ក្រុមហ៊ុនដឹកជញ្ជូន ទាមទារចង់ឲ្យមានក្រុមហ៊ុនលើកដាក់ទំនិញកាន់តែច្រើនទៀត ដើម្បីលើកកម្ពស់ការប្រកួតប្រជែងរវាងវិស័យឯកជន លើផ្នែកដឹកជញ្ជូនតាមនាវាឲ្យកាន់តែប្រសើរ។
អ្នកវិនិយោគមួយចំនួន ដែលចង់បង្កើតក្រុមហ៊ុនផ្ដល់សេវាលើកដាក់ទំនិញនៅតាមកប៉ាល់ និងនាវាបរទេស សង្កេតឃើញថា មានការរើសអើង ឬមិនអនុញ្ញាតមិនឲ្យក្រុមហ៊ុនប្រភេទនេះច្រើនឡើយ នៅតាមកំពង់ផែនានានៅប្រទេសកម្ពុជា។
បច្ចុប្បន្ន ប្រទេសកម្ពុជា មានក្រុមហ៊ុនតែមួយប៉ុណ្ណោះដែលផ្ដល់សេវាលើកដាក់ទំនិញនៅតាមកប៉ាល់ នៅកំពង់ផែ ខេត្តព្រះសីហនុ។ អ្នកដែលចង់បង្កើតសេវានេះ បានអះអាងទៀតថា ការវិនិយោគបន្ថែមលើការបង្កើតក្រុមហ៊ុនសេវាកម្មដឹកជញ្ជូនទំនិញនេះ នឹងបង្កើតឲ្យមានសេវាកម្មលើកដាក់ទំនិញនៅតាមកប៉ាល់កាន់តែប្រសើរ និងកាត់បន្ថយតម្លៃដឹកទំនិញបានជាអតិបរមា។
ប្រធានក្រុមហ៊ុនដឹកជញ្ជូនមួយចំនួន បានរកឃើញថា សេវាដឹកជញ្ជូនដឹកទំនិញនៅតាមនាវានៅប្រទេសកម្ពុជា មានតម្លៃខ្ពស់ជាងប្រទេសជិតខាង។ ដើម្បីបន្ថយថ្លៃដឹកជញ្ជូននៅតាមនាវា រដ្ឋាភិបាល និងអ្នកដែលពាក់ព័ន្ធ ត្រូវបង្កើតឲ្យមានក្រុមហ៊ុនផ្ដល់សេវាកម្មលើកដាក់ទំនិញនេះឲ្យកាន់តែច្រើន ដើម្បីបង្កើនភាពប្រកួតប្រជែងក្នុងការកាត់បន្ថយថ្លៃដឹកជញ្ជូនទំនិញជាដើម។
ប្រធានក្រុមហ៊ុនដឹកជញ្ជូនទំនិញ អិល.អេ វឺលវ៉ាយ ឡូជីសស្ទិច (LA World Wide Logistics) នៅតាមកំពង់ផែ ព្រះសីហនុ លោក ហង់ សុបាលីយ៉ា មានប្រសាសន៍ថា សេវាលើកដាក់ទំនិញតាមកប៉ាល់មានតម្លៃខ្ពស់ ដោយសារតែនៅកំពង់ផែ ព្រះសីហនុ មានក្រុមហ៊ុនតែមួយជាអ្នកទទួលខុសត្រូវ និងកំណត់ថ្លៃលើកដាក់ទំនិញ ដោយគ្មានការប្រកួតប្រជែងពីក្រុមហ៊ុនដទៃទៀតឡើយ។
លោក ហង់ សុបាលីយ៉ា មានប្រសាសន៍បន្ថែមថា បើប្រទេសកម្ពុជា ជាប្រទេសដែលចាប់យកទីផ្សារសេរី គួរតែលើកទឹកចិត្តឲ្យក្រុមហ៊ុនដទៃទៀតអាចវិនិយោគ បង្កើតភ្នាក់ងារលើកដាក់ទំនិញតាមកប៉ាល់ដោយគ្មានការរារាំងពីស្ថាប័នពាក់ព័ន្ធទាំងអស់។
បន្ថែមលើបញ្ហានេះ ប្រទេសកម្ពុជា មានតែភ្នាក់ងារកម្ពុជា នាវាចរណ៍តែមួយគត់ ជាការវិនិយោគរវាងភាគីរដ្ឋ និងឯកជន។ ក្រុមហ៊ុននេះជាអ្នកទទួលខុសត្រូវលើការលើកដាក់ទំនិញ ដែលហៅថា ភ្នាក់ងារកម្ពុជា នាវាចរណ៍ ដែលហៅកាត់ កាំសាប ដែលបានបង្កើតឡើងរយៈពេល ៣០ឆ្នាំមកហើយនោះ។
អ្នកគ្រប់គ្រងផ្នែកដឹកជញ្ជូនរបស់ក្រុមហ៊ុន ស៊ី.ដាប់បលយូ.ធី (CWT Commodity Cambodia) លោក យន់ ភិរុណ បានឲ្យដឹងថា ប្រទេសកម្ពុជា មានភ្នាក់ងារតែមួយដែលរដ្ឋាភិបាលបានបង្កើតរវាងវិស័យឯកជន ដើម្បីសហការជាមួយកំពង់ផែ ដើម្បីទទួលខុសត្រូវលើកដាក់ទំនិញដែលចតនៅកំពង់ផែ។ លោកបញ្ជាក់ថា កំណត់ថ្លៃ គឺមានភាពស្រដៀងគ្នាទៅនឹងប្រទេសនានានៅលើពិភពលោក។
លោក យន់ ភិរុណ បានបន្ថែមថា ក្រុមហ៊ុនរបស់លោកជាក្រុមហ៊ុនដឹកទំនិញបន្តទៅឲ្យភ្នាក់ងារលើកដាក់ទំនិញ នៅតាមកំពង់ផែ ព្រះសីហនុ ហើយការកំណត់ថ្លៃដឹកទំនិញបន្ត គឺជាការកំណត់តាំងពីសម័យក្រោមការដឹកនាំរបស់ព្រះបាទ នរោត្តម ព្រះសីហនុ ក្នុងទសវត្សរ៍ឆ្នាំ៨០។
ក្រុមហ៊ុនដឹកនាំទំនិញបន្តទៅកាន់កំពង់ផែ ដែលហៅថា ឡូជីសស្ទិច ហ្វរវឺតឌឺ (Logistic forwarders) បានរិះគន់ថា ថ្លៃលើកដាក់ទំនិញតាមកប៉ាល់ និងថ្លៃដឹកជញ្ជូនបន្តមានតម្លៃថ្លៃជាងប្រទេសជិតខាង ដោយសារតែប្រទេសកម្ពុជា មានក្រុមហ៊ុនតែមួយដែលទទួលខុសត្រូវលើការលើកដាក់ទំនិញតាមកប៉ាល់ទាំងនោះ។
ឆ្លើយតបទៅនឹងបញ្ហានេះ ប្រតិភូរាជរដ្ឋាភិបាលទទួលបន្ទុកភ្នាក់ងារកម្ពុជា នាវាចរណ៍ ដែលហៅកាត់ថា កាំសាប លោក រស់ វណ្ណា មានប្រសាសន៍ថា បច្ចុប្បន្នប្រទេសកម្ពុជា មានក្រុមហ៊ុនច្រើនដែលធ្វើការជាភ្នាក់ងារលើកដាក់ទំនិញនៅតាមកំពង់ផែនានានៅប្រទេសកម្ពុជា។
លោក រស់ វណ្ណា មានប្រសាសន៍បន្ថែមថា កិច្ចការរបស់ភ្នាក់ងារកម្ពុជា នាវាចរណ៍ ដែលហៅកាត់ថា កាំសាប គឺធ្វើការជាអ្នកតំណាងឲ្យភ្នាក់ងារនាវាបរទេស ដែលដឹកទំនិញចតនៅកំពង់ផែ ព្រះសីហនុ។ បច្ចុប្បន្ន នាវាបានដឹកទំនិញឆ្លងកាត់កំពង់ផែ បានកើនឡើងគួរឲ្យកត់សម្គាល់នៅរយៈពេលចុងក្រោយនេះ។
ទាក់ទងនឹងបញ្ហានេះ អគ្គនាយករងនៃកំពង់ផែស្វយ័តព្រះសីហនុ លោក ម៉ា ស៊ុនហួត មានប្រសាសន៍ថា តម្លៃដឹកជញ្ជូនតាមនាវាមានតម្លៃខ្ពស់ គឺអាស្រ័យលើទំហំរបស់កប៉ាល់ដែលផ្ទុកទំនិញនាំចេញពីប្រទេសកម្ពុជា បានតិចតួច។ លោកបញ្ជាក់ទៀតថា ចំពោះការលើកដាក់ទំនិញ គឺមានតម្លៃប្រហាក់ប្រហែលនឹងប្រទេសជិតខាងដែរ។
លោក ម៉ា ស៊ុនហួត មានប្រសាសន៍បន្ថែមថា ការកំណត់ថ្លៃលើកដាក់ទំនិញនៅកំពង់ផែ គឺចេញពីការព្រមព្រៀងរបស់ក្រុមប្រឹក្សារបស់កំពង់ផែ ព្រះសីហនុ។ ប៉ុន្តែ ការកំណត់ថ្លៃលើការដឹកទំនិញចេញពីកំពង់ផែ មិនមែនជាការកំណត់របស់ក្រុមប្រឹក្សាកំពង់ផែ ឡើយ។ លោកបញ្ជាក់ថា ភ្នាក់ងារកម្ពុជា នាវាចរណ៍ ដែលហៅកាត់ថា កាំសាប ជាអ្នកទទួលខុសត្រូវលើកដាក់ទំនិញដាក់កប៉ាល់ ជាថ្នូរនឹងតម្លៃសេវាកម្មដែលបានកំណត់រួចជាស្រេច។
ទោះជាយ៉ាងណា អ្នកវិភាគសេដ្ឋកិច្ចបានពន្យល់ថា ការបើកឲ្យមានវិនិយោគច្រើនលើវិស័យណាមួយ នឹងធ្វើឲ្យអ្នកប្រើប្រាស់ចំណេញច្រើន។ វិស័យឯកជនដែលវិនិយោគផលិតទំនិញណាមួយ បានដើរតួនាទីសំខាន់ ដើម្បីជួយពន្លឿនការធ្វើពាណិជ្ជកម្ម និងសេដ្ឋកិច្ចជាតិ ប៉ុន្តែទំនិញសាធារណៈសំខាន់មួយចំនួនដែលជាតម្រូវការមូលដ្ឋានរបស់ប្រជាពលរដ្ឋ ដូចជាទឹក ភ្លើង ក៏មិនអាចឲ្យវិស័យឯកជនជាអ្នកទទួលខុសត្រូវឡើយ ដើម្បីជៀសវាងការផ្ដាច់មុខ និងឡើងថ្លៃតាមទំនើងចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។