តំណាងប្រជាពលរដ្ឋ ៥គ្រួសារ នៅឃុំស្វាយជ្រះ ស្រុកស្នួល ខេត្តក្រចេះ មានជម្លោះដីធ្លីជាមួយក្រុមហ៊ុន កាសូទីន (Casotin) ចោទប្រកាន់អាជ្ញាធរខេត្ត ថាពុំបានអនុវត្តតាមអនុសាសន៍ណែនាំរបស់នាយករដ្ឋមន្ត្រីកាលពីពេលកន្លងទៅ ដែលថាឱ្យដោះស្រាយបញ្ហាដីធ្លីជូនពលរដ្ឋដែលប៉ះពាល់ជាមួយក្រុមហ៊ុន។
ចំណែកអាជ្ញាធរខេត្តវិញបញ្ជាក់ថា ខាងខេត្តកំពុងប្រជុំបច្ចេកទេស ដើម្បីរៀបចំដោះស្រាយបញ្ហានេះទៅតាមនីតិវិធី និងត្រូវពិនិត្យដល់ទីតាំងដីម្តងទៀត មុនធ្វើការស្នើសុំទៅរដ្ឋាភិបាល។
តំណាងពលរដ្ឋម្នាក់រស់នៅឃុំស្វាយជ្រះ លោក ថុន មករា ឱ្យដឹងថា កាលពីថ្ងៃទី១ កញ្ញា អាជ្ញាធរខេត្តបានកោះហៅពួកគាត់ ៥គ្រួសារ ប្រជុំដោះស្រាយបញ្ហាដីធ្លីប្រមាណជាង ២០ហិកតារ ដែលមានបញ្ហាជាមួយក្រុមហ៊ុន កាសូទីន ប៉ុន្តែការដោះស្រាយនោះមិនបានលទ្ធផលអ្វីឡើយ ក្រៅពីប្រាប់ប្រជាពលរដ្ឋឱ្យព្រមទទួលយកគោលនយោបាយជាប្រាក់ពីក្រុមហ៊ុនចំនួន ៤០០ដុល្លារ ក្នុងដីមួយហិកតារ។ លោកបន្តថា អាជ្ញាធរធ្វើដូចនេះ គឺខុសពីការណែនាំរបស់លោកនាយករដ្ឋមន្ត្រី ហ៊ុន សែន ដែលតម្រូវឱ្យកាត់ផ្ទៃដីដែលប៉ះពាល់ជូនប្រជាពលរដ្ឋ។
លោក ថុន មករា៖ «ខ្ញុំមានឯកសារគ្រប់គ្រាន់បញ្ជាក់ថា ខ្ញុំរស់នៅមុនបទបញ្ជា០១ ព្រោះអីខ្ញុំមានឯកសារមានប្លង់ដែលនិស្សិតវាស់វែងមុនបទបញ្ជា០១។ តែខាងអាជ្ញាធរខេត្តហ្នឹង គេបានកាត់ទិន្នន័យផ្ទៃដីរបស់ខ្ញុំចោល។ ខ្ញុំទាមទារទិន្នន័យដីខ្ញុំមកវិញ។ គេបានចេញប្លង់ឱ្យខ្ញុំ ប៉ុន្តែចេញមិនបានគ្រប់ចំនួនទេ។ ដីពួកខ្ញុំ ៥គ្រួសារហ្នឹង ក្នុងមួយគ្រួសារបាន ៥ហិកតារ គេចេញបានតែ ១ហិកតារជាងទេក្នុងមួយគ្រួសារ»។
ប្រភពដដែលបន្តថា អាជ្ញាធរខេត្តមិនគោរពតាមការណែនាំរបស់លោកនាយករដ្ឋមន្ត្រីនោះហើយ ដែលធ្វើឱ្យប្រសាសន៍ថ្នាក់ដឹកនាំប្រែក្លាយជាគ្មានប្រសិទ្ធភាព។
ឆ្លើយតបនឹងការលើកឡើងនេះ អភិបាលរងខេត្តក្រចេះ ទទួលបន្ទុកដោះស្រាយបញ្ហាដីធ្លី លោក ខ័ណ្ឌ ចំណាន មានប្រសាសន៍ថា អាជ្ញាធរធ្លាប់ចេញប្លង់កម្មសិទ្ធិស្របច្បាប់ម្តងហើយនៅលើដីដែលពួកគាត់អាស្រ័យផល ប៉ុន្តែដីដែលពួកគាត់ទាមទារនោះ គឺជាដីដែលពួកគាត់កាន់កាប់ក្រោយបទបញ្ជា០១ របស់រដ្ឋាភិបាល ទើបមិនមានក្នុងប្លង់។ ចំណែករឿងដែលអាជ្ញាធរលើកឡើងពីបញ្ហាគោលនយោបាយជាសំណង គឺដោយសារតែកន្លងមក ក្នុងចំណោមប្រជាពលរដ្ឋទាំងនោះ គឺមានអ្នកទទួលយកសំណងរួចហើយ។ ដូច្នេះ លោកគ្រាន់តែសួរបញ្ជាក់បន្ថែមលើបញ្ហានេះតែប៉ុណ្ណោះ។
លោក ខ័ណ្ឌ ចំណាន៖ «អ៊ីចឹងថ្ងៃហ្នឹងខាងភាគី លោក ថុន មករា ហ្នឹង គាត់បានទារគោលនយោបាយ ៤០០ដែរ ប៉ុន្តែគ្រាន់តែភាគីម្ខាងទៀតគាត់ថា គាត់ប្រុងតែឱ្យហើយ ប៉ុន្តែវាល្ងាច និងមិនមានលុយ ហើយដល់ពេលស្អែកឡើង គាត់ថាទៅរក តែរកអត់ឃើញ។ អ៊ីចឹងខ្ញុំគ្រាន់តែបញ្ជាក់ទេ បញ្ជាក់ដោយសារតែពាក់ព័ន្ធពីហ្នឹងមក ថាតើបន្តទៀតឬយ៉ាងម៉េច? ហើយបាន លោក ថុន មករា គាត់ថាគាត់លែងនិយាយពីរឿងគោលនយោបាយទៀតហើយ»។
លោកបន្ថែមថា អាជ្ញាធរមិនបានគេចវេស ឬពន្យារពេលក្នុងការដោះស្រាយនោះទេ ប៉ុន្តែដោយសារជាប់ដៃក្នុងការដោះស្រាយបញ្ហាដីធ្លីតំបន់ផ្សេងៗ។ តែយ៉ាងណា លោកបញ្ជាក់ថា បញ្ហានេះខាងអាជ្ញាធរខេត្តបានប្រជុំបច្ចេកទេស ហើយគ្រោងនឹងប្រជុំធ្វើការដោះស្រាយជាមួយប្រជាពលរដ្ឋនៅសប្ដាហ៍ក្រោយ។
ចំណែកប្រធានអង្គការសិទ្ធិមនុស្ស ដើម្បីតម្លាភាព និងសន្តិភាព និងជាប្រធានគណៈកម្មាធិការឯករាជ្យប្រឆាំងអើពុករលួយ អ្នកស្រី ម៉ម ស៊ីថា មានប្រសាសន៍ថា ករណីរឿងប្រជាពលរដ្ឋ ៥គ្រួសារ ក៏មិនខុសអីទៅនឹងរឿងប្រជាពលរដ្ឋជិត ៤០០គ្រួសារ នៅឃុំស្នួល នោះដែរ។ អ្នកស្រីបន្តថា ពេលនិស្សិតវាស់វែងហើយ ប៉ុន្តែបែរជាចេញចំនួនដីមិនគ្រប់លើប្លង់ទៅវិញ ដោយអះអាងថា ប៉ះពាល់លើក្រុមហ៊ុន កាសូទីន ក្រោយមកអាជ្ញាធរប្រាប់ថា ប៉ះពាល់លើដីរបស់រដ្ឋ ប៉ុន្តែចុងក្រោយ ដីពលរដ្ឋទាំង ៥គ្រួសារ បែរជាប៉ះពាល់ជាមួយភាគីឯកជនដែលជាអ្នកមានទៅវិញ។ អ្នកស្រីបន្តថា រឿងនេះ អាជ្ញាធរខេត្តតែងតែមានលេសក្នុងការដោះស្រាយជូនពួកគាត់ ក្រោមហេតុផលមិនចេះមិនចេះហើយ។
អ្នកស្រី ម៉ម ស៊ីថា៖ «អ៊ីចឹងការដែលមិនដោះស្រាយទៅតាមអនុសាសន៍ គឺជារឿងរបស់ខេត្ត ដោយគេយកលេសអ៊ីចេះលេសអ៊ីចុះ។ ចា៎! ខ្ញុំមើលទៅថាប្រហាក់ប្រហែលគ្នា ដោយគេអះអាងថា រឿងរបស់គាត់ គឺជារឿងរបស់ខេត្ត មិនពាក់ព័ន្ធទៅនឹងដីសាធារណៈរបស់រដ្ឋ តែវាពាក់ព័ន្ធទៅនឹងរឿងដីរបស់ខេត្ត។ អ៊ីចឹងការខេត្តដោះស្រាយ ដោះស្រាយយ៉ាងណា? យើងអត់បានដឹង ព្រោះវារឿងអះអាងរបស់គេ។ អូនណា៎!»។
អ្នកស្រីបញ្ជាក់ថា ប្រសិនបើអាជ្ញាធរនៅតែមិនមានឆន្ទៈក្នុងការដោះស្រាយជូនពលរដ្ឋទៀតនោះ មានន័យថា អាជ្ញាធរខេត្តកំពុងធ្វើឱ្យកើតមានបញ្ហាកាន់តែចម្រូងចម្រាសឡើងថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។