កម្មករចម្ការកៅស៊ូមេមត់ នៅស្រុកមេមត់ ខេត្តត្បូងឃ្មុំ កំពុងព្រួយបារម្ភពេលតំណាងក្រុមហ៊ុនដើរប្រាប់ប្រជាពលរដ្ឋ ឱ្យធ្វើប្រវត្តិរូប និងផ្ដិតស្នាមមេដៃយ៉ាងតក់ក្រហល់ ដែលមិនបានប្រាប់ពីមូលហេតុជាក់លាក់នោះឡើយ។ ពួកគាត់បារម្ភថា ខាងក្រុមហ៊ុនកំពុងរកវិធី ដើម្បីឱ្យពួកគាត់ចេញពីលំនៅឋានដែលប្រជាពលរដ្ឋកំពុងតវ៉ា។
ចំណែកអាជ្ញាធរបញ្ជាក់ថា ការតម្រូវឲ្យធ្វើប្រវត្តិរូបដោយមានផ្ដិតស្នាមមេដៃនេះ មិនមានអ្វីខុសនោះទេ។
ក្រុមកម្មករចម្ការកៅស៊ូមេមត់ នាំគ្នាមានមន្ទិលសង្ស័យជុំវិញរឿងក្រុមហ៊ុនចម្ការកៅស៊ូមេមត់ បានតម្រូវឱ្យពួកគាត់បំពេញបែបបទប្រវត្តិរូបរបស់ខ្លួន និងផ្ដិតមេដៃភ្លាមៗ បន្ទាប់ពីវិបត្តិដីធ្លីរបស់ពួកគាត់ជាមួយក្រុមហ៊ុននៅមិនទាន់បានបញ្ចប់នៅឡើយនោះ។
ពលរដ្ឋម្នាក់នៅឃុំត្រមូង ស្រុកមេមត់ ខេត្តត្បូងឃ្មុំ អ្នកស្រី ពៅ សាមឿន មានប្រសាសន៍ថា កាលពីថ្ងៃទី១៨ សីហា ថា ខាងក្រុមហ៊ុនបានចែកក្រដាសជាទម្រង់ប្រវត្តិរូប ដើម្បីឱ្យប្រជាពលរដ្ឋជាកម្មករក្រុមហ៊ុនចម្ការកៅស៊ូទាំងអស់បំពេញ ដោយបញ្ជាក់ថា ជាការធ្វើប្រវត្តិរូបថ្មី ដើម្បីជៀសវាងក្រែងលោមានឈ្មោះខ្មោចធ្វើការ។ អ្នកស្រីបន្តថា កន្លងមក ពួកគាត់ធ្លាប់បានធ្វើរួចមកហើយ ដោយមានទាំងអាជ្ញាធរឃុំបានទទួលស្គាល់ទៀតផង។ ការធ្វើដោយបង្ខំ និងបានគំរាមថា ប្រសិនបើនរណាមិនព្រមបំពេញ និងផ្ដិតមេដៃ នឹងត្រូវខាងក្រុមហ៊ុនបញ្ឈប់ពីការងារតែម្តង។ ក្រុមកម្មករយល់ឃើញថា ករណីនេះវាអាចមានការពាក់ព័ន្ធនឹងរឿងដីធ្លី ដែលពួកគាត់កំពុងទាមទារមិនខាន។
អ្នកស្រី ពៅ សាមឿន៖ «ខ្លាចអ៊ីចឹងប្អូន យើងខ្លាចអ៊ីចឹងទាំងអស់គ្នាហ្នឹង។ ខ្លាចគេយកស្នាមមេដៃយើងទៅ គេបោកប្រាស់យកស្នាមមេដៃយើងទៅនិយាយរឿងប៉ះពាល់រឿងដីធ្លីហ្នឹង។ តែគេនិយាយថា គេមិនប៉ះពាល់រឿងដីធ្លី គេនិយាយរឿងប្រវត្តិរូបការងារអ៊ីចឹងប្អូន។ ខ្លះទៅក៏គេធ្វើឱ្យ ខ្លះទៅក៏គេមិនទាន់ធ្វើឱ្យវានៅកំពុងតែភ័យខ្លាចរឿងហ្នឹង វាអ៊ីចឹងមែន»។
អ្នកស្រីបន្ថែមថា កាលពីមុន ខាងក្រុមហ៊ុនក៏ធ្លាប់បានប្រើយុទ្ធសាស្ត្រស្រដៀងគ្នានេះ ដើម្បីឱ្យពួកគាត់ផ្ដិតមេដៃលើលិខិតស្នាមដែរ ហើយចុងក្រោយ ស្នាមមេដៃនោះធ្វើឱ្យពួកគាត់មានបញ្ហាទៀតផង។
រីឯកម្មករម្នាក់ទៀតសុំមិនឱ្យបញ្ចេញឈ្មោះ ឱ្យដឹងថា អ្វីដែលជាការព្រួយបារម្ភរបស់ពួកគាត់នោះ គឺខ្លាចខាងក្រុមហ៊ុនប្រមូលបានស្នាមមេដៃពីពួកគាត់ហើយ គឺនឹងយករឿងប្រវត្តិរូប និងស្នាមមេដៃនោះទៅធ្វើការប្រឆាំងនឹងការទាមទារដីរបស់ពួកគាត់កាលពីមុនវិញ៖ «បាទ! អាហ្នឹងអ៊ីចឹង តាមពិតតាមខ្ញុំយល់ គេយកស្នាមមេដៃបុគ្គលិកកម្មករក្រុមហ៊ុនទាំងអស់ហ្នឹង គឺជាសមាជិករបស់ក្រុមហ៊ុនចម្ការកៅស៊ូ ហើយគេនឹងតវ៉ាថា កម្មករចម្ការទាំងនោះរឿងអីត្រូវតវ៉ាជាកម្មសិទ្ធិលំនៅឋានទាំងអស់ហ្នឹង។ អាហ្នឹងវាចូលទៅផ្លូវហ្នឹង»។
ចំណែកមេឃុំត្រមូង លោក វិញ នី មានប្រសាសន៍ថា កន្លងមកលោកមិនបានដឹងរឿងធ្វើប្រវត្តិរូបរបស់កម្មករជាមួយក្រុមហ៊ុនទេ ប៉ុន្តែលោកធ្លាប់បានធ្វើលិខិតបញ្ជាក់ចំពោះកម្មករដែលបានបម្រើការងារក្នុងក្រុមហ៊ុនថា ពិតជាអ្នករស់នៅទីនោះមែន។ លោកបញ្ជាក់ថា ការធ្វើប្រវត្តិរូបរបស់កម្មការិនីមួយៗដែលខាងក្រុមហ៊ុនតម្រូវនោះ គឺមិនមានអ្វីខុសនោះទេ៖ «បាទ! ខ្ញុំអត់ដឹងគេបង្ខំធ្វើអីផង តែបើការងារធ្វើប្រវត្តិរូបធ្វើអីជារឿងមួយធម្មតាទេ ព្រោះចូលធ្វើអីក៏គេត្រូវតែមានធ្វើប្រវត្តិរូបអ៊ីចឹងហើយ។ ប៉ុន្តែរឿងឯកសារផ្សេងទៀត ខ្ញុំមិនបានដឹងទេ។ ប្រសិនបើគេធ្វើក្រុមហ៊ុន គឺកម្មករត្រូវតែមានប្រវត្តិរូបជាក់លាក់អ៊ីចឹងហើយ គេខ្ញុំមិនដឹងដែរ មិនដឹងគោលការណ៍យ៉ាងម៉េចទេ»។
ទាក់ទងនឹងបញ្ហានេះ មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) នៅខេត្តកំពង់ចាម លោក នាង សុវ៉ាត មានប្រសាសន៍ថា ការតម្រូវឱ្យបុគ្គលិកបំពេញប្រវត្តិរូបរបស់ខ្លួននោះ គឺមិនមានអ្វីខុសឡើយ ពីព្រោះស្ទើរតែគ្រប់ស្ថាប័ន គឺគេតម្រូវឱ្យធ្វើដូចនេះ។ ប៉ុន្តែលោកយល់ថា វាចៃដន្យពេកដែលមកប៉ះចំពេលដែលក្រុមបុគ្គលិកចម្ការកៅស៊ូទាំងនោះ កំពុងមានបញ្ហាដីធ្លីជាមួយក្រុមហ៊ុន ហើយទង្វើនេះលោកយល់ថា វាជាការគំរាមកំហែងទៅលើកម្មករទាំងនោះ៖ «ព្រោះគេតែងតែឱ្យធ្វើប្រវត្តិរូបបុគ្គលម្នាក់ៗហ្នឹង ហើយគេមិនមែនអត់ទេ ប៉ុន្តែវាមានពេលវេលាដែលត្រូវធ្វើ។ ការធ្វើនៅពេលមានបញ្ហាបែបនេះ វាការគំរាមឱ្យអ្នកដែលជាកម្មកររោងចក្រកៅស៊ូហ្នឹង គាត់ពិចារណារវាងការងារ និងដីផ្ទះ តើគួរយកមួយណា? បើអ្នកឯងនៅធ្វើការងារអ្នកឯងទាមទាររឿងដីហ្នឹង ប៉ុន្តែបើអ្នកឯងយកផ្ទះ គេនឹងផ្តាច់អ្នកឯងពីការងារ ទោះគេមិននិយាយអ៊ីចឹងក៏មានន័យអ៊ីចឹងដែរ»។
លោកបន្ថែមថា ក្រុមហ៊ុនធ្វើដូចនេះវានឹងមិនមានប្រសិទ្ធភាពនោះទេ ហើយបញ្ហាដីធ្លីនេះ គប្បីមានការដោះស្រាយ ពីព្រោះថ្មីៗនេះ លោកនាយករដ្ឋមន្ត្រីបានឱ្យមន្ត្រីខេត្តនីមួយៗធ្វើការដោះស្រាយបញ្ហាដីធ្លីរបស់ពលរដ្ឋជាមួយក្រុមហ៊ុនដែរ។ លើសពីនេះទៀតនោះ លោកនាយករដ្ឋមន្ត្រី ក៏បានព្រមានដល់ក្រុមហ៊ុនទាំងអស់ឱ្យបញ្ឈប់ការរំលោភបំពានលើដីធ្លីរបស់ពលរដ្ឋតទៅទៀត។
មកដល់ល្ងាចថ្ងៃទី២០ ខែសីហា ឆ្នាំ២០១៤ វិទ្យុអាស៊ីសេរី មិនអាចទាក់ទងអគ្គនាយកក្រុមហ៊ុនចម្ការកៅស៊ូមេមត់ លោក ឆាយ សាវុធ បានឡើយ ដើម្បីសុំពន្យល់តបទៅនឹងកង្វល់របស់ពលរដ្ឋដែលលើកឡើងមកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។