អង្គការសមាគមខ្មែរកម្ពុជាក្រោម និងសម្ព័ន្ធយុវជនខ្មែរ ដើម្បីលទ្ធិប្រជាធិបតេយ្យ នឹងទៅប្រមូលផ្តុំគ្នានៅមុខស្ថានទូតវៀតណាម ប្រចាំកម្ពុជា នៅព្រឹកថ្ងៃទី៤ ខែតុលា ឆ្នាំ២០១៤ វេលាម៉ោង ៨ព្រឹក ដើម្បីបន្តទាមទារឲ្យរដ្ឋាភិបាលវៀតណាម សុំទោសប្រជាពលរដ្ឋខ្មែរជាសាធារណៈ ជុំវិញការបំភ្លៃប្រវត្តិសាស្ត្រទឹកដីខ្មែរកម្ពុជាក្រោម។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា មានប្រសាសន៍នៅថ្ងៃទី៣ តុលា ថា ក្នុងការជួបជុំនោះ ក្រៅពីការសម្ដែងមតិ ក្រុមបាតុករក៏នឹងធ្វើយុទ្ធនាការផ្សព្វផ្សាយឲ្យពលរដ្ឋខ្មែរឈប់ប្រើប្រាស់ទំនិញ និងសេវាផ្សេងៗរបស់វៀតណាម នៅកម្ពុជា។ លោកបន្តថា យុវជននឹងចែកគ្នាជាក្រុម ដើម្បីដើរចែកខិត្តប័ណ្ណផ្សព្វផ្សាយនៅតាមទីកន្លែងផ្សេងៗ។
លោក ថាច់ សេដ្ឋា៖ «ដោយសារថាយើងបានតវ៉ាច្រើនលើកច្រើនសាហើយ ហើយខាងរដ្ឋាភិបាលយួន គេមិនឆ្លើយតប មិនអើពើទាំងអស់។ អ៊ីចឹង យើងបន្តការធ្វើបាតុកម្មបន្តទៀត ដោយយើងកំណត់ថា ធ្វើថ្ងៃ៤-៥-៦-៧-៨ អាជ្ញាធរលោកថា ៣ថ្ងៃជាប់រវល់នៅទីលានប្រជាធិបតេយ្យ ដូច្នេះហើយយើងខ្ញុំនឹងប្រមូលផ្តុំគ្នាធ្វើនៅមុខស្ថានទូតយួន តែម្តង ដើម្បីយើងសម្ដែងមតិនៅទីនោះ ហើយឲ្យយួន សុំទោសយើងជាសាធារណៈ»។
លិខិតអំពាវនាវរបស់សហគមន៍ខ្មែរកម្ពុជាក្រោមបញ្ជាក់ថា ដើម្បីកុំឲ្យមានការកកស្ទះចរាចរណ៍ក្នុងការដង្ហែចែកខិត្តប័ណ្ណ និងបិទស្ទីកឃ័រតាមផ្សារនានាក្នុងរាជធានីភ្នំពេញ និងកុំឲ្យមានការជាន់កម្មវិធីគ្នាជាមួយអង្គការផ្សេងៗនៅទីលានប្រជាធិបតេយ្យ ក្រុមអ្នកតវ៉ាសម្រេចស្នើសុំសាលារាជធានីភ្នំពេញ មកជួបជុំគ្នានៅមុខស្ថានទូតវៀតណាម វិញ។
លិខិតបញ្ជាក់ថា នៅថ្ងៃទី៤ ទី៥ និងទី៦ ខែតុលា វេលាម៉ោង ៨ព្រឹក ពួកគេជួបជុំគ្នានៅមុខស្ថានទូតវៀតណាម ដើម្បីសម្ដែងមតិរហូតដល់ម៉ោង ៥រសៀល។ ចំណែកថ្ងៃទី៧ និងទី៨ ពួកគេទៅជួបជុំគ្នានៅទីលានប្រជាធិបតេយ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។