ក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានគណៈកម្មការប្រឹក្សាការងារ សម្រេចបើកសិក្ខាសាលាពិគ្រោះយោបល់ត្រីភាគីថ្នាក់ជាតិមួយ ស្ដីពីការពង្រឹងដំណើរការកំណត់ប្រាក់ឈ្នួលអប្បបរមាកម្មករនៅកម្ពុជា រយៈពេល២ថ្ងៃ ពីថ្ងៃទី២៤ ដល់ថ្ងៃទី២៥ មេសា នៅសណ្ឋាគារភ្នំពេញ រាជធានីភ្នំពេញ។ ភាគីដែលចូលរួមនោះរួមមាន ខាងរដ្ឋាភិបាល ក្រុមនិយោជក និងតំណាងក្រុមកម្មករ។
មេដឹកនាំខ្លះនៃសហព័ន្ធសហជីពធំៗចំនួន៨ ដែលប្រឆាំងទាមទារសុំឲ្យរដ្ឋាភិបាលដំឡើងប្រាក់ខែគោលឲ្យកម្មករដល់ ១៦០ដុល្លារ ត្រូវបានក្រសួងការងារ និងបណ្ដុះបណ្ដាលវិជ្ជាជីវៈ អញ្ជើញឲ្យចូលរួមសិក្ខាសាលាពិភាក្សាលើការកែទម្រង់ប្រព័ន្ធកំណត់ប្រាក់ខែគោលឲ្យកម្មករ ក្នុងវិស័យកាត់ដេរ។
ក្រសួងការងារបានចេញលិខិតអញ្ជើញមួយទៅ លោក ប៉ាវ ស៊ីណា ប្រធានសហព័ន្ធសហជីពចលនាកម្មករ កាលពីថ្ងៃទី២១ មេសា អញ្ជើញឲ្យលោកចូលរួមសិក្ខាសាលាពិគ្រោះយោបល់ត្រីភាគីថ្នាក់ជាតិ ស្ដីពីការពង្រឹងដំណើរការកំណត់ប្រាក់ឈ្នួលអប្បបរមានៅកម្ពុជា ចាប់ពីថ្ងៃទី២៤ ដល់ថ្ងៃទី២៥ មេសា។ រីឯ លោកស្រី ម៉ម ញឹម ប្រធានសហព័ន្ធសហជីពជាតិ នៃឧស្សាហកម្មកាត់ដេរកម្ពុជា ស្ថិតក្នុងចង្កោមក្រុមសហព័ន្ធសហជីពដែលទាមទារសុំដំឡើងប្រាក់ខែគោលឲ្យកម្មករដល់ ១៦០ដុល្លារនោះ ក៏ត្រូវបានក្រសួងការងារអញ្ជើញតាមទូរស័ព្ទឲ្យចូលរួមសិក្ខាសាលានោះដែរ។ ដោយឡែក លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ស៊ីខាវឌូ (CCAWDA) លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា និងលោកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជា មិនត្រូវបានអញ្ជើញឲ្យចូលរួមសិក្ខាសាលានេះទេ។
លោកស្រី យ៉ាង សុភ័ណ្ឌ ឲ្យដឹងថា អង្គការអន្តជាតិខាងការងារ អាយឡូ (ILO) បានអញ្ជើញលោកស្រីឲ្យចូលរួមប្រជុំនៅអង្គការនេះជាមួយក្រុមសហព័ន្ធសហជីពជាច្រើនទៀត ជជែកគ្នាលើចំណុចសំខាន់ខ្លះនៃការកែទម្រង់ប្រាក់ឈ្នួលឲ្យកម្មករ មុននឹងសិក្ខាសាលាថ្នាក់ជាតិចាប់ផ្ដើមនៅថ្ងៃទី២៤។ លោកស្រីសម្ដែងការសោកស្ដាយចំពោះក្រសួងការងារ និងបណ្ដុះបណ្ដាលវិជ្ជាជីវៈ ដែលមានការរើសអើងសហជីពមួយចំនួន ហើយមិនបានអញ្ជើញឲ្យចូលរួមក្នុងសិក្ខាសាលានោះ៖ «សម្រាប់ខ្ញុំខ្លួនឯងមិនដឹងថានេះជាចេតនារបស់ក្រសួង ឬក៏យ៉ាងម៉េចទេ ដែលអញ្ជើញខាងខ្ញុំ។ ប៉ុន្តែបើមានការជជែកគ្នាពីរឿងប្រាក់ឈ្នួល មានការកំណត់ប្រាក់ឈ្នួលទូទាំងប្រទេស គួរតែមិនប្រកាន់ពីរឿងសហជីពណាមួយទេ ត្រូវតែអញ្ជើញសហជីពទាំងអស់ក្នុងការកំណត់ប្រាក់ឈ្នួលឲ្យកម្មករ»។
រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ុំ មាន មិនបានពន្យល់ពីការអញ្ជើញចោះៗចំពោះមេដឹកនាំដែលប្រឆាំងនឹងការសម្រេចជាឯកតោភាគីរបស់ក្រសួងការងារ ដំឡើងប្រាក់ខែឲ្យកម្មករត្រឹម ១០០ដុល្លារនោះទេ។ លោកគ្រាន់តែប្រាប់ថា សិក្ខាលើកនេះធ្វើឡើងទ្រង់ទ្រាយធំ មានទាំងភាគីរដ្ឋាភិបាល ក្រុមនិយោជក និងក្រុមសហជីពជាតំណាងកម្មករ ពិសេសមានការចូលរួមពីអង្គការអន្តរជាតិខាងការងារ ដើម្បីពិភាក្សាពីនីតិវិធីនៃការរៀបចំប្រាក់ឈ្នួលអប្បបរមាទៅថ្ងៃមុខ ដោយភាគីកម្មករ និងថៅកែទទួលយកបានទាំងសងខាង៖ «យើងអញ្ជើញឲ្យមានការចូលរួមពីអង្គការអាយឡូ ដែលជាអ្នកជំនាញ។ យើងបានពិភាក្សា និងឯកភាពគ្នារួចហើយ ទើបបង្កើតជាការជួបជុំគ្នាឡើង ដើម្បីពិភាក្សាអំពីនីតិវិធីរបៀបរបបធ្វើការងាររៀបចំប្រាក់ឈ្នួលការងារ»។
ជុំវិញបញ្ហានេះ ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា គ្រោងនឹងចូលរួមតាមការអញ្ជើញរបស់ក្រសួងការងារ ប៉ុន្តែលោកគិតថា សិក្ខាសាលាថ្នាក់ជាតិស្ដីពីពង្រឹងដំណើរការកំណត់ប្រាក់ឈ្នួលនេះ គឺជាជំហានដំបូងនៃការចាប់ផ្តើមសិក្សាពីនីតិវិធីកំណត់ប្រាក់ឈ្នួល ដែលត្រូវអូសបន្លាយពេលសិក្សាយូរ ហើយហាក់យឺតយ៉ាវសម្រាប់ការឆ្លើយតបចំពោះតម្រូវការដំឡើងប្រាក់ខែគោលដល់កម្មករ។
ក្រុមសហព័ន្ធសហជីពមួយចំនួនដែលគាំទ្រចំពោះការសម្រេចរបស់ក្រសួងការងារ លើការកំណត់ប្រាក់ខែគោល ១០០ដុល្លារ ដូចជា លោក សោម អូន ប្រធានសហព័ន្ធសហជីពកម្មករកម្ពុជា ក៏ត្រូវបានក្រសួងអញ្ជើញឲ្យចូលប្រជុំដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។