អ្នកពាក់ព័ន្ធបានជួបប្រជុំគ្នា នៅថ្ងៃទី១៨ ធ្នូ ពីបញ្ហានេះ នឹងរកអំណះអំណាងមួយចំនួន ដើម្បីតទល់នឹងនិយោជកចំពោះការដំឡើងនេះ ដែលនឹងត្រូវលើកយកទៅធ្វើសេចក្ដីសម្រេចនៅចុងខែធ្នូ។
មន្ត្រីសហជីពដែលតំណាងឲ្យសំឡេងកម្មករក្នុងវិស័យកាត់ដេរ និងផលិតស្បែកជើង បានជួបជុំគ្នារកឃើញចំណុចសំខាន់៣ ដែលនឹងលើកទៅជជែកការពារជាមួយនិយោជកក្នុងពេលជួបគ្នាម្ដងទៀត ចរចាពីបច្ចេកទេសនៃការដំឡើងប្រាក់ឈ្នួលអប្បបរមាដល់កម្មករ នៅថ្ងៃទី២៤ ធ្នូ ខាងមុខ។
មន្ត្រីដោះស្រាយវិវាទនៃសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក ទៀង យូត ឲ្យដឹងនៅថ្ងៃទី១៨ ធ្នូ ថា សហភាពសហជីពធំៗចំនួន៨ ដែលជាគណៈកម្មការប្រឹក្សាការងារបានជួបជុំគ្នារកឃើញចំណុច៣ រួមមាន សម្រេចទាមទារប្រាក់ឈ្នួលចន្លោះពី ១៥៧ដុល្លារ ទៅ ១៧៧ដុល្លារ ចំណុចទី២នោះ គឺការសម្រេចយករូបមន្តទី៣ របស់ក្រសួងការងារបានដាក់ឲ្យ គឺដំឡើងប្រាក់ឈ្នួលអប្បបរមាឲ្យដល់កម្រិត ១៦០ដុល្លារ ក្នុងរយៈពេល ៥ឆ្នាំ និងយល់ស្របក្នុងការពិភាក្សាបន្តទៅលើអត្ថប្រយោជន៍បន្ថែមជារៀងរាល់ឆ្នាំ។ រីឯចំណុចទី៣នោះ គឺការដំឡើងប្រាក់ឈ្នួល ត្រូវដំឡើងឲ្យកម្មករទូទៅ ស្មើភាពគ្នាទាំងអស់ ដោយមិនបូកបញ្ចូលទៅលើប្រាក់ឈ្នួលថែមម៉ោង នឹងប្រាក់អត្ថប្រយោជន៍ផ្សេងៗ ដូចជា សោហ៊ុយធ្វើដំណើរ ថ្លៃបាយ ប្រាក់រង្វាន់ធ្វើការងារទៀងទាត់ឡើយ។
លោក ទៀង យូត បន្តថា ចំណុចទាំង ៣នេះ គឺជាចំណុចរួម១ដែលនឹងដាក់ចូលក្នុងរបៀបវារៈនៃកិច្ចប្រជុំសម្រេចថ្ងៃទី២៤ ហើយក៏ជាអំណះអំណាងសមល្មមដើម្បីចរចាជាមួយនិយោជក និងក្រសួងការងារ ឈានទៅដល់ការសម្រេចសម្រាប់ការដំឡើងប្រាក់ឈ្នួលអប្បបរមាដល់កម្មករនៅដើមឆ្នាំ២០១៤ ខាងមុខ៖ «ទី១ គឺយើងបានព័ត៌មានរបាយការណ៍១ចំនួនទាក់ទងអតិផរណានៃការឡើងថ្លៃនៃទំនិញផ្សេងៗវា ៥% ទៅហើយ នៅពេលបច្ចុប្បន្នហ្នឹង។ មួយទៀត គឺការរកឃើញរបាយការណ៍របស់អង្គការ អាយឡូ (ILO)និងក្រុមយុទ្ធនាការត្រួតពិនិត្យសំលៀកបំពាក់ស្អាតទូទាំងពិភពលោកហ្នឹង គឺគេរកឃើញអំពីអតិបរមា (Maximum)នៃប្រាក់ឈ្នួលរបស់កម្មករដែលរស់នៅសមរម្យនៅប្រទេសកម្ពុជា នៅវៀតណាម ទៅដល់ ២៨៥ដុល្លារ ចុច ៨៣សេននោះ។ អ៊ីចឹង ១៥៧ ដំឡើងទៅដល់ ១៧៧ នោះ គិតថានិយោជកអាចផ្ដល់ឲ្យបានហើយ»។
កាលពីថ្ងៃទី១៦ ខែធ្នូ ក្រុមការងារជជែកពីការដំឡើងប្រាក់ឈ្នួលអប្បបរមាបានដាក់រូបមន្ត ៣សម្រាប់រៀបចំដំឡើងប្រាក់ឈ្នួលជូនកម្មករ ដែលត្រូវធ្វើការពិនិត្យនិងជ្រើសរើសយក១ ដូចជាការកំណត់ដំឡើងជាអត្រារួមរយៈពេល ៥ឆ្នាំ ពីឆ្នាំ២០១៤ ដល់ឆ្នាំ២០១៨ រួចបែងចែកស្មើភាពជាអត្រាដំឡើងប្រចាំឆ្នាំ។ ការកំណត់ដំឡើងប្រាក់ឈ្នួលជាសន្ទស្សន៍រួមក្នុងរយៈពេល ៥ឆ្នាំ ឲ្យបាន ១០០% នៃប្រាក់ឈ្នួលអប្បបរមាឆ្នាំ២០១៣ គឺពី ៨០ដុល្លាររហូតដល់ ១៦០ដុល្លារនៅឆ្នាំ២០១៨ និងរូបមន្តទី៣ គឺកំណត់ដំឡើងតែម្ដងគត់នៅឆ្នាំ២០១៤ គឺដំឡើង ១០០% ដែលស្មើនឹង ១៦០ដុល្លារ ហើយនឹងមានការពិភាក្សាជារៀងរាល់ឆ្នាំ។
មន្ត្រីសហជីពបានអះអាងថា ការចរចានេះ ទាំងរដ្ឋាភិបាល និយោជក និងកម្មករសុទ្ធតែមានចេតនាចង់ដំឡើងប្រាក់ឈ្នួលបន្ថែមនៅឆ្នាំ២០១៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។