបស់ហើយ»។
ពលករដែលត្រឡប់មកកម្ពុជា បញ្ជាក់ថា ពួកគេទៅធ្វើការនៅប្រទេសថៃ តាមរយៈក្រុមហ៊ុន ខេមា ដោយស្របច្បាប់ក្នុងតម្លៃសេវាម្នាក់ ៣០០ដុល្លារ ហើយចេញទៅធ្វើការនៅចុងខែមិថុនា ឆ្នាំ២០១៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។