សមាជិកសភាមកពីគណបក្សសង្គ្រោះជាតិ គ្រោងនឹងស្នើសេចក្ដីព្រាងច្បាប់កំណត់ប្រាក់ឈ្នួលកម្មករអប្បបរមា ១៧៧ដុល្លារទៅរដ្ឋសភាពិភាក្សា និងអនុម័តនៅពេលឆាប់ៗខាងមុខ។
គណបក្សសង្គ្រោះជាតិ បានរៀបចំសេចក្ដីព្រាងច្បាប់នេះរួចហើយ ដោយរង់ចាំតែការចូលរួមពិនិត្យ ផ្ដល់គំនិតបន្ថែមពីសង្គមស៊ីវិល និងក្រុមសហជីពប៉ុណ្ណោះ។
ប្រសិនបើគ្មានការប្រែប្រួលទេ នៅអាទិត្យក្រោយ សេចក្ដីព្រាងច្បាប់ស្ដីពីការកំណត់ប្រាក់ឈ្នួលកម្មករ និងមន្ត្រីរាជការ នឹងចែកផ្ញើជូនទៅបណ្ដាសង្គមស៊ីវិល និងសហជីពដើម្បីពិនិត្យមើល។
ការសម្រេចដូចនេះ បន្ទាប់ពីមានជំនួបរវាងអនុប្រធានទី១ រដ្ឋសភា លោក កឹម សុខា និងអនុប្រធានគណៈកម្មការជំនាញរដ្ឋសភាមកពីគណបក្សសង្គ្រោះជាតិ ជាមួយរបស់ក្រុមសហជីពនៅមន្ទីររដ្ឋសភា នៅព្រឹកថ្ងៃទី៨ ខែតុលា។
ប្រធានក្រុមតំណាងរាស្ត្រគណបក្សសង្គ្រោះជាតិ និងជាអនុប្រធានប្រធានគណៈកម្មការហិរញ្ញវត្ថុធនាគារ និងសវនកម្មនៃរដ្ឋសភា លោក សុន ឆ័យ បានថ្លែងឲ្យដឹងថា ការផ្ញើសេចក្ដីព្រាងច្បាប់នេះទៅសហជីពនិងសង្គមស៊ីវិល មិនត្រូវការចំណាយពេលវែងពេកទេ ព្រោះនៅពេលនេះ លោកមានគ្រប់គ្រាន់អស់ហើយ នៅរង់ចាំតែការពិនិត្យការផ្ដល់មតិពីសហជីពនិងសង្គមស៊ីវិលប៉ុណ្ណោះ។
លោក សុន ឆ័យ រំពឹងថា សេចក្ដីព្រាងច្បាប់នេះ ពេលបញ្ជូនទៅសភានឹងត្រូវបានការគាំទ្រពីសមាជិកសភាមកពីគណបក្សប្រជាជនកម្ពុជា៖ «ជំហរដែលទាមទារ ១៧៧ដុល្លារ ជាជំហរមួយដែលសមរម្យ ហើយខ្ញុំក៏បានជម្រាបទៅវិញដែរថា ខ្ញុំនឹងរៀបចំឲ្យមានការស្នើច្បាប់ស្ដីពីប្រាក់កម្រៃ និងបៀវត្សអប្បបរមាទៅរដ្ឋសភា សង្ឃឹមថា វាមានការជឿនលឿនទៅមុខ»។
កន្លងមកលោក សុន ឆ័យ ក៏ធ្លាប់ផ្ញើសេចក្ដីព្រាងច្បាប់នេះទៅរដ្ឋសភាដើម្បីអនុម័តដែរ ប៉ុន្តែត្រូវបានរដ្ឋសភាច្រានចោល។ លោក សម រង្ស៊ី ប្រធានគណបក្សសង្គ្រោះជាតិ ក៏ធ្លាប់បានថ្លែងនៅក្នុងរដ្ឋសភា ដោយបានទាមទារឲ្យរដ្ឋាភិបាលផ្ដល់ប្រាក់ឈ្នួលជូនកម្មករចំនួន ១៧៧ដុល្លារក្នុងមួយខែ ប៉ុន្តែត្រូវបានមន្ត្រីរដ្ឋាភិបាលបដិសេធ។
ប្រធានសហជីពស៊ីខាវឌូ (C-CAWDU) លោក អាត់ ធន់ បានឲ្យដឹងថា លោកពេញចិត្តចូលរួមពិនិត្យ និងផ្ដល់គំនិតទៅលើសេចក្ដីព្រាងច្បាប់ថ្មីរបស់គណបក្សប្រឆាំង។ លោក អាត់ ធន់ យល់ថា ប្រសិនបើប្រទេសកម្ពុជា មានច្បាប់ស្ដីពីការកំណត់ប្រាក់ឈ្នួលកម្មករ នោះនឹងផ្ដល់ប្រយោជន៍ច្រើនដល់កម្មករ ហើយក៏មិនចាំបាច់ឲ្យកម្មករធ្វើការទាមទារដំឡើងប្រាក់ឈ្នួលដែរ៖ «យើងជាទូទៅ យើងគាំទ្រ ហើយយើងមកដល់ពេលបច្ចុប្បន្ននេះ យើងអត់ទាន់បានឃើញសេចក្ដីព្រាងយ៉ាងម៉េចទេ។ ប៉ុន្តែប្រសិនបើសភាឲ្យផ្ដល់យោបល់វាល្អមែនទែន ព្រោះតែកាលណាមានសេចក្ដីច្បាប់ស្ដីពីកំណត់ប្រាក់បៀវត្សអប្បបរមាហើយ មានន័យថា បើសិនសភាអនុម័ត គឺការកំណត់ប្រាក់ឈ្នួលអប្បបរមានៅក្នុងវិស័យទាំងអស់ គឺត្រូវបានកំណត់តាមហ្នឹង»។
លោក សុន ឆ័យ បានស្នើឲ្យតំណាងរាស្ត្រគណបក្សប្រជាជនកម្ពុជា គិតគូរពីប្រយោជន៍កម្មករ ព្រោះថា ការដំឡើងប្រាក់ឈ្នួលកម្ពុជា ក៏មានការព្រមព្រៀងពីសមាគមអ្នកបញ្ជាទិញ។
សមាជិកសភាគណបក្សប្រជាជនកម្ពុជា លោក ឈាង វុន មិនទាន់ធ្វើអត្ថាធិប្បាយណាមួយលើសេចក្ដីព្រាងច្បាប់នេះនៅឡើយទេ ដោយលោករង់ចាំពិនិត្យមើលសិន។ លោក ឈាង វុន មានប្រសាសន៍ថា លោកគាំទ្រសេចក្ដីព្រាងច្បាប់ណាដែលធ្វើឡើងដើម្បីឲ្យប្រាក់ខែកម្មករបានសមរម្យ មិនប៉ះពាល់អ្នកវិនិយោគ មិនប៉ះពាល់ទីផ្សារ និងមិនប៉ះពាល់សេដ្ឋកិច្ចជាតិ៖ «កុំសួរខ្ញុំថា ខ្ញុំគាំទ្រ មិនគាំទ្រ? ថាឲ្យខ្ញុំគាំទ្រ សុន ឆ័យ ធ្វើច្បាប់ ខ្ញុំអត់គាំទ្រទេ ព្រោះច្បាប់នោះខ្ញុំអត់ដឹងថាអីផង។ ខ្ញុំគាំទ្រស្អីទាំងឡាយណាដែលដំណើរទីផ្សារដើរទៅបានស្រួល កម្មករបានប្រាក់ខែច្រើន អ្នកដាក់ទុកក៏ចំណេញ រដ្ឋក៏មានចំណូល ខ្ញុំគាំទ្រអាហ្នឹង»។
សេចក្ដីព្រាងច្បាប់ស្ដីពីប្រាក់ឈ្នួលនេះ មានដាក់បញ្ចូលប្រាក់ឈ្នួលកម្មករ ប្រាក់បៀវត្ស មន្ត្រីរាជការ គ្រូបង្រៀនផងដែរ និងចែងយ៉ាងច្បាស់ពីការដំឡើងប្រាក់បៀវត្សជារៀងរាល់ឆ្នាំ។ អ្វីដែលគណបក្សសង្គ្រោះជាតិរំពឹងថា សភានឹងពិនិត្យសេចក្ដីព្រាងច្បាប់នេះ ព្រោះតែគណៈកម្មាធិការទី៨ នៃរដ្ឋសភាដែលទទួលពិនិត្យសំណើច្បាប់នេះមកពីគណបក្សសង្គ្រោះជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។