អគ្គមេបញ្ជាការរងនៃកងយោធពលខេមរភូមិន្ទ ទទួលទិសឧត្តរមានជ័យ គឺលោកឧត្តមសេនីយ៍ឯក ឈិន ច័ន្ទពណ៌។ លោកបានមានប្រសាសន៍កាលពីរសៀលថ្ងៃអង្គារ ទី១៧ ខែធ្នូ ថា លោកមានការមិនពេញចិត្តចំពោះគម្រោងសាងសង់កាស៊ីណូ ដែលបានចាក់ដីលុបទៅលើលេណដ្ឋានយោធាដែលកំពុងប្រចាំការពារព្រំដែនខ្មែរនោះទេ។
លោកឧត្តមសេនីយ៍ ឈិន ច័ន្ទពណ៌ បានបញ្ជាក់ថា តំបន់ដែលនឹងចាប់សាងសង់កាស៊ីណូនោះ គឺជាតំបន់ក្ដៅក្នុងរឿងជម្លោះព្រំដែនខ្មែរ-ថៃ ដែលកន្លងមកកងទ័ពខ្មែរ បានប្រឹងប្រែងការពារទីនោះយ៉ាងខ្លាំង។ លោកចង់ឱ្យ ឧកញ៉ា លឹម ហេង ដែលកំពុងមានបំណងអភិវឌ្ឍតំបន់នោះ ធ្វើការពិចារណាឡើងវិញ៖ «អានេះវាពិតជាកំហុសឆ្គង ហើយឥឡូវនេះ គឺខ្ញុំកំពុងតែរៀបចំដើម្បីឱ្យ ឧកញ៉ា លឹម ហេង ហ្នឹង គិតគូរឡើងវិញ ហើយធ្វើការដកថយជាបន្ទាន់ពីតំបន់នោះ ព្រោះបើសិនជាការអភិវឌ្ឍដោយល្មើសនឹងគោលការណ៍ ទៅលុបលេណដ្ឋានទៅរើទីតាំងកងទ័ពអីដូច្នេះ ក្នុងនាមខ្ញុំជាអ្នកទទួលខុសត្រូវទីនោះ គឺខ្ញុំមិនអាចទទួលយកបានទេ»។
អាជ្ញាធរភូមិជប់គគីរ ធ្លាប់បានទៅប្រាប់ឱ្យម្ចាស់គម្រោងសាងសង់កាស៊ីណូនោះ ធ្វើការពិចារណា ឡើងវិញដែរ នៅពេលដែលប៉ះពាល់ដល់លេណដ្ឋានកងទ័ពការពារព្រំដែន ក៏ប៉ុន្តែការរំលឹកនោះមិនមានប្រសិទ្ធភាពទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។