ព្រះរាជពិធីដង្ហែ និងតម្កល់ព្រះបរមអដ្ឋិ ព្រះបរមរតនកោដ្ឋ រយៈពេល ៣ថ្ងៃបិទបញ្ចប់នៅថ្ងៃទី១២ ខែកក្កដា បន្ទាប់ពីព្រះបរមអដ្ឋិរបស់ព្រះអង្គ ត្រូវបានរំកិលពីព្រះវិហារព្រះកែវមរកត យកទៅតម្កល់នៅព្រះចេតិយនៃព្រះគន្ធបុប្ផា។
បន្ទាប់ពីព្រះរាជពិធីផ្លូវការតាមបែបសាសនា ត្រូវបានបញ្ចប់សព្វគ្រប់ ប្រជាពលរដ្ឋទូទៅត្រូវបានអនុញ្ញាតឲ្យចូលក្នុងព្រះបរមរាជវាំង ដើម្បីគោរពព្រះវិញ្ញាណក្ខន្ធព្រះបរមរតនកោដ្ឋ ចាប់ពីម៉ោង ១១ព្រឹក រហូតដល់ម៉ោង ៣រសៀល។
នៅថ្ងៃចុងក្រោយនៃព្រះរាជពិធីដង្ហែ និងតម្កល់ព្រះបរមអដ្ឋិ នៃព្រះបរមរតនកោដ្ឋ នេះ ក្រៅតែពីព្រះរាជពិធីផ្សេងៗតាមបែបសាសនា ដែលធ្វើឡើងនៅក្នុងព្រះបរមរាជវាំង នៅខាងក្រៅព្រះបរមរាជវាំងឯណេះ ព្រះសង្ឃប្រមាណ ៤ពាន់អង្គ ក៏ត្រូវបាននិមន្តឲ្យចូលរួមក្នុងពិធីរាប់បាត្រ ហើយកាំភ្លើងធំចំនួន ១០១ណាត់ ក៏ត្រូវបានបាញ់បន្លឺសំឡេងឡើងក្នុងថ្ងៃចុងក្រោយនេះដែរ។
ពិធីរាប់បាត្រព្រះសង្ឃបានចប់នៅម៉ោងប្រមាណ ៩ព្រឹក។ តែទោះជាយ៉ាងណា ប្រជាពលរដ្ឋមួយចំនួនដែលចូលរួមក្នុងពិធីរាប់បាត្រនោះ នៅមិនទាន់ត្រឡប់ទៅផ្ទះវិញឡើយ ព្រោះពួកគេរង់ចាំចូលគោរពវិញ្ញាណក្ខន្ធព្រះបរមរតនកោដ្ឋ នៅព្រះចេតិយព្រះគន្ធបុប្ផា ដើម្បីសម្ដែងការដឹងគុណ ការគោរពស្រឡាញ់ និងការអាឡោះអាល័យរបស់ពួកគេ ចំពោះអតីតព្រះមហាក្សត្រ។
ប្រជាពលរដ្ឋម្នាក់អាយុ ៦៣ឆ្នាំ មកពីឃុំព្រែកអញ្ចាញ ស្រុកមុខកំពូល ខេត្តកណ្តាល ឈ្មោះ ទុន យ៉ុង ដែលអះអាងថា អ្នកស្រីមិនធ្លាប់បានចូលវាំងពីមុនមកនោះ មានប្រសាសន៍នៅពេលអ្នកស្រីកំពុងដើរចេញពីព្រះបរមរាជវាំងជាមួយអ្នកភូមិមួយចំនួនទៀត បន្ទាប់ពីបានចូលគោរពវិញ្ញាណក្ខន្ធព្រះបរមរតនកោដ្ឋនោះថា តាំងពីសម្ដេចព្រះ នរោត្តម សីហនុ បានចូលទិវង្គតមក បេះដូងអ្នកស្រីហាក់ដូចជាខ្វះអ្វីម្យ៉ាង៖ «ស្រឡាញ់ៗ សម្ដេចឪ ធ្លាប់មានប្រវត្តិអាណិតកូនចៅ កូនចៅជ្រកក្រោមម្លប់ដ៏ត្រជាក់ (ហើយឥឡូវអត់ត្រជាក់ទេចុះ?) ត្រជាក់ដែរ ប៉ុន្តែដូចជាធីងធោង តាំងពីឪសុគតទៅ ដូចម៉ែឪយើងចឹង ស្លាប់ទៅដូចវាវាលចឹងណា»។
បន្ទាប់ពីចូលគោរពវិញ្ញាណក្ខន្ធព្រះបរមរតនកោដ្ឋ រួច ប្រជាពលរដ្ឋខ្លះមិនបានត្រឡប់ទៅផ្ទះវិញភ្លាមនោះទេ ពួកគេនាំគ្នាទៅជួបជុំនៅក្រោមដើមឈើធំមួយនៅមុខព្រះបរមរាជវាំង ដើម្បីអង្គុយលេង ហើយខ្លះទៀតនាំគ្នាចោមរោមទិញព្រះឆាយាល័ក្ខណ៍ព្រះមហាក្សត្រយកទៅផ្ទះ។
អ្នកលក់ព្រះឆាយាល័ក្ខណ៍សម្ដេចព្រះ នរោត្តម សីហនុ អ្នកស្រី ឆាយ សម្ផស្ស ដែលអះអាងថា ពីមុនមកអ្នកស្រីជាអ្នកដើររើសអេតចាយ ដើម្បីចិញ្ចឹមកូនចំនួន ១០នាក់នោះ ឲ្យដឹងថា អ្នកស្រីបានចាប់យករបរលក់ព្រះឆាយាល័ក្ខណ៍សម្ដេចព្រះ នរោត្តម សីហនុ ចាប់តាំងពីពេលព្រះអង្គចូលទិវង្គតមក។ អ្នកស្រីថា មុខរបរនេះបានធ្វើឲ្យគ្រួសារអ្នកស្រីបានធូរស្បើយគួរសម។
អ្នកស្រីអះអាងថា មានអ្នកខ្លះគ្រាន់តែលក់ព្រះឆាយាល័ក្ខណ៍សម្ដេចព្រះ នរោត្តម សីហនុ អាចសន្សំលុយរហូតដល់ទៅអាចទិញឡានជិះក៏មាន។ ចំពោះអ្នកស្រីវិញ អ្នកស្រីសល់រ៉ឺម៉កកង់៣បានមួយគ្រឿង និងអាចផ្គត់ផ្គង់កូនចៅបានប្រសើរជាងមុន៖ «អត់បានរកអីទេ រើសអេតចាយចិញ្ចឹមកូន ១០នាក់ រកព្រឹកខ្វះល្ងាច រកល្ងាចខ្វះព្រឹក ឥឡូវបានសម្បូរសប្បាយដោយសារគាត់ គ្រាន់តែលក់គាត់សល់អាកង់៣បានមួយ ពីមុនរើសអេតចាយបាន ៤ពាន់ ចែកកូនចាយ អត់គ្រប់គ្រាន់ទេ»។
ចំណែកយុវជន បុត ពេជ្រ ដែលកំពុងអង្គុយលេងជាមួយមិត្តភ័ក្ដិលើសួនច្បារក្បែរនោះ ឲ្យដឹងថា មូលហេតុដែលគាត់ចូលរួមក្នុងព្រះរាជពិធីនេះ ដោយសារគាត់ចង់សម្ដែងការដឹងគុណចំពោះព្រះមហាក្សត្រ ដែលព្រះអង្គបានបូជាព្រះកាយពល ទាមទារឯករាជ្យពីបារាំង ព្រមទាំងប្រាសាទព្រះវិហារ ពីថៃ និងស្នាដៃរបស់ព្រះអង្គក្នុងការធ្វើឲ្យកម្ពុជា រីកចម្រើននាសម័យសង្គមរាស្ត្រនិយម ជាពិសេស ព្រះអង្គ គឺជាតួអង្គបង្រួបបង្រួមជាតិខ្មែរមួយដ៏សំខាន់៖ «មិនដឹងថាប្រទេសខ្មែរយើងទៅជាយ៉ាងម៉េចទេពេលហ្នឹង ហើយគណបក្សទាំងពីរមិនត្រូវរ៉ូវគ្នាទៀត មើលទៅ គឺពិបាកមែនទែន កាលគាត់នៅមួយ ដូចជាមានភ្នំមួយយ៉ាងធំចឹង គាត់ខ្លាំង គាត់ឈ្លាសវៃ ពីមុនគាត់អាចបង្រួបបង្រួមបាន គឺរវាងពីរ គឺគណបក្សហ៊្វុនស៊ិនប៉ិច និងគណបក្សប្រជាជនកម្ពុជា»។
កាលពីពេលដែលសម្ដេចព្រះ នរោត្តម សីហនុ ព្រះអង្គនៅមានព្រះជន្មាយុ ព្រះអង្គបានដើរតួនាទីដ៏សំខាន់ជាអ្នកបង្រួបបង្រួមជាតិ ជាពិសេសនៅក្រោយការបោះឆ្នោតដែលជាប់គាំងដូចសព្វថ្ងៃ។ នៅក្នុងព្រះរាជសុន្ទរកថារបស់ព្រះអង្គនៅឆ្នាំ២០១១ ព្រះអង្គបានផ្តែផ្តាំឲ្យអ្នកនយោបាយខ្មែរ ចេះបង្រួបបង្រួមគ្នាជាធ្លុងមួយដើម្បីឲ្យខ្មែរខ្លាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។