មន្ត្រីសមាគមអាដហុក (ADHOC) ប្រចាំខេត្តកំពង់ឆ្នាំង ប្រកាសថានឹងចេញលិខិតអន្តរាគមន៍មួយច្បាប់ទៅតុលាការកំពូល ដើម្បីឲ្យពន្លឿននីតិវិធីរឿងក្ដីរវាងពលករចំនួន ២៥នាក់ និងក្រុមហ៊ុនបញ្ជូនពលករទៅធ្វើការក្រៅប្រទេសមួយ។ ការប្រកាសជំហរជួយអន្តរាគមន៍នេះ គឺនៅបន្ទាប់ពីក្រុមគ្រួសារពលករ ស្វែងរកជំនួយផ្លូវច្បាប់ពីមន្ត្រីសមាគមអាដហុក ជាលើកទី២។
តំណាងពលករ ១៥នាក់មកពីតំបន់ផ្សេងៗគ្នានៃខេត្តកំពង់ឆ្នាំង បានជួបពិភាក្សាផ្នែកច្បាប់ និងប្រាប់ពីទុក្ខកង្វល់របស់ខ្លួនឲ្យមន្ត្រីសិទ្ធិមនុស្សបានដឹង ដើម្បីឲ្យជួយពួកគាត់នៅថ្ងៃទី១៥ ខែមីនា។
តំណាងពលករពលការិនី ២៥នាក់ និងជាអ្នករងគ្រោះម្នាក់មកពីស្រុករលាប្អៀរ គឺលោក យន់ ល័ក្ខ មានប្រសាសន៍ថា ក្រុមហ៊ុន ដ្យាយអិន អូសិន អ៊ីនធឺណេសិនណល (Giant Ocean International) បោកប្រាស់លោក និងអ្នកភូមិ ៧នាក់ផ្សេងទៀត ថាឲ្យទៅធ្វើការនៅប្រទេសជប៉ុន ប៉ុន្តែការពិតបោកបញ្ឆោតឲ្យចុះទូកនេសាទនៅប្រទេសអាហ្វ្រិក ទៅវិញ។ លោកថា រយៈពេល ១៦ខែនៅទីនោះ គឺលោកធ្វើការគ្មានពេលសម្រាក និងគ្មានប្រាក់ខែ ហើយប្រឈមនឹងគ្រោះថ្នាក់គ្រប់បែបយ៉ាង៖ « ខ្ញុំតេ ( ទូរស័ព្ទ ) មកផ្ទះ ហើយអ្នកផ្ទះប្រាប់ថា ក្រុមហ៊ុនបោក រួចខ្ញុំនៅណោះខ្ញុំអត់ព្រមចុះធ្វើការទេ។ ខ្ញុំប្រាប់ប្រធានកប៉ាល់ថា ខ្ញុំសុំទៅផ្ទះវិញ រួចគេអត់ចង់ឲ្យខ្ញុំមកទេ ហើយបើអត់ឲ្យខ្ញុំទៅផ្ទះវិញទេ ខ្ញុំអត់ព្រមចុះទូកទៅវិញទេ សុខចិត្ដនៅលើច្រាំងហ្នឹងហើយ »។
ចំណែកអាណាព្យាបាលម្នាក់មកពីស្រុកទឹកផុស គឺលោកស្រី ជួប ចាន់ រៀបរាប់ទាំងទឹកភ្នែកថា កូនប្រុសគាត់ពីរនាក់ ក៏ចាញ់បោកក្រុមហ៊ុននេះទៅធ្វើការសំណង់នៅប្រទេសវៀតណាម ដែរ។ កូនប្រុសគាត់ទាំងពីរនាក់ សុទ្ធតែត្រូវបានគេវាយធ្វើបាបនៅអំឡុងពេលធ្វើការ ដោយកូនប្អូនបែកស្មងជើង និងកូនបង ត្រូវគេវាយក្បាលផ្នែកខាងក្រោយស្ទើរកើតរោគសរសៃប្រសាទ ហើយសព្វថ្ងៃដើរផឹកស៊ីលែងដឹងអី៖ « កូនខ្ញុំទៅធ្វើការបាន ១៦ខែដែរ មកវិញអត់បានលុយកាក់អីទេ ហើយកូនវាកំព្រា អ្នកនៅលើខ្ញុំនៅជាមួយខ្ញុំ វាទៅធ្វើការតាំងពីតូចៗ។ ខ្ញុំសំណូមពរឲ្យរដ្ឋាភិបាល ជួយដោះស្រាយរឿងហ្នឹងឲ្យបានខ្ញុំផង »។
ក្រុមហ៊ុន ដ្យាយអិន អូស៊ិន អ៊ីនធឺណេសិនណល ដែលមានការិយាល័យធំនៅរាជធានីភ្នំពេញ បានបិទទ្វារនៅឆ្នាំ២០១២ ហើយប្រធានក្រុមហ៊ុនជនជាតិចិន-តៃវ៉ាន់ រត់ទៅស្រុក និងស្ត្រីម្នាក់ឈ្មោះ លីន យូស៊ិន ត្រូវជាប់ពន្ធនាគាររយៈពេល ១០ឆ្នាំតាំងពីឆ្នាំ២០១៤ តាមអំណាចសាលក្រមរបស់សាលាដំបូងរាជធានីភ្នំពេញ។ បច្ចុប្បន្ន ក្ដីក្ដាំរវាងក្រុមហ៊ុន និងពលករ កំពុងឋិតនៅក្នុងដៃនៃតុលាការកំពូល។
មន្ត្រីសម្របសម្រួលនៃសមាគមអាដហុក (ADHOC) ខេត្តកំពង់ឆ្នាំង លោក សំ ច័ន្ទគា យល់ថា ចៅក្រមដែលកាន់សំណុំរឿងនេះ គប្បីពន្លឿននីតិវិធីដោយរឹបអូសទ្រព្យសម្បត្តិ និងប្រាក់ធានារបស់ក្រុមហ៊ុនដែលបានតម្កល់ មុននឹងបង្កើតក្រុមហ៊ុនឡើងនោះ ដើម្បីបែងចែកប្រាក់ខែទៅឲ្យពលករដែលកំពុងជួបប្រទះនឹងបញ្ហាជីវភាព។ ពលកររងគ្រោះ ២៥នាក់ក្នុងចំណោម ៤៥នាក់នៅក្នុងខេត្តកំពង់ឆ្នាំង ដែលបានដាក់បណ្ដឹងប្រឆាំងនឹងក្រុមហ៊ុនតាំងពីឆ្នាំ២០១៣ ទន្ទឹងរង់ចាំការសម្រេចជាស្ថាពរពីស្ថាប័នតុលាការ។ លោកថា នឹងជួយជំរុញរឿងនេះបន្ថែមទៀត ដើម្បីឲ្យឆាប់មានដំណោះស្រាយ៖ « ខ្មែរអត់មានទូត ឬកុងស៊ុលណានៅប្រទេសតៃវ៉ាន់ ទេ ដែលមិនអាចធ្វើបត្យាប័នជននោះមកទេ។ អ៊ីចឹងហើយមានតុលាការជួយសម្រួលឲ្យមានការអនុវត្ត ដោយបង្ខំលើទ្រព្យធនរបស់ជនល្មើសមកសងពលរដ្ឋ »។
យោងតាមព្រឹត្តិបត្រព័ត៌មាន ឌឹ ខេមបូឌា ដេលី (The Cambodia Daily) ចុះផ្សាយកាលពីចុងឆ្នាំ២០១៤ មានពលករ ១ពាន់នាក់បានចុះកុងត្រាការងារជាមួយក្រុមហ៊ុននេះ។ ក្រុមហ៊ុនបានបោកបញ្ឆោតពលករទាំងនោះ ឲ្យចុះទូកនេសាទនៅតាមសមុទ្រ ដោយសន្យាផ្ដល់ប្រាក់ខែទៀងទាត់ក្រោយចុះកិច្ចសន្យាការងាររយៈពេលពីរឆ្នាំ។ ប្រធាន និងបុគ្គលិកក្រុមហ៊ុន បានគេចខ្លួនទៅស្រុក ដោយមិនបន្សល់ទុកអ្វីក្រៅពីស្ត្រីម្នាក់ដែលតុលាការនៃសាលាដំបូង កាត់ឲ្យជាប់គុក ១០ឆ្នាំ និងប្រាក់ធានារបស់ក្រុមហ៊ុនចំនួន ១សែនដុល្លារ ដែលបានតម្កល់នៅក្រសួងការងារ នៅមុនពេលបើកក្រុមហ៊ុនបញ្ជូនពលករនេះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។