កងយោធាថៃ បានបិទមិនឲ្យមានការដឹកជញ្ជូនទំនិញនៅពេលយប់ឆ្លងកាត់ច្រកអន្តរជាតិខ្លងលឹក ជាប់ជាមួយច្រកអន្តរជាតិប៉ោយប៉ែត ខេត្តបន្ទាយមានជ័យ។ បម្រាមកងទាហានថៃនេះ បានធ្វើឡើងដោយឯកតោភាគី និងពុំបានចេញលិខិតស្នាមជូនដំណឹងមកភាគី កម្ពុជានោះឡើយ។
វាជាវិធានការរដ្ឋបាលរបស់កងយោធាថៃ ដើម្បីលើកកម្ពស់សន្តិសុខជាតិរបស់ខ្លួនក៏ពិតមែន ប៉ុន្តែ បម្រាមភ្លឹបភ្លែតដូចភ្នែកបន្ទោរនេះ កំពុងបង្កផលលំបាកទៅដល់សេវាដឹកជញ្ជូនទំនិញនានា នៅពេលយប់របស់ក្រុមហ៊ុនដឹកជញ្ជូន។
បុគ្គលិកជាអ្នកបម្រើការខាងផ្នែកការងារឯកសារនាំទំនិញចេញចូលរបស់ក្រុមហ៊ុនកម្ពុជាមួយ ថ្លែងនៅថ្ងៃទី២៣ មិថុនា ថា រយៈពេលប៉ុន្មានថ្ងៃនេះ ទាហានថៃ បានចេញបទបញ្ជា និងជូនដំណឹងដល់ក្រុមអាជីវករក្រុមហ៊ុនដឹកជញ្ជូន មិនឲ្យមានការនាំទំនិញឆ្លងកាត់ច្រកទ្វារអន្តរជាតិប៉ោយប៉ែត នៅពេលយប់ ប៉ុន្តែពួកគេអនុញ្ញាតឲ្យរថយន្តទំនេរ មិនមានផ្ទុកទំនិញ អាចបើកឆ្លងកាត់បានរហូតដល់ម៉ោង ១០យប់៖ «ក្នុងរយៈពេលប្រហែលបីថ្ងៃកន្លងមកនេះ ភាគីថៃបានជូនដំណឹងមកដល់ក្រុមអាជីវករ មកដល់ពីក្រុមហ៊ុនដែលនាំទំនិញចេញចូលឲ្យផ្អាកនាំចេញ ត្រឹមតែរយៈពេលម៉ោង ៥ ប៉ុណ្ណោះ។ យោធាគេប្រាប់អ្នករត់ការថា ថៃត្រូវរក្សាស្ថានភាពនយោបាយ សន្តិសុខសង្គមរបស់គេឲ្យបានរឹងមាំ ពេលយប់ពិបាកគ្រប់គ្រង។ កាលពីមុនមកចរាចរណ៍បើកដល់ម៉ោង ១០យប់ទើបបានបិទ»។
នេះជាបម្រាមថ្មីមួយទៀតរបស់កងទាហានថៃ។ កញ្ញា ណង ម៉ាំ ជាអ្នករត់ការឯកសារទំនិញចេញចូលរបស់ក្រុមហ៊ុនថៃ ថ្លែងថា ទាហានថៃតម្រូវឲ្យឡានដឹកទំនិញចេញចូលឆ្លងកាត់ច្រកទ្វារអន្តរជាតិខ្លងលឹក ជាប់ច្រកទ្វារប៉ោយប៉ែត ត្រូវដំណើរការឲ្យចប់សព្វគ្រប់នៅមុនម៉ោង ៥ល្ងាច។
ទន្ទឹមគ្នានេះ កងទាហានថៃ បានបញ្ជាឲ្យមន្ត្រីគយដែលប្រចាំការនៅច្រកទ្វារខ្លងលឹក ក្នុងស្រុក អារ៉ាញ់ ខេត្តស្រះកែវ ប្រទេសថៃ ត្រូវឈប់ធ្វើការត្រួតពិនិត្យលើរថយន្តដឹកទំនិញទាំងអស់ឲ្យបាននៅមុនម៉ោង ៥ល្ងាចដូចគ្នា៖ «យើងមិនដឹងពីបទបញ្ជារបស់កងទាហានថៃ ដែលបានដាក់បម្រាម នេះទេ ហើយការបិទរហូតដល់ថ្ងៃណានោះក៏គេមិនបានដឹងឡើយ។ គេគ្រាន់តែដឹងថា ទាហានបានហាមឃាត់ដាច់ខាត រាល់ទំនិញចេញចូលតាមច្រកទ្វារអន្តរជាតិប៉ោយប៉ែត ទាំងអស់ មិនឲ្យមានចរាចរណ៍ឆ្លងកាត់ហួសពីម៉ោង ៥ល្ងាចនោះទេ ប៉ុន្តែ រថយន្តទំនេរដែលមិនដឹកទំនិញអាចចេញចូលឆ្លងច្រកទ្វារបានរហូតដល់ម៉ោង ១០យប់»។
តំណាងក្រុមហ៊ុនដឹកជញ្ជូននៅក្នុងប្រទេសកម្ពុជា ថ្លែងក្នុងលក្ខខណ្ឌមិនបញ្ចេញឈ្មោះថា ជាធម្មតាក្រុមហ៊ុនរបស់លោកបានដឹកទំនិញចេញចូលទៅប្រទេសថៃ និងមកប្រទេសកម្ពុជា រហូតដល់ម៉ោង ១០យប់ ប៉ុន្តែនៅពេលនេះ ទាហានបានកំណត់ត្រឹមតែម៉ោង ៥ល្ងាច។ ការកំណត់វេលា បានធ្វើប៉ះពាល់ដល់ការដឹកជញ្ជូនទំនិញរបស់ក្រុមហ៊ុនជាច្រើនផ្សេងទៀត។ ក្នុងនោះមានទាំងក្រុមហ៊ុននៅក្នុងប្រទេសថៃ និងក្រុមហ៊ុននៅក្នុងប្រទេសកម្ពុជា៖ «វាប៉ះពាល់...។ កាលឡានយើងមកយឺតបើខាងខ្ញុំភាគច្រើនឡានមកដល់ម៉ោង ៧យប់ ហើយបានមកដល់ អ៊ីចឹងការនាំចេញទៅហ្នឹងវាបើចាំព្រឹកឡើងយើងឡើងយន្តហោះអត់ទាន់ អ៊ីចឹងយើងចេញយប់ហ្នឹងទៅដល់ម៉ោង៩ ទៅ ៩កន្លះរៀបចំអីហើយ ខ្លះ ១០នាទី ឡានខ្ញុំចូលទៅបាន ទាន់ទំនិញនៅ ត្រូវនាំចេញធ្វើបាន ទំនិញរោងចក្រកាត់ដេរ បើធ្វើអ៊ីចឹងស្ទះហើយ»។
ប្រធានគណៈកម្មការច្រកទ្វារអន្តរជាតិប៉ោយប៉ែត លោក អាន វណ្ណៈ បញ្ជាក់ថា រូបលោកពុំទាន់បានដឹងជុំវិញព័ត៌មានដែលទាហានថៃ ហាមឃាត់មិនឲ្យដឹកទំនិញឆ្លងកាត់ច្រកទ្វារនៅពេលយប់នេះទេ។ យ៉ាងណាក៏ដោយ លោកបញ្ជាក់ថា ច្រកទ្វារអន្តរជាតិប៉ោយប៉ែត ជាប់នឹងច្រកខ្លងលឹក ថៃ ចាប់បើកទ្វារឲ្យដំណើរការពីម៉ោង ៦ព្រឹក រហូតដល់ម៉ោង ១០យប់ ទើបបិទចរាចរណ៍មិនឲ្យឆ្លងកាត់។ លោកបន្តថា បម្រាមរបស់ទាហានហាមឃាត់ទំនិញមិនឲ្យឆ្លងកាត់នៅពេលយប់នេះ នឹងត្រូវពិនិត្យមើលឡើងវិញ។
មានក្រុមហ៊ុនឯកជនធំៗជាង ១០ក្រុមហ៊ុន ដែលរកស៊ីដឹកទំនិញចេញចូលទៅក្នុងប្រទេសថៃ និងដឹកចូលមកប្រទេសកម្ពុជា ឆ្លងកាត់ច្រកទ្វារអន្តរជាតិប៉ោយប៉ែត ហើយបម្រាមថ្មីរបស់កងទាហានថៃ កំពុងបង្កផលប៉ះពាល់ដល់សេវាដឹកជញ្ជូនទំនិញរបស់ក្រុមហ៊ុន។ ទំនិញសំខាន់ៗទាំងនោះ នឹងមានការកកស្ទះមិនអាចបញ្ជូនដល់ជើងយន្តហោះទាន់ពេលវេលានោះឡើយ។ ទំនិញនានាដែលចរាចរណ៍កាត់ច្រកទ្វារអន្តរជាតិប៉ោយប៉ែត មានគ្រឿងបរិភោគ សម្ភារៈសំណង់ រថយន្តដឹកឡាន ម៉ូតូ និងសំលៀកបំពាក់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។