កម្មករសំណង់ម្នាក់ស្លាប់ និង ២នាក់ទៀតរបួសធ្ងន់ ក្នុងគ្រោះថ្នាក់បាក់អគារផ្សារត្រពាំងថ្លឹង ដែលគេកំពុងតែសាងសង់ ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ នៅព្រឹកថ្ងៃទី១៥ ខែកក្កដា។
សាក្សីនៅកន្លែងកើតហេតុ បានឲ្យដឹងថា កម្មករទាំងបីនាក់បានរងគ្រោះ ខណៈពួកគាត់កំពុងតែធ្វើការនៅជាន់ផ្ទាល់ដី ហើយត្រូវប្លង់សេដែលគេកំពុងតែចាក់បេតុងបាក់សង្កត់តែម្ដង។
កម្មករសំណង់ជាមួយគ្នា លោក សន ឡុក ថ្លែងថា ពេលគ្រោះថ្នាក់កើតឡើង រូបលោកកំពុងធ្វើការនៅផ្នែកខាងលើប្លង់សេដែលបាក់នោះ៖ «គាត់នៅខាងក្រោម ធ្លាក់មកសង្កត់ គ្រាន់តែថា ម្នាក់របួសស្រាលនៅខាងលើ គេឆាប់ទៅជួយទាន់។ គាស់យូរដែរទម្រាំយកបាន...។ ឥឡូវយកទៅពេទ្យហើយ។ បើរស់ក៏ពិបាកវេទនាដែរ»។
ចំណែកអ្នកលក់ម្ហូបអាហារនៅក្បែរកន្លែងកើតហេតុ លោកស្រី សុខ ហេង សម្ដែងការភិតភ័យ ព្រោះកូនលោកស្រីទើបតែចេញផុតពីក្រោមសំណង់នោះ មុនពេលគ្រោះថ្នាក់កើតឡើងបន្តិច។ លោកស្រីបន្ថែមថា អ្នកសាងសង់មិនបានដាក់បម្រាមមិនឲ្យឆ្លងកាត់អ្វីទេ៖ «អ្នកងាប់គេសែងចេញពីចំហៀង អាអ៊ិចកាយ។ បើអ្នកត្រូវរបួសមនុស្សកាយយកទេ បើអ្នកស្លាប់ហ្នឹងអាអ៊ិចកាយ...»។
ប្រធានការិយាល័យភូមិបាលខណ្ឌពោធិ៍សែនជ័យ លោក ប៊ិន ស៊ីនៀត ដែលបានចុះពិនិត្យកន្លែងគ្រោះថ្នាក់ មានប្រសាសន៍ថា សំណង់ផ្សារត្រពាំងថ្លឹង មានច្បាប់ ប៉ុន្តែការសាងសង់មិនបានធ្វើទៅតាមបទដ្ឋានបច្ចេកទេសនោះឡើយ៖ «ការរៀបចំជើងទម្របេតុងហ្នឹងអត់មានលក្ខណៈសមស្របទៅនឹងទម្របេតុង ហ្នឹង។ ទម្របេតុងហ្នឹងមិនមែនជាថ្នាលខាងលើដី បានន័យថា ដីសុទ្ធ គ្រាន់តែយកក្ដារមកដាក់ទប់ជន្ទល់ពីក្រោម អ៊ីចឹងវាធ្វើឲ្យទម្របេតុងខាងលើ មិនអាចទ្រខាងក្រោមបានទេ អ៊ីចឹងវាត្រូវតែធ្លាក់ហើយ»។
ទាក់ទងនឹងបញ្ហានេះ មន្ត្រីនៃមជ្ឈមណ្ឌលអប់រំច្បាប់សម្រាប់សហគមន៍ (CLEC) អ្នកស្រី ឆន សុខា ស្នើឲ្យក្រសួងការងារ និងស្ថាប័នពាក់ព័ន្ធ បើកការស៊ើបអង្កេតឲ្យបានហ្មត់ចត់៖ «...គួរតែមានការផ្ដន្ទាទោសអ្នក ទទួលខុសត្រូវ ឬនិយោជក ហើយក៏ជាការព្រមានទៅដល់ក្រុមហ៊ុនដទៃទៀត ថាមុននឹងធ្វើគួរតែមានការទទួលខុសត្រូវ ហើយធានាសុវត្ថិភាព។ ទាំងសំណង និងការផ្ដន្ទាទោស គឺត្រូវតែមាន»។
អ្នកស្រី ឆន សុខា មានប្រសាសន៍បន្ថែមថា គ្រោះថ្នាក់ការងារ ជាពិសេសក្នុងវិស័យសំណង់កើតមានជាបន្តបន្ទាប់ ហើយក្នុងរយៈពេលកន្លងទៅ ច្រើនតែមានការសម្របសម្រួលជាលុយកាក់ ជាជាងដំណោះស្រាយតាមនីតិវិធី។ ប្រការនេះ ធ្វើឲ្យជនរងគ្រោះ ជាពិសេសកម្មករមិនទទួលបានសំណងសមរម្យ ឬយុត្តិធម៌ឡើយ។
ពាក់ព័ន្ធនឹងបញ្ហាគ្រោះថ្នាក់ការងារនេះ មន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ បានចេញសេចក្ដីប្រកាសព័ត៌មាននៅថ្ងៃទី១៥ កក្កដា បញ្ជាក់ថា សំណង់អគារផ្សារដែលមាន លោក ទូច ប៊ុនធឿន និងអ្នកស្រី យ៉ង សុខា (ប្ដីប្រពន្ធ) ជាម្ចាស់ទទួលបានលិខិតអនុញ្ញាតសាងសង់ពីក្រសួងរៀបចំដែនដី នគរូបនីយកម្ម និងសំណង់ ចុះថ្ងៃទី២១ ខែមីនា ឆ្នាំ២០១៤ ដើម្បីបើកការដ្ឋានសាងសង់អគារផ្សារទំនើប។ លិខិតអនុញ្ញាតនោះ បានកំហិតឲ្យម្ចាស់សំណង់បំពេញកាតព្វកិច្ចមួយចំនួន ដើម្បីធានាសុវត្ថិភាព ក្នុងនោះមានការកំណត់ម្ចាស់សំណង់រកជួលជាងសំណង់ណាដែលទទួលបានអាជ្ញាប័ណ្ណ ប្រកបអាជីវកម្មពីក្រសួងរៀបចំដែនដី នគរូបនីយកម្ម និងសំណង់។
ទោះយ៉ាងណា សេចក្ដីប្រកាសព័ត៌មានមិនបានបញ្ជាក់ថា ក្រុមហ៊ុនសំណង់ផ្សារត្រពាំងថ្លឹង ជាក្រុមហ៊ុនប្រភេទណានោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។