មន្ត្រីទំនាក់ទំនងព្រំដែនខ្មែរថៃ បញ្ជាក់ថា យោធាថៃ នៅតែបន្តចាប់បញ្ជូនពលករខ្មែរមកកម្ពុជា វិញ ស្របពេលដែលពលករស្របច្បាប់មួយចំនួន បានធ្វើដំណើរទៅរកការងារធ្វើនៅប្រទេសថៃ។ កាលពីថ្ងៃទី៣០ ខែមិថុនា យ៉ាងហោចណាស់ក៏មានពលករខ្មែរប្រមាណ ១ពាន់នាក់ ត្រូវបានយោធាថៃ ចាប់បញ្ជូនមកវិញ។
ប្រធានការិយាល័យទំនាក់ទំនងព្រំដែនខ្មែរថៃ លោក ពេជ្រ វណ្ណា អះអាងថា ស្ថានភាពនៅតាមព្រំដែននៃប្រទេសទាំងពីរមានប្រក្រតីភាពឡើងវិញហើយ បើទោះបីជារដ្ឋាភិបាលថៃ នៅបន្តចាប់បញ្ជូនពលករខ្មែរមកកម្ពុជា វិញក៏ដោយ៖ «ធម្មតាដូចមុនវិញ មុនរដ្ឋប្រហារយោធាក៏មាន ៧ ឬ ៨០០ ទៅ ១ពាន់ជាប្រចាំហើយ។ ចង់មកហ្នឹងគាត់ទៅឲ្យចាប់បញ្ជូនមក។ តាមខាងភាគីថៃ គាត់មិនអស់លុយច្រើន»។
លោកនាយករដ្ឋមន្ត្រី ហ៊ុន សែន កាលពីថ្ងៃទី២៦ មិថុនា ប្រកាសថា យ៉ាងហោចណាស់ក៏មានពលករខ្មែរប្រមាណ ២សែន ៥ម៉ឺននាក់ ភាគច្រើនត្រូវបានចាប់បញ្ជូន និងខ្លះទៀតស្ម័គ្រចិត្តវិលត្រឡប់មកកម្ពុជា វិញ។ លោកបញ្ជាក់ថា ដំបូងឡើយ រដ្ឋាភិបាលថៃ បានរំលោភសិទ្ធិមនុស្សក្នុងការចាប់បញ្ជូន ប៉ុន្តែក្រោយពីមានការតវ៉ាពីរដ្ឋាភិបាលកម្ពុជា មក រដ្ឋាភិបាលយោធាថៃ គោរពសិទ្ធិពលករប្រសើរជាងមុន។ លោក ហ៊ុន សែន ក៏សន្យានឹងពន្លឿនដំណើរបញ្ជូនពលករធ្វើការងារដោយស្របច្បាប់ ដោយសម្រួលធ្វើលិខិតឆ្លងដែនក្នុងរយៈពេល ២០ថ្ងៃ ហើយយកតម្លៃ ៤ដុល្លារសម្រាប់រូបថត។
លោក ពេជ្រ វណ្ណា បញ្ជាក់ថា នៅតាមច្រកព្រំដែនកម្ពុជាថៃ មួយចំនួន ពលករកម្ពុជា កំពុងធ្វើលិខិតស្នាមដើម្បីទៅធ្វើការងារស្របច្បាប់នៅប្រទេសថៃ វិញ។
កាលពីសប្ដាហ៍មុន ក្រសួងសុខាភិបាលថៃ ក៏បានរៀបចំការិយាល័យប្រចាំខេត្តថៃ ចំនួនបួន រួមមាន ខេត្តស្រះកែវ ចាន់បុរី ត្រាត និងខេត្តសុរិន្ទ ដើម្បីផ្តល់សេវាកម្មពិនិត្យសុខភាព និងលក់ប័ណ្ណធានារ៉ាប់រងផ្នែកសុខភាពឲ្យពលករខ្មែរ ដែលនឹងវិលត្រឡប់ទៅធ្វើការនៅប្រទេសថៃ វិញ។
សារព័ត៌មានថៃ (The Nation) ដកស្រង់សម្ដីមន្ត្រីសុខាភិបាលថៃ ថា តម្លៃពិនិត្យសុខភាពសម្រាប់ពលករខ្មែរមានតម្លៃ ១៥ដុល្លារ និងធានារ៉ាប់រងសុខភាពមានតម្លៃប្រមាណ ៤៩ដុល្លារសម្រាប់មនុស្សពេញវ័យ និង ១១ដុល្លារសម្រាប់កុមារ។ វិធានការនេះ ធ្វើឡើងបន្ទាប់ពីរបាយការណ៍ក្រសួងសុខាភិបាលថៃ រកឃើញថា ពលករប្រមាណ ២នាក់ កាលពីឆ្នាំ២០១២ រកឃើញថាមានផ្ទុកជំងឺរបេង។
ពលករដែលនឹងចូលរកការងារតាមច្រកខេត្តទាំងបួននេះ នឹងដាក់ឲ្យស្នាក់នៅក្នុងមណ្ឌលបណ្ដោះអាសន្ន អាចរហូតដល់ ៦០ថ្ងៃ រង់ចាំម្ចាស់ក្រុមហ៊ុនមកទទួលយកទៅធ្វើការងារ។ ក្នុងពេលរង់ចាំនោះ ពលករទាំងនោះនឹងទទួលសេវាពិនិត្យសុខភាព និងទិញប័ណ្ណធានារ៉ាប់រង។
មន្ត្រីសុខាភិបាលថៃ មិនទាន់បញ្ជាក់ឲ្យច្បាស់លាស់ថាតើ ប្រសិនបើពលករពិនិត្យឃើញថាមានបញ្ហាសុខភាព និងមិនទិញប័ណ្ណធានារ៉ាប់រង នឹងត្រូវអនុញ្ញាតឲ្យធ្វើការងារនៅប្រទេសថៃ ឬទេ? ក្រៅពីការធ្វើកែទម្រង់ពលករធ្វើការខុសច្បាប់នៅប្រទេសថៃ ក្រសួងអភិវឌ្ឍន៍សង្គម និងសន្តិសុខថៃ ក៏ធ្វើយុទ្ធនាការបោសសម្អាតករណីកុមារដើរសុំទាននៅតាមផ្លូវសាធារណៈ។ មន្ត្រីថៃ រកឃើញថា កុមារកម្ពុជា តូចៗជាច្រើន ត្រូវបានជួញដូរ ហើយបង្ខំឲ្យដើរសុំទាននៅប្រទេសថៃ។ កុមារទាំងនោះភាគច្រើនមានអាយុក្រោម ១០ឆ្នាំ ហើយខ្លះទៀតជាទារក។
ប្រធានការិយាល័យទំនាក់ទំនងព្រំដែនខ្មែរថៃ លោក ពេជ្រ វណ្ណា បដិសេធព័ត៌មានថា មានកុមារកម្ពុជា ដើរសុំទាននៅប្រទេសថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។