ព្រះសង្ឃបីអង្គដែលគង់នៅវត្តច័ន្ទរង្សី ហៅវត្តស្រឡៅ នៅឃុំស្រឡៅ ស្រុកបារាយណ៍ ខេត្តកំពង់ធំ ឲ្យដឹងថា ការមិនអនុញ្ញាតឲ្យព្រះអង្គគង់នៅក្នុងវត្តបាននោះ គឺជារឿងមិនត្រឹមត្រូវ ពីព្រោះព្រះសង្ឃទាំងបីអង្គមិនមានកំហុសអ្វីឡើយ។
យ៉ាងណាក៏ដោយ ចៅអធិការវត្តបញ្ជាក់ថា មិនបានបណ្ដេញព្រះសង្ឃទាំងបីអង្គនោះចេញនោះទេ គ្រាន់តែមិនមានកន្លែងអាចទទួលព្រះអង្គទាំងបីអង្គនោះឲ្យគង់នៅបន្តទៀតបាន។
ព្រះសង្ឃទាំងបីអង្គ កំពុងស្វែងរកមូលហេតុដែលចៅអធិការមិនឲ្យព្រះអង្គអាចគង់នៅក្នុងវត្តបន្តទៀតបាន ពីព្រោះខ្លួនមិនបានប្រព្រឹត្តអ្វីខុសទៅនឹងធម៌វិន័យរបស់ព្រះពុទ្ធសាសនាឡើយ។
ព្រះសង្ឃមួយអង្គក្នុងចំណោមបីអង្គ ព្រះនាម តេ អូ មានថេរដីកាថា នៅពេលព្រះអង្គថ្វាយបង្គំលាចៅអធិការវត្តច័ន្ទរង្សី ថាទៅលេងញោមជាពុទ្ធបរិស័ទនៅស្រុកបាធាយ ខេត្តកំពង់ចាម នោះ ក៏មានការយល់ព្រមពីចៅអធិការហើយដែរ ប៉ុន្តែបានមួយថ្ងៃ ព្រះអង្គនិមន្តត្រឡប់មកវិញ ស្រាប់តែចៅអធិការវត្តបញ្ជាក់ថា នៅក្នុងវត្តមិនមានកន្លែងសម្រាប់ទទួលលោកទេ។ លើសពីនេះទៀត ព្រះសង្ឃពីរអង្គផ្សេងទៀតដែលមានស្រុកកំណើតនៅក្បែរវត្តនោះ ក៏មិនអនុញ្ញាតឲ្យគង់នៅបន្តទៀតដែរ ក្រោយពេលដែលព្រះសង្ឃទាំងពីរអង្គនោះ បាននិមន្តទៅលេងផ្ទះញោមរបស់ខ្លួននៅក្នុងភូមិសិរីសាមគ្គី។ ព្រះអង្គបន្ថែមថា ការធ្វើបែបនេះ គឺជារឿងមួយដែលព្រះអង្គមិនអាចទទួលយកបាន និងខុសពីពុទ្ធិវិន័យថែមទៀតផង។
ព្រះតេជព្រះគុណ តេ អូ៖ «បើនិយាយទៅ គឺត្រឹមត្រូវ តែសម្រាប់លោកតែម្នាក់ឯងទេ សម្រាប់គ្រូចៅអធិការ តែប្រសិនបើឲ្យអ្នកខាងដូចជាច្បាប់សម្រាប់ពុទ្ធសាសនាខាងវិន័យ ឲ្យគេមកធ្វើការ ឲ្យគេមកអី ប្រហែលជាគេចាត់ទុកថាមិនត្រឹមត្រូវទេ។ ហើយសួរអត់ដឹងមូលហេតុ អ៊ីចឹងកំហុសនៅលើលោកតែដដែលហ្នឹង ព្រោះអាត្មាអត់មានកំហុសអីទេ។ ហើយមួយទៀត គម្រោងអាត្មាហ្នឹងអាត្មានាំព្រះវិន័យធម៌អនុគណមន្ត្រីសង្ឃថ្នាក់ស្រុកមកដោះស្រាយ លោកបែរជានិយាយថាលោកមិនបានដេញទេ។ អ៊ីចឹងបានន័យថា ចេតនារបស់លោកមានន័យថាខ្លាចៗច្បាប់»។
ព្រះសង្ឃទាំងបីអង្គ នឹងផ្ញើលិខិតមួយទៅដល់ព្រះវិន័យសង្ឃថ្នាក់ស្រុក ដើម្បីឲ្យនិមន្តចៅអធិការវត្តអង្គនោះ បកស្រាយចំពោះបញ្ហាមិនអនុញ្ញាតឲ្យព្រះសង្ឃបីអង្គគង់នៅវត្តនោះ។
ឆ្លើយតបនឹងការលើកឡើងនេះ ព្រះចៅអធិការវត្តច័ន្ទរង្សី សុំលាក់ព្រះនាមមានថេរដីកាថា ព្រះអង្គមិនបានដេញព្រះសង្ឃទាំងនោះទេ ប៉ុន្តែក្នុងចំណោមព្រះសង្ឃបីអង្គ មានមួយព្រះអង្គសុំចេញពីវត្ត ដើម្បីទៅរកកន្លែងរៀនសូត្រ។ ដោយឡែកពីរអង្គទៀត បម្រុងនឹងចេញហើយដែរ។ ដូចនេះ ព្រះអង្គមានថេរដីកាថា ក្នុងវត្តមិនមានកន្លែងសម្រាប់ព្រះសង្ឃទាំងនោះគង់នៅទៀតឡើយ៖ «លោកថា មកនៅវិញលោកម៉ាអង្គដែលចេញទៅ ប៉ុន្តែពីរអង្គលោកមកជាមួយនេះនៅឡើយទេ។ អ៊ីចឹងដល់និមន្តមក អាត្មាក៏ថាគ្មានកន្លែងឲ្យនៅទេ អ៊ីចេះ។ លោកចេញចូលពេកអ៊ីចឹងណា៎រឿងហ្នឹង»។
ចៅអធិការដដែលមានថេរដីកាបន្ថែមថា នឹងអនុញ្ញាតឲ្យព្រះសង្ឃទាំងបីអង្គគង់នៅបន្ត ប៉ុន្តែលុះត្រាតែកែប្រែនូវចំណុចអវិជ្ជមានមួយចំនួន ពីព្រោះកន្លងមក ព្រះអង្គដឹងថា ព្រះសង្ឃទាំងបីអង្គនោះប្រព្រឹត្តខុសពីវិន័យសង្ឃនៅក្នុងវត្ត។
ទោះបីជាយ៉ាងណាក៏ដោយ ព្រះសង្ឃទាំងបីអង្គយល់ថា នេះគឺជាការចោទប្រកាន់មួយដោយគ្មានភស្តុតាងច្បាស់លាស់ និងមានចេតនាបង្ខូចកិត្តិយសព្រះអង្គតែប៉ុណ្ណោះ។ រឿងមិនឲ្យព្រះសង្ឃទាំងបីអង្គអាចគង់នៅក្នុងវត្តនោះ ក៏មានពាក់ព័ន្ធជាមួយមេភូមិសិរីសាមគ្គីខាងជើងទៀតផង។
ចំណែកមេភូមិសិរីសាមគ្គីខាងជើង លោក ទេព ណេត មានប្រសាសន៍ថា លោកមិនពាក់ព័ន្ធរឿងនេះឡើយ រីឯការសម្រេចមិនឲ្យព្រះអង្គគង់នៅយ៉ាងណានោះ គឺសម្រេចលើចៅអធិការវត្ត និងគណៈកម្មាធិការវត្តតែប៉ុណ្ណោះ។ លោកបន្ថែមថា លោកក៏មិនអាចសម្របសម្រួលរឿងនេះបានដែរ ពីព្រោះវាគឺជាភារកិច្ចរបស់ថ្នាក់ដឹកនាំសង្ឃ។
ព្រះសង្ឃទាំងបីអង្គដែលកំពុងគង់ស្នាក់នៅផ្ទះរបស់ញោមខ្លួននៅក្បែរវត្តនោះ បញ្ជាក់ថា ព្រះអង្គមិនចង់ចូលទៅគង់នៅក្នុងវត្តវិញទេ ប៉ុន្តែគ្រាន់តែចង់ឲ្យព្រះចៅអធិការវត្តអង្គនោះ បំភ្លឺពីមូលហេតុនៃការបណ្ដេញព្រះសង្ឃដែលមិនមានកំហុសសោះចេញពីវត្ត និងដើម្បីបញ្ជាក់ពីភាពស្អាតស្អំរបស់ព្រះអង្គ។
ទាក់ទងនឹងបញ្ហានេះ មន្ត្រីអង្កេតនៃអង្គការការពារសិទ្ធិមនុស្សលីកាដូ (Licadho) ខេត្តកំពង់ធំ លោក ឈួម រុណ មានប្រសាសន៍ថា ប្រសិនបើមានពាក្យបណ្ដឹងមកខាងលីកាដូ នោះ លោកនឹងចុះស្រាវជ្រាវជុំវិញបញ្ហានេះ។ លោកថា ប្រសិនបើការបណ្ដេញព្រះសង្ឃចេញដោយគ្មានកំហុសអ្វីនោះ គឺជាការរំលោភសិទ្ធិមនុស្ស និងជាការរើសអើង ប៉ុន្តែប្រសិនបើព្រះសង្ឃទាំងនោះប្រព្រឹត្តខុសទៅនឹងធម៌វិន័យនោះ ខាងមន្ត្រីសង្ឃ និងខាងក្រសួងពាក់ព័ន្ធ ជាអ្នកចាត់វិធានការចំពោះព្រះសង្ឃទាំងនោះទៅតាមពុទ្ធិវិន័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។