ពុទ្ធបរិស័ទដែលជាអ្នកកាន់ព្រះពុទ្ធសាសនា រួមទាំងព្រះសង្ឃ បានរួមគ្នាប្រារព្ធពិធីបុណ្យលើកដំបូងនៅលើស្ពានមេគង្គខែត្រស្ទឹងត្រែង នៅព្រឹកថ្ងៃទី១២ ខែកុម្ភៈ។ ការប្រារព្ធពិធីនេះ ផ្ដោតសំខាន់ដើម្បីឧទ្ទិសដល់វិញ្ញាណក្ខន្ធអ្នកស្លាប់ដោយគ្រោះថ្នាក់ចរាចរណ៍នៅផ្លូវជាតិលេខ៩ និងពញ្ញាក់ស្មារតីពលរដ្ឋឲ្យប្រុងប្រយ័ត្នពេលធ្វើចរាចរណ៍។
ព្រះសង្ឃចំនួន ២៨០អង្គមកពីវត្តនានាក្នុងខែត្រស្ទឹងត្រែង បាននិមន្តដង្ហែរាប់បាត្រ និងសូត្រធម៌លើស្ពានមេគង្គ ផ្ដើមពីត្រើយម្ខាងនៃក្រុងស្ទឹងត្រែង ឆ្ពោះទៅត្រើយម្ខាងនៃស្រុកថាឡាបរិវ៉ាត់ ដែលមានពុទ្ធបរិស័ទជាង ៥០០នាក់ចូលរួមពិធីបុណ្យនេះ។ ពលរដ្ឋរំពឹងថា ពិធីនេះក៏ជាសញ្ញាបង្ហាញឲ្យអ្នកធ្វើដំណើរចូលរួមគោរពច្បាប់ចរាចរណ៍ទាំងអស់គ្នា ដែលជាផ្នែកមួយរួមចំណែកកាត់បន្ថយគ្រោះថ្នាក់ចរាចរណ៍។
ពលរដ្ឋចូលរួមពិធីបុណ្យ លោកយាយ គង់ ថេត វ័យជាង ៧០ឆ្នាំ កត់សម្គាល់ថា កន្លងទៅមានមនុស្សស្លាប់ និងរបួសច្រើននៅលើដងផ្លូវជាតិលេខ៩ នៃស្រុកថាឡាបរិវ៉ាត់ ជាពិសេសនៅលើស្ពានមេគង្គ។ បញ្ហានេះ ពុទ្ធបរិស័ទ និងព្រះសង្ឃបានមូលមតិគ្នាប្រារព្ធពិធីរាប់បាត្រ ឧទ្ទិសកុសលជូនវិញ្ញាណក្ខន្ធអ្នកដែលស្លាប់ដោយគ្រោះថ្នាក់ចរាចរណ៍ និងដើម្បីរំដោះគ្រោះពលរដ្ឋឲ្យទទួលបានសេចក្តីសុខចម្រើន៖ «គ្រោះថ្នាក់ច្រើន ម៉្លោះ ហើយចង់ឲ្យសពសត្វនៅកន្លែងនេះបានសុខចម្រើន កុំឲ្យមានងាប់តាមផ្លូវចរាចរណ៍ និងតាមស្ពានតាមអី »។
ផ្លូវជាតិលេខ៩ ចាប់ពីស្ពានមេគង្គរហូតដល់ខែត្រព្រះវិហារ មានចម្ងាយជាង ១០០គីឡូម៉ែត្រ ត្រូវបានរដ្ឋាភិបាលកសាងឡើងនៅឆ្នាំ២០១១ និងមានមនុស្សធ្វើដំណើរច្រើន នៅគ្រាដែលស្ពានមេគង្គកសាងរួចនៅឆ្នាំ២០១៤។
ព្រះអនុគណស្រុកថាឡាបរិវ៉ាត់ ព្រះតេជព្រះគុណ ពុធ យ៉ាំ មានថេរដីកាថា តាមការគ្រោងទុក ព្រះអង្គនឹងដឹកនាំពុទ្ធបរិស័ទប្រារព្ធពិធីបុណ្យនេះមួយឆ្នាំម្តង ដើម្បីបង្ហាញឲ្យសាធារណជន និងពុទ្ធបរិស័ទយកចិត្តទុកដាក់គោរពច្បាប់ចរាចរណ៍ និងធ្វើដំណើរដោយប្រុងប្រយ័ត្ន។ ព្រះអង្គមានថេរដីកាបន្តថា គោលបំណងសំខាន់ដែលធ្វើពិធីបុណ្យនេះ ដើម្បីផ្សាយមេត្តាធម៌ដល់ពលរដ្ឋឲ្យទទួលបានសុខចម្រើន និងឧទ្ទិសមគ្គផលដល់វិញ្ញាណក្ខន្ធអ្នកដែលស្លាប់ដោយសារគ្រោះថ្នាក់ចរាចរណ៍៖ «អាត្មាប្រារព្ធធ្វើនេះ គឺអាត្មាចេញថវិកាខ្លួនឯង ដើម្បីរៀបចំកម្មវិធីនេះឡើង ប្រយោជន៍ឲ្យពុទ្ធបរិស័ទបានសេចក្តីសុខទាំងអស់គ្នា »។
របាយការណ៍របស់អធិការដ្ឋាននគរបាលស្រុកថាឡាបរិវ៉ាត់ ឲ្យដឹងថា ចាប់ពីឆ្នាំ២០១៤ មនុស្សស្លាប់លើផ្លូវជាតិលេខ៩ ក្នុងស្រុកថាឡាបរិវ៉ាត់ ចំនួន ៣៦នាក់ ក្នុងនោះមាន ៦នាក់បានស្លាប់នៅលើស្ពានមេគង្គ។
អធិការរងស្រុកថាឡាបរិវ៉ាត់ លោក អ៊ី លឿ មានប្រសាសន៍ថា នគរបាលស្រុកថាឡាបរិវ៉ាត់ ជាង ១០នាក់ បានដាក់ពង្រាយកម្លាំងការពារសន្តិសុខជូនពលរដ្ឋក្នុងពិធីនេះ។ លោកចាត់ទុកពិធីបុណ្យនេះមានសារសំខាន់ ដើម្បីដាស់ស្មារតីពលរដ្ឋ ឬអ្នកដំណើរឲ្យយកចិត្តទុកដាក់គោរពច្បាប់ចរាចរណ៍ទាំងអស់គ្នា៖ «សម្រាប់ធ្វើដំណើរចូលរួមមានការយល់ដឹង គាត់ឈប់ឡានគាត់សួរដែរ ថាកម្មវិធីអី ? ហើយយើងក៏បានបំភ្លឺគាត់ដែរ ថាយើងរៀបចំពិធីគោរពវិញ្ញាណក្ខន្ធអ្នកដែលបានស្លាប់ដោយគ្រោះថ្នាក់ចរាចរណ៍ »។
កាលពីឆ្នាំ២០១៥ មន្ត្រីអាវុធហត្ថខែត្រស្ទឹងត្រែង ម្នាក់បានស្លាប់ នៅគ្រាដែលធ្វើដំណើរដោយម៉ូតូនៅពេលយប់បុកគោយន្តពលរដ្ឋពីខាងក្រោយ។ នៅឆ្នាំ២០១៦ មានយុវជន ៦នាក់ក្នុងនោះយុវតី ២នាក់បានស្លាប់នៅលើស្ពានមេគង្គដោយសារគ្រោះថ្នាក់ចរាចរណ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។