នេះជាលើកទី២ ហើយ បន្ទាប់ពីថ្ងៃម្សិលមិញ ទី២១ វិច្ឆិកា ដែលមានកម្មករប្រមាណ ៨០នាក់ បានពុលដួលសន្លប់នៅក្នុងរោងចក្រដដែលនោះ។
រោងចក្រ ឃីងហ្វឺស២ មានទីតាំងនៅតាមបណ្ដោយផ្លូវជាតិលេខ៤ ក្នុងស្រុកអង្គស្នួល ខេត្តកណ្ដាល។ កម្មករដែលបានដួលសន្លប់ បានដឹកទៅសង្គ្រោះនៅមន្ទីរព្យាបាលបែកចាន និងមន្ទីរពេទ្យផ្សេងៗទៀតដែលនៅជិតនោះ។
កម្មការិនីម្នាក់បានឲ្យដឹងថា នៅពេលទៅដល់រោងចក្រភ្លាម នាងចាប់ផ្ដើមវិលមុខ ថប់ដង្ហើម តឹងទ្រូង ឈឺពោះក្អួត និងរាកតែម្តង។
លោក ជា មុនី មានប្រសាសន៍ថា រហូតមកដល់ពេលនេះ ពុំទាន់មានការបញ្ជាក់ពីមូលហេតុណាមួយពិតប្រាកដពីក្រុមជំនាញនោះទេ។
ក្រុមមន្ត្រីនៃក្រសួងការងារ និងបណ្ដុះបណ្ដាលវិជ្ជាជីវៈ បានចុះទៅត្រួតពនិត្យស្ថានភាពក្នុងរោងចក្រនោះកាលពីរសៀលថ្ងៃទី២១ ខែវិច្ឆិកា។
អនុប្រធាននាយកដ្ឋានពេទ្យការងារនៃក្រសួងការងារ និងបណ្ដុះបណ្ដាលវិជ្ជាជីវៈ លោកវេជ្ជបណ្ឌិត ប៉ុក វណ្ណថាត មានប្រសាសន៍ថា ក្រសួងបានរកឃើញថា រោងចក្រពុំបានអនុវត្តត្រឹមត្រូវតាមច្បាប់ ទើបនាំអោយមានករណីដួលសន្លប់នេះកើតឡើង។
យ៉ាងណាក្តី លោក ជា មុនី បានស្នើសុំខាងរោងចក្រអនុញ្ញាតឲ្យកម្មករបានឈប់សម្រាកបានពីរថ្ងៃ គឺថ្ងៃសុក្រទី២២ និងថ្ងៃសៅរ៍ ទី២៣ វិច្ឆិកា ដើម្បីឲ្យកម្មករមានកម្លាំងសុខភាព និងអារម្មណ៍ល្អឡើងវិញ ហើយត្រៀមលក្ខណៈចូលធ្វើការឡើងវិញ នៅថ្ងៃច័ន្ទ ដើមសប្ដាហ៍ក្រោយ។
របាយការណ៍របស់អង្គការអន្តរជាតិខាងការងារ បានបង្ហាញថា នៅក្នុងឆ្នាំ២០១២ កន្លងទៅ មានកម្មករប្រមាណ ១ពាន់នាក់ បានដួលសន្លប់ ហើយមូលហេតុចម្បង គឺស្ថានភាពសុវត្ថិភាពសុខភាពក្នុងរោងចក្រ និងប្រាក់ខែទាប ដែលបង្ខំអោយកម្មកររស់នៅក្នុងស្ថានភាពពុំមានអាហារគ្រប់គ្រាន់ និងធ្វើការលើសកម្រិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។