ប្រជាពលរដ្ឋនៅក្នុងស្រុកស្នួល ខេត្តក្រចេះ បារម្ភពីសុវត្ថិភាព និងសន្តិសុខ បន្ទាប់ពីមានការផ្ទុះអាវុធមួយប្រាវរវាងឈ្មួញដឹកឈើប្រណីត និងអាជ្ញាធរជំនាញដែលចុះបង្ក្រាបបទល្មើសនៅចំណុចឃុំស្វាយជ្រះ កាលពីយប់ថ្ងៃ២៤ កក្កដា បណ្តាលឱ្យស្ត្រីម្នាក់រងរបួស។ ព្រះរាជអាជ្ញាបញ្ជាក់ថា ការបាញ់នោះគឺចេញពីក្រុមឈ្មួញឈើមកលើសមត្ថកិច្ច ហើយខ្ទាតគ្រាប់ត្រូវប្រជាពលរដ្ឋ។
ប្រជាពលរដ្ឋនៅឃុំស្វាយជ្រះ ស្រុកស្នួល ខេត្តក្រចេះ ម្នាក់ ថ្លែងក្នុងលក្ខខណ្ឌមិនឱ្យបញ្ចេញឈ្មោះឱ្យដឹងថា លោកបារម្ភទៅនឹងសុវត្ថភាពផ្ទាល់ខ្លួន និងក្រុមគ្រួសារ ដោយសារពេលកន្លងទៅថ្មីៗនេះ គឺមានករណីបាញ់បោះជាច្រើនបានកើតឡើងរវាងឈ្មួញឈើនិងសមត្ថកិច្ច ដែលថែមទាំងបណ្តាលឱ្យប្រជាពលរដ្ឋមិនដឹងអីត្រូវរងគ្រោះដែរនោះ។
ជាក់ស្តែងនៅយប់ថ្ងៃទី២៤ កក្កដា គឺមានការផ្ទុះអាវុធរវាងសមត្ថកិច្ចនិងឈ្មួញឈើប្រណីតដែលបណ្តាលឱ្យស្ត្រីម្នាក់របួស៖ «វាបាញ់ពីហ្នឹងទៅប្លាតទៅត្រូវម្ចាស់ផ្ទះគេហ្នឹង ទើបកូនមួយ ដំបូង ត្រូវកូនបៅនៅម៉ោង ១២កន្លះយប់ហ្នឹង ដល់ពេលបាញ់ហើយក៏គេបិទមាត់ឈឹង អត់មាននរណារកអ្នកដៃដល់ អ្នកបាញ់ហ្នឹងអត់ឃើញ»។
ប្រភពដដែលបន្តថា កន្លងមកក៏ធ្លាប់មានករណីផ្ទុះអាវុធកើតមានជាញឹកញាប់ គឺនៅពេលដែលឈ្មួញឈើប្រណីត ឬអ្នកដឹកជន្លង់ម្រេច មិនបានបង់ប្រាក់ជូនមន្រ្តីសមត្ថកិច្ចទាំងនោះ គឺត្រូវបានសមត្ថកិច្ចជិះតាម ឬបាញ់គំរាមតែម្តង។ ប្រជាពលរដ្ឋដដែលបារម្ភថា ប្រសិនបើករណីនេះនៅកើតមានឡើងទៀតនោះ វានឹងបង្កការលំបាកដល់ការធ្វើដំណើររបស់ប្រជាពលរដ្ឋនៅពេលយប់ប្រលប់មិនខានឡើយ។
អភិបាលស្រុកស្នួល លោក គង់ គឹមនី មានប្រសាសន៍ថា បញ្ហានេះលោកក៏បានស្នើទៅព្រះរាជអាជ្ញាខេត្តក្រចេះ និងមន្ត្រីជំនាញ ឱ្យធ្វើយ៉ាងម៉េចបញ្ចៀសនូវការផ្ទុះអាវុធនានានៅកន្លែងដែលប្រជាពលរដ្ឋរស់នៅនិងតាមផ្លូវសាធារណៈជាដើម «មើលទៅកុំឱ្យមានប្រជាពលរដ្ឋណា៎! ឱ្យឆ្ងាយពីប្រជាពលរដ្ឋបន្តិច កុំឱ្យប្រជាពលរដ្ឋមានការភ័យខ្លាច។ ការបង្ក្រាបវាតែងតែមានមានជះទៅជះមក ប៉ះទៅប៉ះមកហើយ។ អ៊ីចឹងខ្ញុំក៏បានទាក់ទងទៅគាត់ហើយ ហើយលោកអភិបាលខេត្តក៏បានសម្របសម្រួលបញ្ហាហ្នឹងហើយ ដើម្បីកុំឱ្យបងប្អូនភិតភ័យតទៅទៀត»។
ព្រះរាជអាជ្ញាអមសាលាដំបូងខេត្តក្រចេះ ដែលទើបតែផ្លាស់មកពីខេត្តសៀមរាប បានប្រហែល ២ខែ លោក ទី សុវិនថាល់ មានប្រសាសន៍ថា ការផ្ទុះអាវុធដែលបណ្តាលឱ្យស្ត្រីម្នាក់រងរបួសនោះ គឺកើតចេញពីក្រុមឈ្មួញដឹកឈើខុសច្បាប់ដែលបានបាញ់សំដៅមកសមត្ថកិច្ច ហើយប្លាតគ្រាប់ត្រូវប្រជាពលរដ្ឋនៅក្បែរនោះ។
លោកបន្តថា សមត្ថកិច្ចព្យាយាមមិនឱ្យតបតនោះទេ ប៉ុន្តែជនល្មើសគំរាមថា នឹងទៅហៅគ្នាបន្ថែមទៀតនោះ ក៏ខាងសមត្ថកិច្ចបាញ់ឡើងលើដើម្បីជាសញ្ញាហៅកម្លាំងបន្ថែមនោះដែរ៖ «ចំពោះការបាញ់ហ្នឹងផុសចេញពីការទប់កំហឹងមិនបានរបស់បុគ្គលសមត្ថកិច្ច។ ចំពោះខ្ញុំអត់បញ្ជាដាច់ខាត គឺខ្ញុំមិនបញ្ជាឱ្យបាញ់ទេ តស៊ូអត់ធ្មត់លុះត្រាដល់កម្រិតយើង ធ្វើឱ្យគ្នាយើងរបួស អាហ្នឹងបានតតាំងហើយ»។
លោកអះអាងថា អ្នកដែលបាញ់នោះ គឺជាអ្នករកស៊ីឈើដុះស្លែម្នាក់នៅខេត្តក្រចេះ ដែលមានរហស្សនាមថា ធីបាញ់ ជិះរថយន្តឡិចស៊ិស ៤៧០ ពណ៌ខ្មៅ ដែលបានរត់គេចខ្លួនបាត់ទៅ រីឯមនុស្សពីរនាក់អមដោយរថយន្តពីរគ្រឿង រួមនឹងឈើផងនោះ ត្រូវសមត្ថកិច្ចចាប់បញ្ជូនទៅឱ្យខាងមន្ត្រីជំនាញចាត់ការតាមនីតិវិធី។ ចំណែកស្ត្រីដែលរងរបួស គឺសមត្ថកិច្ចបានបញ្ជូនទៅព្យាបាលនៅមន្ទីរពេទ្យខេត្តហើយ។
យ៉ាងណាក៏ដោយ ប្រជាពលរដ្ឋនៅខេត្តក្រចេះ សុំអំពាវនាវដល់រាជរដ្ឋាភិបាលធ្វើយ៉ាងណាលុបបំបាត់ឱ្យខាងតែបាននូវរាល់ករណីបាញ់បោះពីសំណាក់អ្នកមានអំណាច ឬជនទុច្ចរិតឱ្យបាន ពិសេសស្រាវជ្រាវរកប្រភពអាវុធដែលឈ្មួញទាំងនោះបានប្រើប្រាស់ហើយសមត្ថកិច្ចគប្បីប្រើប្រាស់អាវុធរបស់ខ្លួនឱ្យបានត្រឹមត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។