មន្ត្រីជាន់ខ្ពស់ក្រសួងមហាផ្ទៃ ក្រើនរំលឹកទៅដល់មន្ត្រីប៉ូលិសមូលដ្ឋាននៅទូទាំងប្រទេសឲ្យបន្តពង្រឹងសកម្មភាពការពារសន្តិសុខសុវត្ថិភាពតាមមូលដ្ឋានរៀងៗខ្លួន ឲ្យស្របតាមគោលនយោបាយភូមិឃុំមានសុវត្ថិភាពរបស់ប្រមុខរដ្ឋាភិបាលដាក់ចេញ។
ការក្រើនរំលឹកនេះ កើតមាននៅពេលមានការប្រកួតបាល់ទាត់ពិភពលោកកំពុងដំណើរការ ហើយត្រូវប្រជាពលរដ្ឋផ្ដល់ព័ត៌មានមកថា អំពើចោរកម្មឆក់ប្លន់កើតមានជាបន្តបន្ទាប់នៅតាមមូលដ្ឋានមួយចំនួន។
លោក ខៀវ សុភ័គ មន្ត្រីនាំពាក្យក្រសួងមហាផ្ទៃ បានព្រមានចាត់វិធានការ ឬដាក់ទោសទណ្ឌទៅដល់មន្ត្រីក្រោមឱវាទនៅតាមមូលដ្ឋាននានា ពិសេសប៉ូលិសតាមប៉ុស្តិ៍រដ្ឋបាលមួយចំនួនក្នុងរាជធានីភ្នំពេញ ដែលបានប្រព្រឹត្តិ ឬទទួលយកសំណូកលុយកាក់ ពុករលួយពីម្ចាស់បនល្បែងបៀអាប៉ោងជល់មាន់ ឬទីតាំងចាក់ភ្នាល់បាល់ និងទីកន្លែងចាក់កន្ទុយលេខជាដើម។
លោកបន្តថា ប៉ូលិសនៅតាមមូលដ្ឋាននានា ត្រូវពង្រឹងនិងអនុវត្តគោលនយោបាយភូមិឃុំមានសុវត្ថិភាព ដែលលោកនាយករដ្ឋមន្ត្រី ហ៊ុន សែន ដាក់ឲ្យអនុវត្តឲ្យមានប្រសិទ្ធភាពខ្ពស់ ពិសេសនៅក្នុងរដូវកាលប្រកួតបាល់ទាត់ពិភពលោកកំពុងដំណើរការ។ ជាងនេះ លោក ខៀវ សុភ័គ ព្រមានថា មន្ត្រីប៉ូលិសជនទាំងឡាយណាដែលរកឃើញថាឃុបឃិត និងអនុវត្តផ្ទុយពីគោនយោបាយភូមិឃុំមានសុវត្ថិភាព គឺបានប្រឆាំងសកម្មភាពអភិវឌ្ឍន៍សង្គមជាតិរបស់ប្រមុខរដ្ឋាភិបាល។
លោក ខៀវ សុភ័គ៖ «ការអនុវត្តច្បាប់ភូមិឃុំមានសុវត្ថិភាព គឺមានចែងពីចំណុចមួយថា ភូមិឃុំគ្មានល្បែងល្បែងស៊ីសង។ ដូច្នេះការអនុវត្តគោលនយោបាយភូមិឃុំមានសុវត្ថិភាពហ្នឹង គឺយើងត្រូវអនុវត្តជាប្រចាំដូចភ្លៀងរលឹមអ៊ីចឹង។ មិនមែនយើងអនុវត្តតែមួយជំហានហើយ ទាល់តែមានថ្នាក់ដឹកនាំក្រសួង ឬរដ្ឋាភិបាលលោកបញ្ជាទៅទើបកម្រើកដូចភ្លើងចំបើងនោះទេ។ ដូច្នេះសូមអំពាវនាវឲ្យសមត្ថកិច្ចទាំងអស់យកចិត្តទុកដាក់ និងប្រកាន់ខ្ជាប់អនុវត្តគោលនយោបាយភូមិឃុំមានសុវត្ថិភាពនេះ ដើម្បីសេចក្ដីសុខសាន្តរបស់ប្រជាពលរដ្ឋយើង ពីព្រោះយើងដឹងទាំងអស់គ្នាហើយថា ប្រសិនបើភូមិឃុំណាមានល្បែងស៊ីសង វាអាចមានបញ្ហាកើតឡើងផ្សេងៗ ជាមានបញ្ហាសង្គមក្តីជាបញ្ហាបទល្មើសក្តី គឺមានការកើនឡើង»។
សារព្រមានរបស់មន្ត្រីជាន់ខ្ពស់ក្រសួងមហាផ្ទៃ ពេលនេះ បន្ទាប់ពីក្រុមប្រជាពលរដ្ឋនៅតាមមូលដ្ឋានមួយចំនួនក្នុងទីក្រុងភ្នំពេញ សម្ដែងពីកង្វល់និងផ្ដល់ព័ត៌មានមកថា បទល្មើសឆក់ប្លន់ និងចោរលួចគាស់ផ្ទះបានកើតមាននៅពេលរាត្រី ឬពេលថ្ងៃជាច្រើនករណីនៅតាមផ្លូវលំឆ្ងាយពីទីប្រជុំជន។
ក្រុមប្រជាពលរដ្ឋមានលំនៅឋានក្នុងសែនសុខ ខណ្ឌឫស្សីកែវ និងខណ្ឌដូនពេញ ជាដើម បានរអ៊ូរទាំថា ចោរឆក់ ឬចោរគាស់ផ្ទះជាដើម បានកើតមានស្ទើររៀងរាល់យប់ថ្ងៃ ហើយប៉ូលិសមូលដ្ឋានបង្ក្រាបមិនទាន់ពេលទេ។
បញ្ហានេះប្រជាពលរដ្ឋបានសំណូមពរដល់ថ្នាក់ដឹកនាំក្រសួងមហាផ្ទៃ ឲ្យដាក់បទបញ្ជាទៅប៉ូលិសតាមប៉ុស្តិ៍រដ្ឋបាលនានា ឲ្យបង្កើនសកម្មភាពចុះល្បាតឲ្យបានច្រើន ដើម្បីកាត់បន្ថយបទល្មើសចោរកម្មនៅថ្ងៃអនាគត។
ប្រជាពលរដ្ឋមានលំនៅឋានក្នុងខណ្ឌឫស្សីកែវ ក្រុងភ្នំពេញ ស្នើមិនបញ្ចេញឈ្មោះ បានសំណូមពរដល់ថ្នាក់ដឹកនាំក្រសួងមហាផ្ទៃ ឲ្យចុះបិទទៅតាំងបនល្បែងភ្នាល់ផ្សេងៗ ដែលម្ចាស់ទីតាំងឃុបឃិតគ្នាជាមួយប៉ូលិសប៉ុស្តិ៍មូលដ្ឋាន ជាថ្នូរផ្ដល់លុយកាក់ប្រចាំខែ ឬប្រចាំថ្ងៃ កំពុងធ្វើសកម្មភាពជារៀងរាល់ថ្ងៃឲ្យបានជាស្ថាពរ៖ «សំណូមពរដល់អាជ្ញាធរសមត្ថកិច្ចគ្រប់គ្រងតាមមូលដ្ឋានទាំងអស់ហ្នឹងជួយការពារប្រជាជនផង? ព្រោះអីឥឡូវមានចោរលួចគាស់ផ្ទះ ឆក់ និងប្លន់ច្រើនណាស់។ ចង់ឲ្យលុបបំបាត់ការលែងល្បែងភ្នាល់ ចាក់បាល់ ឬកន្លែងភ្នាល់។ ព្រោះបានកើតមានជាច្រើនកន្លែងណាស់ឥឡូវនេះ។ ដល់ពេលអ៊ីចឹងវាបង្កើតឲ្យមានចោរច្រើន ព្រោះមានអ្នកចាញ់ និងឈ្នះជាដើម»។
ទាក់ទិនបញ្ហានេះ មន្ត្រីប៉ូលិសក្រសួងមហាផ្ទៃ មិនបញ្ចេញឈ្មោះម្នាក់ឲ្យដឹងថា បទល្មើសភាគច្រើនដែលកើតមាននៅតាមមូលដ្ឋាន ត្រូវប៉ូលិសប៉ុស្តិ៍រដ្ឋបាលមូលដ្ឋានខ្លះ បានផ្អឹបសំណុំរឿងទុក មិនបញ្ជូនទៅថ្នាក់លើទេ។ លោកបន្តថា ព័ត៌មានដែលថ្នាក់លើទទួលពីមូលដ្ឋាន គឺមានសន្តិសុខសុវត្ថិភាពល្អជារហូត ដែលខុសពីការពិតជាក់ស្ដែងកើតមាននៅតាមមូលដ្ឋាន។
យ៉ាងណាក៏ដោយ លោក ខៀវ សុភ័គ មន្ត្រីនាំពាក្យក្រសួងមហាផ្ទៃ ព្រមានថា នឹងមិនអត់អោនចំពោះមន្ត្រីប៉ូលិសរូបណាដែលឃុបឃិត ឬនៅពីក្រោយខ្នងបង្កើតឲ្យមានបនល្បែងខុសច្បាប់នៅក្នុងមូលដ្ឋានខ្លួន ដោយគ្មានការទប់ស្កាត់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។