តុលាការខេត្តកំពង់ចាម សម្រេចចេញដីកាដោះលែងមន្ត្រីសហជីព និងកម្មករចំនួន ៥នាក់នៅរោងចក្រស្បែកជើងជូហួយ (JUHUI) នៅខេត្តកំពង់ចាម ឱ្យនៅក្រៅឃុំបណ្ដោះអាសន្ននៅរសៀលថ្ងៃទី១២ វិច្ឆិកា។
ការសម្រេចដោះលែងឱ្យនៅក្រៅឃុំនេះ បន្ទាប់ពីមានលិខិតស្នើសុំជាបន្តបន្ទាប់ពីសំណាក់មេធាវីការពារក្តីឱ្យជនជាប់ចោទទាំង ៥នាក់នោះ ដាក់ជូនទៅតុលាការ ដើម្បីឱ្យកូនក្តីខ្លួនអាចនៅក្រៅឃុំ ពីព្រោះការសម្រេចឃុំខ្លួនកាលពីថ្ងៃទី២៨ តុលា នោះ ជារឿងមិនត្រឹមត្រូវតាមនីតិវិធីឡើយ។
មេធាវីការពារក្តីឱ្យជនជាប់ចោទទាំង ៥នាក់ គឺលោក គីម សុជាតិ មានប្រសាសន៍ថា នេះមិនមែនជាការដោះលែងទាំងស្រុងទេ ពោលគឺត្រូវស្ថិតនៅក្រោមការត្រួតពិនិត្យរបស់តុលាការ ដោយតម្រូវឱ្យអ្នកទាំងនោះបង្ហាញខ្លួននៅប៉ុស្តិ៍នគរបាលរបស់ខ្លួនមួយខែម្តង មិនត្រូវផ្លាស់ប្ដូរលំនៅឋានដោយគ្មានការអនុញ្ញាតពីចៅក្រមស៊ើបសួរជាដើម។ លោកបន្តថា លោកនឹងស្នើសុំឱ្យតុលាការបើកការស៊ើបអង្កេតបន្តទៀតជុំវិញសំណុំរឿងមួយនេះ។
លោក គីម សុជាតិ៖ «នីតិវិធីបន្តទៀតហ្នឹង គឺខ្ញុំនឹងធ្វើការស្នើសុំបំពេញកិច្ច ដោយឱ្យតុលាការស៊ើបសួរឱ្យដល់ទៅឫសគល់កើតឡើងបញ្ហាក្នុងរឿងហ្នឹង ព្រោះអីឫសគល់ដែលកើតឡើង គឺវាផ្ដើមចេញដោយក្រុមជើងកាងនៅក្នុងរោងចក្រ បង្កចេញពីក្នុងមកហ្នឹងបង្កើតឱ្យមានអំពើហិង្សាហ្នឹង។ អ៊ីចឹងយើងនឹងស្នើឱ្យតុលាការស៊ើបអង្កេតដល់អ្នកទាំងអស់ហ្នឹង។ បាទ! ហើយបន្តទៀត យើងនឹងស្នើសុំវត្ថុដែលក្រុមអ្នកទាំង ១០នាក់ហ្នឹង ដែលសមត្ថកិច្ចដកហូតយកហ្នឹង។ មានដូចជាទូរស័ព្ទ មានដូចជាកាបូប មានឯកសារមួយចំនួន ហើយនិងលុយមួយចំនួន។ ហើយខ្ញុំដាក់ឯកសារហ្នឹង ហើយនឹងដាក់ទៅស្អែកខានស្អែក»។
ជនជាប់ចោទទាំង ៥នាក់នោះរួមមាន អ្នកស្រី ម៉ុន សារ៉ែម ជាអនុប្រធានសហជីពស៊ីខៅឌូ (CCAWDU) ក្នុងរោងចក្រជូហួយ លោក ឃុន សុខុម មន្ត្រីសហជីពស៊ីខៅឌូ អ្នកស្រី បៀន សារីម ជាកម្មការិនីក្នុងរោងចក្រជូហួយ លោក ណេត ពិសី ជាអ្នកបើកឡានដឹកកម្មករ និងលោក កង សាវុធ ជាជាងផ្សារដែក ត្រូវបានតុលាការសម្រេចឃុំខ្លួនកាលពីថ្ងៃទី២៨ តុលា បន្ទាប់ពីមានកម្មករជាច្រើនធ្វើកូដកម្មទាមទារឱ្យរោងចក្រដោះស្រាយបញ្ហាការងាររបស់ពួកគាត់ រហូតមានផ្ទុះអំពើហិង្សាឡើងកាលពីថ្ងៃទី២៥ តុលា នៅរោងចក្រជូហួយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។