ប្រជាពលរដ្ឋខេត្តកំពត ប្រមាណជាង ១០០នាក់ បាននាំគ្នាឡើងមកតវ៉ានៅសាលាដំបូងខេត្តកំពង់ចាម ដើម្បីស្នើសុំឱ្យតុលាការដោះលែងសាច់ញាតិរបស់ពួកគាត់វិញ។ ពួកគាត់អះអាងថា ការចាប់ខ្លួនសាច់ញាតិពួកគាត់កាលពីថ្ងៃទី២៤ កក្កដា ហើយបានបញ្ជូនទៅពន្ធនាគារមាត់ឃ្មង់ នៅថ្ងៃទី២៨ កក្កដា ដោយចោទពីបទឆបោកនោះ គឺជារឿងអយុត្តិធម៌។
ប្រជាពលរដ្ឋ និងសាច់ញាតិជនជាប់ចោទបីនាក់ ដែលតុលាការខេត្តកំពង់ចាម ចោទប្រកាន់ពីបទផ្សំគំនិតឆបោកដោយប្រើប្រាស់កាតគ្រីរថយន្តក្លែងក្លាយ ទៅបន្លំថាជារបស់ខ្លួននោះ អះអាងថា ការចោទប្រកាន់ និងឃុំខ្លួនសាច់ញាតិរបស់ពួកគាត់ពេលនេះ គឺជារឿងអយុត្តិធម៌ ពីព្រោះតុលាការសម្រេចឃុំមនុស្សដោយខ្វះការស៊ើបអង្កេត។
តុលាការបានចោទប្រកាន់ និងសម្រេចឃុំមនុស្សបីនាក់ គឺពីរនាក់ជាប្ដីប្រពន្ធមកពីខេត្តកំពត ប្ដីឈ្មោះ អ៊ួក ពៅ រីឯប្រពន្ធឈ្មោះ ពុំ ចន្តា និងម្នាក់ទៀតឈ្មោះ នៅ ដា រស់នៅខេត្តកំពង់ចាម ជាតៃកុងឡាន ដែលជនល្មើសទើបជួលមកបើកឡានឱ្យខ្លួន។
ប្រជាពលរដ្ឋម្នាក់រស់នៅឃុំត្រមែង ស្រុកឈូក ខេត្តកំពត លោក ពាន សារ៉ាន ដែលត្រូវជាប្អូនថ្លៃរបស់ លោក អ៊ួក ពៅ ឱ្យដឹងថា ប្រជាពលរដ្ឋខំប្រឹងឡើងមកពីខេត្តកំពត ដើម្បីជាសាក្សីបញ្ជាក់ថា ឡាននោះ គឺឡានរបស់ លោក អ៊ួក ពៅ និងប្រពន្ធ ដែលតែងតែរកស៊ីដឹកឥវ៉ាន់ឱ្យគេ និងខ្លួនឯងជាច្រើនឆ្នាំមកហើយ។ លោកបន្តថា នៅថ្ងៃទី២៣ កក្កដា បងរបស់គាត់បានជួលឡាននោះទៅឱ្យឈ្មោះ សន សារ៉ា ហើយ សន សារ៉ា ក៏បានជួលអ្នកបើកបរម្នាក់ឈ្មោះ នៅ ដា ដើម្បីដឹកគ្រាប់ស្វាយចន្ទី ឱ្យខ្លួននៅស្រុកចម្ការលើ។ លោកបន្ថែមថា បើកដល់ស្រុកចម្ការលើ សន សារ៉ា បញ្ជាឱ្យតៃកុងនោះបើករថយន្តទៅដាក់បញ្ចាំ ដោយយកលេសថាជាកន្លែងយកគ្រាប់ស្វាយចន្ទី រួចហើយរត់គេចខ្លួនបាត់ទៅ ដោយទុកឱ្យតៃកុងនៅចាំឡានម្នាក់ឯង។ ក្រោយមកនៅថ្ងៃទី២៤ កក្កដា ទើបបងលោក និងប្រពន្ធ រួមនិងតៃកុងឡាន ដឹងថារថយន្តនោះដាក់បញ្ចាំរួចហើយក្នុងតម្លៃ ១ម៉ឺនដុល្លារ បន្ទាប់មកក៏មានការប្រកែកគ្នាជាមួយម្ចាស់ហាងបញ្ចាំ ឬកុងស៊ី ដើម្បីបញ្ជាក់ថា នរណាជាម្ចាស់រថយន្តពិតប្រាកដ។ ម្ចាស់កុងស៊ី ឈ្មោះ ហ៊ាង វណ្ណលីជុង នៅស្រុកចម្ការលើ សុំមើលកាតគ្រី ហើយបងលោកក៏ហុចកាតគ្រីពិតប្រាកដទៅម្ចាស់កុងស៊ីនោះ ស្រាប់ម្ចាស់កុងស៊ីយកកាតគ្រីបងលោករត់ចូលផ្ទះតែម្តង។ ចេញមកវិញ ស្រាប់តែឱ្យកាតគ្រីក្លែងក្លាយមកឱ្យបងលោក ដោយប្ដឹងប៉ូលិសថាបងលោកបានប្រើកាតគ្រីក្លែងក្លាយ ដើម្បីធ្វើការឆបោកគេ៖ «មិនសម្រាប់ខ្ញុំជាប្អូនថ្លៃទេ សម្រាប់ប្រជាពលរដ្ឋនៅឃុំត្រមែង ទាំងអស់ គឺគេមិនអាចទទួលយកបានទេ ហើយគេថាវាជារឿងអយុត្តិធម៌បំផុតរឿងនេះ បើនិយាយឱ្យចំ អ្នកដែលធ្វើរៀបចំគំនិតនេះ គឺអារករហុតឈាមគ្នាទាំងប្ដីទាំងប្រពន្ធហើយ»។
ប្រជាពលរដ្ឋមកពីខេត្តកំពត ដើម្បីធ្វើជាសាក្សីប្រមាណ ១០០នាក់ ជ្រួលច្រាល់នៅមុខសាលាដំបូងខេត្ត អមដោយទឹកមុខព្រួយបារម្ភ ហើយយំស្ទើរគ្រប់គ្នា នៅពេលវិទ្យុអាស៊ីសេរី សម្ភាសជាមួយកូនៗជនជាប់ចោទទាំងពីរ ដែលរៀបរាប់ពីការលំបាករបស់ខ្លួននៅពេលមិនមានឪពុកម្តាយនៅជាមួយ មិនមានលុយទៅរៀនសូត្រ និងម្យ៉ាងជំពាក់បំណុលធនាគារផង។
ចំណែកប្រជាពលរដ្ឋនៅខេត្តកំពង់ចាម វិញ លោក យ៉ង សុផល ត្រូវជាពូរបស់តៃកុងរថយន្តឈ្មោះ នៅ ដា ឱ្យដឹងថា ការសម្រេចឃុំខ្លួនក្មួយលោក និងម្ចាស់រថយន្តពេលនេះ គឺជារឿងអយុត្តិធម៌ ពីព្រោះជនរងគ្រោះបែរជាត្រូវជាប់គុកទៅវិញ។
ចៅក្រមស៊ើបសួរសាលាដំបូងខេត្តកំពង់ចាម លោក ងួន វុទ្ធី មានប្រសាសន៍ថា ជាការសន្និដ្ឋានរបស់តំណាងអយ្យការបញ្ជាក់ថា ករណីនេះមានការចោទប្រកាន់ពីរដាច់ដោយឡែកពីគ្នា គឺម្នាក់ដែលយករថយន្តមកដាក់បញ្ចាំ ហើយរត់គេចខ្លួនបាត់នោះ គឺចោទប្រកាន់ពីបទឆបោក។ ចំណែកជនជាប់ចោទបីនាក់ កំពុងឃុំនៅពន្ធនាគារ គឺចោទប្រកាន់ពីបទផ្សំគំនិតឆបោក។ ប៉ុន្តែចំពោះនីតិវិធីបន្តទៀត លោកមិនអាចជម្រាបជូនបាននោះទេ ពីព្រោះវាជារឿងសម្ងាត់ស្ថិតនៅក្នុងផ្លូវច្បាប់។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ប្រចាំខេត្តកំពង់ចាម លោក នាង សុវ៉ាត មានប្រសាសន៍ថា ការឃុំខ្លួនជនជាប់ចោទពេលនេះ គឺជារឿងខុសច្បាប់ និងខ្វះការស៊ើបអង្កេតឱ្យបានច្បាស់លាស់ ពីព្រោះអ្នកមានចំណែកខ្លាំង គឺអ្នកយករថយន្តមកដាក់បញ្ចាំ និងអ្នកទទួលបញ្ចាំ មិនមែនឃុំជនរងគ្រោះនោះទេ៖ «គឺអ្នកដែលប្រព្រឹត្តអំពើល្មើសនេះ គឺអ្នកទទួលបញ្ចាំ និងអ្នកដាក់បញ្ចាំទេ ហើយការដែលនាំខ្លួនមនុស្សសុចរិត វាគឺជាអំពើរំលោភសិទ្ធិមនុស្ស និងរំលោភច្បាប់ ហើយល្មមកែខ្លួនកុំមើលឃើញតែផលប្រយោជន៍ខ្លាំងពេកចំពោះអ្នកឃុំខ្លួនគេ។ ពីព្រោះអី ឡានថ្លៃជាងកម្មវត្ថុនៃបណ្ដឹង។ បណ្ដឹងនៃការឆបោកតែមួយម៉ឺនទេ តែឡានគាត់ពីរម៉ឺនទៅបីម៉ឺន រឿងអីដែលត្រូវទៅឃុំខ្លួនគាត់។ ឃុំខ្លួនទាល់តែគាត់មកតែនេះរបស់គាត់ ដេញគាត់ក៏គាត់មិនចេញពីរបស់គាត់ដែរ។ ដូច្នេះអត់ត្រូវឃុំខ្លួនទេ អាការសម្រេចចិត្តឃុំខ្លួន គឺខុស»។
លោកបន្ថែមថា ប្រជាពលរដ្ឋអាចធ្វើពាក្យប្ដឹងជំទាស់ទៅអគ្គព្រះរាជអាជ្ញានៃសាលាឧទ្ធរណ៍ ដើម្បីឱ្យប្ដូរការសម្រេចចិត្តនៃការឃុំខ្លួននោះ ហើយតុលាការគប្បីស៊ើបអង្កេតកន្លែងបញ្ចាំនោះឱ្យបានត្រឹមត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។