ប្រជាពលរដ្ឋនៅឃុំដំរីផុង ស្រុកឆ្លូង ខេត្តក្រចេះ បានដាក់ពាក្យប្ដឹងប្រជាការពារភូមិតាំងពីខែមេសា ឆ្នាំ២០១៤ ពីបទប្រើប្រាស់កាំភ្លើងខុសច្បាប់បាញ់មកលើកូនគាត់ បណ្ដាលឱ្យរបួស ប៉ុន្តែតុលាការមិនទាន់ដាក់ទោសលើជនល្មើសនៅឡើយ។ ចំណែកមន្ត្រីតុលាការសាលាដំបូងខេត្តក្រចេះ បញ្ជាក់ថា សំណុំរឿងមួយនេះមានភាពស្មុគស្មាញ។ ដូចនេះ តុលាការត្រូវការស៊ើបអង្កេតបន្តទៀត ជុំវិញបញ្ហាមួយនេះ។
ប្រជាពលរដ្ឋនៅឃុំដំរីផុង ស្រុកឆ្លូង ខេត្តក្រចេះ ជាដើមបណ្ដឹងនៅតែរង់ចាំចំណាត់ការរបស់តុលាការ ក្នុងការសម្រេចចំពោះពាក្យបណ្ដឹងរបស់គាត់ ដែលបានដាក់ចូលសាលាដំបូងខេត្តក្រចេះ កាលពីចុងខែមេសា ឆ្នាំ២០១៤។ ពាក្យបណ្ដឹងនោះ គឺប្ដឹងកងការពារភូមិម្នាក់ និងប៉ូលិសប៉ុស្តិ៍ ពីបទយកកាំភ្លើងបាញ់កូនប្រុសខ្លួនចំនួនពីរគ្រាប់កាលពីខែមេសា។
ប្រជាពលរដ្ឋម្នាក់រស់នៅភូមិបុស្ស ឃុំដំរីផុង អ្នកស្រី បួន វ៉េន ឱ្យដឹងថា អ្នកស្រីបានរង់ចាំមើលចំណាត់ការរបស់តុលាការជាយូរមកហើយ ចំពោះករណីបាញ់កូនប្រុសអ្នកស្រី ប៉ុន្តែមកដល់ពេលនេះ មិនទាន់មានលទ្ធផលអ្វីសម្រាប់អ្នកស្រីនៅឡើយ។ អ្នកស្រីបន្តថា កាលពីថ្ងៃទី១៧ មេសា ឆ្នាំ២០១៤ ឃើញប៉ូលិសប៉ុស្តិ៍ និងប្រជាការពារភូមិ បានចាប់កូនប្រុសអ្នកស្រី ដោយចោទប្រកាន់ថា បានបង្កការរំខានដល់ការរាំរែកមួយក្នុងវត្ត នៅឃុំកំពង់ដំរី។ ខណៈកំពុងចាប់កូនអ្នកស្រី ឈ្មោះ ផាន សុខ ក៏មានកូនប្រុសអ្នកស្រីម្នាក់ឈ្មោះ ផាន ផល ត្រូវជាប្អូន បានចូលទៅជួយបងប្រុស ក៏ត្រូវបានប្រជាការពារភូមិ លោក យន់ សំអូន ទាញកាំភ្លើងពីប៉ូលិសប៉ុស្តិ៍ មកបាញ់ចំនួនបីគ្រាប់ គឺមួយគ្រាប់បាញ់បង្អើល និងពីរគ្រាប់ទៀត គឺត្រូវចំជើងកូនរបស់អ្នកស្រី។
អ្នកស្រី និងគ្រួសារ នៅតែមានការភ័យខ្លាចចំពោះហេតុការណ៍ដែលបានកើតឡើង ពីព្រោះមកដល់ពេលនេះ ជនប្រព្រឹត្តិបទល្មើសមិនទាន់ត្រូវបានចាប់ខ្លួន ឬចាត់ការតាមផ្លូវច្បាប់យ៉ាងណានោះទេ៖ «កូនខ្ញុំទៅបុណ្យមែន ប៉ុន្តែមិនទាន់មានវ៉ៃកាប់ចាក់គ្នានោះទេ ខ្ញុំទៅដល់សួរអស់ហើយ អ្នកស្រុកគេឯណោះថាមិនទាន់មានវ៉ៃគ្នាទេ តើហេតុអ្វីបានជាប៉ូលិស និងអា សំអូន ស្រុកខ្ញុំនេះមកព័ទ្ធបាញ់ដូច្នោះ។ ដូចប្រើស! អ្នកស្រីវាហួសចិត្តពេកហើយលោករាល់ថ្ងៃនេះ»។
ប្រភពដដែលបញ្ជាក់ថា ក្នុងពាក្យបណ្ដឹង គឺបានប្ដឹងទៅមេប៉ុស្តិ៍រដ្ឋបាលឃុំដំរីផុង និងប្រជាការពារភូមិរូបនោះ ហើយក៏បានទាមទារជំងឺចិត្ត ព្រមទាំងថ្លៃព្យាបាលរបួសចំនួន ២ម៉ឺនដុល្លារ និងទាមទារឱ្យតុលាការចាប់ជនដៃដល់មកផ្ដន្ទាទោសតាមផ្លូវច្បាប់។
វិទ្យុអាស៊ីសេរី មិនទាន់អាចទាក់ទងមេប៉ុស្តិ៍រដ្ឋបាលឃុំដំរីផុង និងប្រជាការពារភូមិនោះបានទេ នៅថ្ងៃទី៣០ ខែមិថុនា។
ទាក់ទងនឹងបញ្ហានេះ ព្រះរាជអាជ្ញារងអមសាលាដំបូងខេត្តក្រចេះ លោក ហាក់ ហ៊ាន់ មានប្រសាសន៍នៅថ្ងៃទី៣០ មិថុនា ថា ករណីនេះ គឺមានភាពពិបាកបន្តិចត្រង់ថា ដើមបណ្ដឹងមានច្រើន រីឯជនសង្ស័យក៏មានច្រើន ដូចនេះ ខាងតុលាការ គឺត្រូវការស៊ើបអង្កេតបន្តទៀត ដើម្បីឱ្យកាន់តែច្បាស់៖ «អ៊ីចឹងគាត់បានដាក់ពាក្យបណ្ដឹង ហើយគាត់ក៏បានរាយការណ៍មកប៉ុស្តិ៍ ហើយប៉ុស្តិ៍ក៏ទៅដោយមានប្រជាការពារភូមិទៅជាមួយផង។ ដល់ពេលចុះទៅឃើញស្ថានភាពហ្នឹង មិនស្រួល គាត់ក៏ហៅអ្នកដែលគេប្ដឹងហ្នឹង។ ពេលហៅមកក៏មានបញ្ហាប្រទ្រូសប្រទ្រាស់គ្នាទៅខាងណោះទៅវ៉ៃប៉ូលិស ខាងបីនាក់ដែលលោកប្ដឹងនោះណា ហើយប៉ូលិសប៉ុស្តិ៍គាត់ក៏ក្រវេញកាំភ្លើងទៅ បានប្រជាការពារភូមិ។ ដល់បានកាំភ្លើងក៏បាញ់ មិនមែនបាញ់ត្រូវប្រជាពលរដ្ឋភ្លាមទេ គឺនីតិវិធីដែលគាត់បាញ់ហ្នឹង គឺបាញ់ឡើងលើ ហើយក៏គាត់បាញ់ផ្ចុចដី ឃើញត្រូវប្រអប់ជើងមួយគ្រាប់ និងកំភួនជើង អាហ្នឹងហើយដែលខ្ញុំចង់ស៊ើបឱ្យច្បាស់លាស់»។
លោកបន្ថែមទៀតថា កន្លងមកខាងព្រះរាជអាជ្ញាបានកោះហៅដើមបណ្ដឹង និងជនសង្ស័យចូលបំភ្លឺចំនួនពីរដងរួចមកហើយ ប៉ុន្តែខាងភាគីជនសង្ស័យមិនទាន់បានចូលនោះទ ហើយព្រះរាជអាជ្ញាគ្រោងនឹងកោះហៅជាថ្មីម្តងទៀត។ លោកបញ្ជាក់ថា ប្រសិនបើជនសង្ស័យនៅតែមិនចូលទៀត ខាងព្រះរាជអាជ្ញានឹងចាត់ឱ្យចៅក្រមចេញស៊ើបអង្កេតបញ្ហានេះ ដើម្បីដាក់បន្ទុក ឬដោះបន្ទុកយ៉ាងណានោះ គឺធ្វើតាមនីតិវិធី។
មន្ត្រីផ្នែកអង្កេតនៃសមាគមន៍ការពារសិទ្ធិមនុស្សអាដហុក (ADHOC) នៅខេត្តក្រចេះ លោក ហេង ភារៈ យល់ថា ករណីនេះ គឺខាងជនរងគ្រោះបានដាក់ពាក្យបណ្ដឹងយូរមកហើយ ចំណែកឯភស្តុតាង និងសាក្សី ជនរងគ្រោះក៏មានគ្រប់គ្រាន់សម្រាប់ដាក់បន្ទុកជនសង្ស័យហើយដែរ។ ដូចនេះ ខាងតុលាការគប្បីពន្លឿននីតិវិធីឱ្យបានឆាប់ ចំពោះបញ្ហានេះ៖ «យើងឃើញថា មានតាំងពីរូបថត មានតាំងពីជនរងគ្រោះរងរបួស ហើយសាក្សីជាច្រើនបានចង្អុលបង្ហាញថា កាំភ្លើងហ្នឹងជាកាំភ្លើងរបស់មេប៉ុស្តិ៍ ហើយមានសន្តិសុខភូមិហ្នឹងជាអ្នកជនដៃដល់។ អ៊ីចឹងអ្វីដែលយើងរកឃើញនេះ ព្រះរាជអាជ្ញាគួរតែមានការពិចារណាពន្លឿននីតិវិធីរឿងហ្នឹង ព្រោះថា មានភស្តុតាងគ្រប់គ្រាន់ ហើយនិងវាមិនចាំបាច់ទៅរកអីវែងឆ្ងាយទៀតទេ»។
លោកបញ្ជាក់ថា ប្រសិនបើតុលាការនៅតែពន្យារនីតិវិធីចំពោះបញ្ហានេះ ក្រោមហេតុផលថាដើម្បីធ្វើការស៊ើបអង្កេតទៀតនោះ វាអាចធ្វើឱ្យជនរងគ្រោះមានការប៉ះទង្គិចផ្លូវចិត្តរបស់ពួកគាត់កាន់តែធ្ងន់ធ្ងរ និងប៉ះពាល់ដល់ជីវភាពរស់នៅរបស់ពួកគាត់ទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។