បូជនីយដ្ឋានឧកញ៉ា ឃ្លាំង មឿង នៅតែជាទីសក្ការបូជាពេញនិយមសម្រាប់អ្នកខេត្តពោធិ៍សាត់ និងភ្ញៀវទេសចរមកពីខែត្រផ្សេងៗទៀត។ អ្នកគ្រប់គ្រងបូជនីយដ្ឋានអះអាងថា បច្ចុប្បន្នមានភ្ញៀវមកពីគ្រប់ទិសទីបានចូលគោរពបូជាយ៉ាងតិច ៦០នាក់ក្នុងមួយថ្ងៃៗ ប៉ុន្តែថ្ងៃខ្លះមានភ្ញៀវរាប់រយនាក់ចូលគោរពបូជាព្រមៗគ្នា ធ្វើឲ្យមនុស្សកកស្ទះនៅបរិវេណបូជនីយដ្ឋាន។ តើអាជ្ញាធរគ្រោងអភិវឌ្ឍអ្វីដើម្បីឆ្លើយតបបញ្ហានេះ។
ប្រធានគណៈកម្មការគ្រប់គ្រងបូជនីយដ្ឋានឧកញ៉ា ឃ្លាំង មឿង ឬអ្នកតា ឃ្លាំង មឿង បង្ហាញគម្រោងពង្រីកផ្ទៃដីបូជនីយដ្ឋានទំហំ ៥ហិកតារទៀត សម្រាប់ចតរថយន្តគ្រប់ប្រភេទ។ គម្រោងអភិវឌ្ឍន៍នេះ គឺស្របពេលដែលសប្បុរសជនផ្ដល់ទឹកប្រាក់ជាង ៣ម៉ឺនដុល្លារ ដើម្បីកសាងបុស្បុក ជណ្ដើរមង្គល ៣៨កាំ និងកញ្ចុះអង្គុយលេង នៅលើផ្ទៃដីរបស់បូជនីយដ្ឋានដែលមានស្រាប់ទំហំប្រមាណ ៣ហិកតារ។
ប្រធានគណៈកម្មការគ្រប់គ្រងបូជនីយដ្ឋាន លោក ម៉ៅ សោភ័ណ្ឌ មានប្រសាសន៍ថា ប្រភពជំនួយធំបានមកពីអ្នកជំនួញឈើដ៏ធំនៅកម្ពុជា គឺលោកឧកញ៉ា ទ្រី ភាព និងសមាជិកព្រឹទ្ធសភាគណបក្សប្រជាជន លោក ប្រាក់ ចំរើន។
ចំពោះគម្រោងទិញដីពង្រីកកន្លែងចតឡានវិញ លោកបញ្ជាក់ថា ម្ចាស់ដីនៅក្បែរនោះបានដំឡើងថ្លៃដីទ្វេមួយជាបីដែលលំបាកអំពាវនាវរកម្ចាស់ជំនួយបរិច្ចាគទឹកប្រាក់ដ៏ច្រើនបែបនេះ៖ «ផែនការចាក់ដីនៅខាងលិចដែលលោកតាមានដីមួយចំនួននៅត្រង់ហ្នឹង កំពុងតែរកលុយទិញបន្ថែម ប៉ុន្តែមិនទាន់ពេញល្អទេ។ អាហ្នឹងមានបំណងថា រុញឡានឲ្យទៅជ្រកត្រង់ហ្នឹងទាំងអស់ ហើយឲ្យគាត់អញ្ជើញដើរចូលមកទទេតែម្ដង មិនបាច់ឲ្យចូលទាំងឡានៗមកទេ»។
ប្រភពពីឆ្មាំយាមបូជនីយដ្ឋាន និងលោក ម៉ៅ សោភ័ណ្ឌ ឲ្យដឹងស្រដៀងគ្នាថា នៅក្នុងឆ្នាំ២០១៥ មានទាំងភ្ញៀវជាតិ និងអន្តរជាតិច្រើនកុះករចូលគោរពបូជា ហើយបានបរិច្ចាគធនធានដែលខ្លួនមានគ្រប់ៗគ្នាដែលមិនធ្លាប់មានពីមុនមក។ ប៉ុន្តែភ្ញៀវទាំងនោះភាគច្រើនយល់ដឹងតិចតួច និងខ្លះមិនដឹងតែម្ដងពីប្រវត្តិសាស្ត្រទាក់ទងនឹងឧកញ៉ា ឃ្លាំង មឿង ដែលជាមេទ័ពដ៏ល្បីល្បាញកាលពីសម័យលង្វែក។
ទាក់ទងនឹងភាពខ្វះខាតនៃការយល់ដឹងរបស់ពលរដ្ឋខ្មែរ និងភ្ញៀវបរទេសពីប្រវត្តិឧកញ៉ា ឃ្លាំង មឿង នេះ ប្រធានគណៈកម្មការគ្រប់គ្រងបូជនីយដ្ឋានលោក ម៉ៅ សោភ័ណ្ឌ មានគំនិតបោះពុម្ពកូនសៀវភៅសង្ខេបយ៉ាងខ្លីចេញពីឯកសារមហាបុរសខ្មែរ ដើម្បីលក់ក្នុងតម្លៃថោក ឬចែកជូនភ្ញៀវនៅថ្ងៃអនាគត។
លោកថា ភ្ញៀវតិចណាស់បានសួរលោកអំពីប្រវត្តិសាស្ត្រនេះ និងខ្លះមិនសួរហើយនិយាយតាមគ្នាមិនត្រឹមត្រូវទៅតាមប្រវត្តិសាស្ត្រ៖ «យើងចង់បានឯកសារដែលនិយាយតែពលិកម្មជីវិតនៅត្រង់ហ្នឹងរបស់លោកឧកញ៉ា ឃ្លាំង មឿង ទេ យើងមិននិយាយអីវែងឆ្ងាយដូចមហាបុរសខ្មែរទេ! អ៊ីចឹងយើងចង់និយាយតែចំណុចលោកតា មឿង បានបូជាជីវិតត្រង់ហ្នឹងដោយសារអី? គឺដោយសារតែព្រះអង្គ ច័ន្ទរាជា ប្រើឲ្យគាត់ទប់ទល់ជាមួយទ័ពខ្មាំងទៅរួចមិនរួច? តែលោកតាមឿង មើលទៅអត់រួចទេ បានគាត់សុំបូជាជីវិត ដើម្បីកេណ្ឌទ័ពខ្មោចជួយវាយគាត់ (ព្រះអង្គច័ន្ទរាជា)»។
ត្បិតបូជនីយដ្ឋានឧកញ៉ា ឃ្លាំង មឿង ឋិតនៅក្រោមការគ្រប់គ្រងរបស់មន្ទីរវប្បធម៌ និងវិចិត្រសិល្បៈ ប៉ុន្តែប្រធានមន្ទីរទេសចរខេត្តពោធិ៍សាត់ លោក សំ ឃីម បញ្ជាក់ថា ខាងលោកបានគ្រប់គ្រងតួលេខភ្ញៀវទេសចរដោយប្រយោលនៅទីនោះ។ លោកថា ទីសក្ការបូជាឧកញ៉ា ឃ្លាំង មឿង គឺជាទិសដៅរបស់ភ្ញៀវសម្រុកទៅបន់ស្រន់ច្រើន ដូចជានៅតាមរមណីយដ្ឋានសំខាន់ៗដែលមានក្នុងខេត្តដែរ។
លោក សំ ឃីម រំលឹកថា កាលពីឆ្នាំ២០០៨ នៅគ្រាដែលប្រទេសកម្ពុជា មានបញ្ហាព្រំដែនជាមួយប្រទេសថៃ គេបានធ្វើពិធីឡើងអ្នកតា ឃ្លាំង មឿង ហើយកាលណោះមានភ្ញៀវច្រើនណាស់បានចូលរួម។ លោកថា បច្ចុប្បន្នទាំងភ្ញៀវជាតិ និងអន្តរជាតិ គិតជាមធ្យមក្នុងមួយខែមានចំនួន ១ម៉ឺន ៦ពាន់នាក់ ដែលបានចូលទៅលេង ឬបន់ស្រន់នៅទីសក្ការបូជាឧកញ៉ា ឃ្លាំង មឿង៖ «កន្លែងហ្នឹង (បូជនីយដ្ឋានឧកញ៉ា ឃ្លាំង មឿង) មានសក្ដានុពលល្អប្រសើរជាងកន្លែងណាទាំងអស់ ព្រោះកន្លែងហ្នឹងមានមានអប្បិយជំនឿមួយរបស់ប្រជាពលរដ្ឋខ្មែរ ហើយភ្ញៀវមានអត់ដាច់ទេ មានជាអចិន្ត្រៃយ៍»។
កំពុងអង្គុយផ្អែកសសរនៅជ្រុងម្ខាងនៃទីសក្ការបូជារបស់អ្នកតា មឿង ក្នុងទឹកមុខស្រគត់ស្រគំ គឺអ្នកស្រី ជា ចាត មានប្រសាសន៍ថា រូបគាត់មានកំណើតកើតជានៅក្បែរទីសក្ការបូជារបស់អ្នកតា ឃ្លាំង មឿង ប៉ុន្តែរូបគាត់ទើបស្ម័គ្រចិត្តចូលមកជួយថែរក្សាបូជនីយដ្ឋានក្នុងវ័យ ៧៥ឆ្នាំនេះទេ។
អ្នកស្រីថា ត្បិតរូបគាត់ទើបមករក្សាបូជនីយដ្ឋាន តែគាត់មានជំនឿយូរមកហើយដោយអ្នកស្រុកភូមិបន់ស្រន់អ្វីសម្រេចដូចបំណង៖ «ភ្ញៀវច្រើនណាស់កូនអើយ! ប៉ុន្តែមិនបានគិតថា មានប៉ុន្មានអីប៉ុន្មានទេ តែគេចុះឡើងមកគគ្រឹកគគ្រេងវាស់ៗល្ងាចហ្នឹង។ គេមកបន់ស្រន់សូមសេចក្ដីសុខ ខ្លះទៅបន់បានសម្រេចការងារអីមួយអ៊ីចឹងគេយកដង្វាយមកលាមាត់លាក»។
បូជនីយដ្ឋានឧកញ៉ា ឃ្លាំង មឿង ឋិតនៅភូមិកំពែងស្វាយ ឃុំស្នាមព្រះ ស្រុកបាកាន ចម្ងាយប្រមាណ ២គីឡូម៉ែត្រពីក្រុងពោធិ៍សាត់ ត្រូវបានពលរដ្ឋ និងអាជ្ញាធរខ្លះក្នុងខេត្ត ផ្ដល់កិត្តិនាមដ៏អស្ចារ្យចំពោះអ្នកតា មឿង ដោយពួកគាត់មានជំនឿ។ បច្ចុប្បន្នមានយាយតាប្រមាណ ១០នាក់ បានបូជាកម្លាំងកាយសម្អាតបរិវេណបូជនីយដ្ឋាន ព្រមទាំងបម្រើសេវាកម្មលក់ទានធូបជូនភ្ញៀវ។ ចាស់ៗទាំងនេះបានទេយ្យទានខ្លះពីសប្បុរសជនហូរហែដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។