ប្រធានប្រតិបត្តិគណបក្សសង្គ្រោះជាតិ ប្រចាំស្រុកពញាឮ បានចោទប្រកាន់អាជ្ញាធរភូមិថា បានរារាំងសកម្មភាពចុះចែកអំណោយរបស់សប្បុរសជន ដែលថាធ្វើឡើងដោយគ្មានការសុំអនុញ្ញាតពីសំណាក់អាជ្ញាធរនៅតាមមូលដ្ឋាន។
សកម្មជនគណបក្សសង្គ្រោះជាតិ បានដឹកនាំសប្បុរសជនជាម្ចាស់ជំនួយដែលបានចុះទៅចែកអំណោយជូនបងប្អូនក្រីក្រនៅស្រុកពញាឮ ខេត្តកណ្ដាល កាលពីថ្ងៃទី២០ តុលា ត្រូវបានរំខានពីសំណាក់អាជ្ញាធរភូមិ។
ប្រធានប្រតិបត្តិគណបក្សសង្គ្រោះជាតិ ប្រចាំស្រុកពញាឮ ខេត្តកណ្ដាល លោក ម៉ៅ ឌីយ៉ាម៉ង់ បានឱ្យដឹងថា កាលពីព្រឹកថ្ងៃទី២០ តុលា លោកបានដឹកនាំក្រុមសប្បុរសជននៅភ្នំពេញ ដើម្បីចុះចែកអំណោយដល់ប្រជាពលរដ្ឋដែលមានការខ្វះខាត និងទទួលរងគ្រោះដោយទឹកជំនន់នាពេលកន្លងទៅ។ លោកបន្តថា អំណោយទាំងនោះមិនមែនជាការយកមុខមាត់ខាងបក្សនយោបាយនោះទេ ប៉ុន្តែពេលដែលចែកនោះ ត្រូវបានអាជ្ញាធរភូមិចំបក់មាស មកធ្វើការរារាំងពួកគាត់ មិនឱ្យបន្តការចែក ដោយខាងអាជ្ញាធរបានលើកឡើងថា សកម្មភាពរបស់សកម្មជនគណបក្សសង្គ្រោះជាតិ រួមទាំងសប្បុរសជនធ្វើនោះ ជារឿងខុសច្បាប់ ពីព្រោះមិនបានជម្រាបឱ្យអាជ្ញាធរភូមិ ឬឃុំ បានដឹងឮនោះឡើយ។
លោក ម៉ៅ ឌីយ៉ាម៉ង់៖ «បន្ទាប់មក គាត់រៀបចំអំណោយ រៀបចំដាក់អង្ករនឹងកន្ទេល ហើយអាជ្ញាធរភូមិហ្នឹង មានមេភូមិ អនុភូមិ កងការពារភូមិ មកឃាត់អត់ឱ្យចែកទេ។ គាត់ថា អត់មានឱ្យចែកបានទេ អំណោយហ្នឹង ពីព្រោះអីអស់លោកមកហ្នឹងអត់មានសុំច្បាប់អនុញ្ញាតពីគាត់។ អ៊ីចឹង គាត់អត់ឱ្យចែកទេ។ បន្ទាប់មក ប្រធានភូមិ អនុភូមិ ប្រុងដកហូតអំណោយរបស់គាត់ហ្នឹង ប៉ុន្តែម្ចាស់ទានហ្នឹងគាត់អត់ព្រមឱ្យទេ»។
លោកបន្ថែមទៀតថា សកម្មភាពរារាំងពួកគាត់ពីសំណាក់អាជ្ញាធរភូមិនេះ ធ្វើឱ្យប្រជាពលរដ្ឋមានការខឹងសម្បារនឹងអាជ្ញាធរទាំងនោះ រហូតដល់មានសមត្ថកិច្ចប៉ូលិសស្រុកមកធ្វើអន្តរាគមន៍ ខ្លាចមានអំពើហិង្សាឡើង។ លោក ម៉ៅ ឌីយ៉ាម៉ង់ ក៏បានឱ្យដឹងដែរថា លោកមិនចាំបាច់សុំអនុញ្ញាតនោះទេ ពីព្រោះវាមិនបានផ្ទុយទៅនឹងច្បាប់នោះឡើយ៖ «អត់ទេ! អ៊ីចឹងបានជាខ្ញុំសួរគាត់វិញថា ក្នុងច្បាប់រដ្ឋធម្មនុញ្ញអត់មានអត់មានបានចែងត្រង់ហ្នឹងទេ។ បើសិនជាថាប្រជាពលរដ្ឋគាត់ដើរធ្វើបុណ្យដាក់ទានទៅដល់ជនក្រីក្ររងគ្រោះ នៅក្នុងច្បាប់មានអាហ្នឹង ពួកខ្ញុំសូមហើយ! ហើយអានេះវាអត់ ហើយគាត់ចែកហ្នឹងតែអំណោយបន្តិចបន្តួចចំនួនតែ ២៣គ្រួសារជាងតែប៉ុណ្ណឹងទេបង»។
ផ្ទុយទៅនឹងការលើកឡើងរបស់សកម្មជនគណបក្សសង្គ្រោះជាតិ អនុប្រធានភូមិចំបក់មាស លោក ឡេង ណៃ បានបដិសេធថា លោកមិនបានទៅរារាំងសកម្មភាពចែកអំណោយនោះឡើយ ប៉ុន្តែលោកគ្រាន់តែសួរនាំថា តើការចុះចែកអំណោយហ្នឹងមានការជូនដំណឹងដល់អាជ្ញាធរជាមុនដែរឬទេ?៖ «មិនមែនទេៗ មេភូមិនេះទេ អាជ្ញាធរភូមិទៅ ខ្ញុំទៅចង់ដឹងមើល ខ្ញុំទៅសួរ។ ដល់ទៅសួរទៅ ក៏ចែកអីៗ ចែកអំណោយដល់ជនសង្គ្រោះដល់អ្នកលិចទឹកលិចអីហ្នឹង។ ហើយខ្ញុំក៏សូមអំណរអរគុណណាស់ ប៉ុន្តែគ្រាន់តែសួរមើល មានច្បាប់មានទម្លាប់ទេក្នុងការមកចែកហ្នឹង? អូ! ខ្ញុំពិតជាអត់បានប្រាប់មែនអ៊ំ។ ខ្ញុំសូមខុសហើយ អត់បានជម្រាបប្រាប់អ៊ំ ខ្ញុំស្មានថា គេជម្រាបប្រាប់ហើយ ឥឡូវអត់បានប្រាប់! អាជ្ញាធរអត់ដឹងណាប្អូន»។
លោកបានបន្ថែមទៀតថា លោករីករាយនឹងសកម្មភាពសប្បុរសជួយជនក្រីក្រទាំងនោះ ប៉ុន្តែលោកគ្រាន់តែព្រួយបារម្ភថា ខ្លាចអំណោយទាំងនោះមិនបានគ្រប់គ្នា នឹងនាំឱ្យមានបញ្ហាពេលក្រោយ។ លោកក៏បានបញ្ជាក់ទៀតថា ខាងលោកគ្រាន់តែចង់ឱ្យមានការគោរពច្បាប់តែប៉ុណ្ណោះ ជៀសវាងការមានហេតុភេទមិនល្អកើតឡើង ហើយអាជ្ញាធរមិនបានដឹងឮនោះ៖ «សំខាន់ខ្លាចមានបញ្ហា! បើអត់មានបញ្ហាទេ មានអី! គេចែកៗទៅលោមានរឿងរ៉ាវ មនុស្សវាច្រើនលោតែទាស់ទែងគ្នាអ៊ីចេះអ៊ីចុះទៅ ដល់កាប់ចាក់ ដល់វ៉ៃតបគ្នាទៅ វារឿងរ៉ាវដល់អ្នកណា ដល់អាជ្ញាធរដដែលៗ ភូមិដដែលហ្នឹង។ បានខ្ញុំសួរតែប៉ុណ្ណឹង ខ្ញុំអត់ដឹង លោថាក្មួយថាមិនមែនគោរពបុគ្គលទេ គោរពច្បាប់។ ខ្ញុំប្រាប់តាមដំណើរថា ឱ្យគោរពច្បាប់ មិនមែនឱ្យគោរពបុគ្គលទេ»។
សកម្មភាពចុះចែកអំណោយរបស់សប្បុរសជន សហការជាមួយសកម្មជនគណបក្សសង្គ្រោះជាតិ ត្រូវបានធ្វើឡើងនៅភូមិចំបក់មាស ឃុំផ្សារដែក ស្រុកពញាឮ ខេត្តកណ្ដាល ដែលមានសមាជិកអ្នកទទួលអំណោយប្រមាណជាង ២០គ្រួសារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។