បច្ចុប្បន្ន ប្រជាពលរដ្ឋនៅខេត្តឧត្តរមានជ័យ ខ្លះត្រូវបានគេរឹបអូសយកផ្ទះសម្បែង និងខ្លះបង្ខំចិត្តលក់ដីស្រែចម្ការយកទៅសងបំណុលដែលខ្លួនជំពាក់ រួចហើយធ្វើចំណាកស្រុកចាកចោលកន្លែងដែលពួកគេធ្លាប់រស់នៅ។ ការធ្វើចំណាកស្រុកនេះ ប្រជាពលរដ្ឋខ្លះបានផ្លាស់ប្ដូរទីលំនៅទៅរស់នៅតំបន់ព្រៃឆ្ងាយៗ និងមួយចំនួនទៀត បានឆ្លងដែនខុសច្បាប់ទៅរកការងារធ្វើនៅឯប្រទេសថៃ។
មន្ត្រីសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ សម្ដែងការព្រួយបារម្ភទៅលើប្រជាពលរដ្ឋជាច្រើនដែលចេះតែនាំគ្នាធ្វើចំណាកស្រុក។ ការព្រួយបារម្ភនេះ កើតឡើងបន្ទាប់ពីគេមើលឃើញថា ពេលបច្ចុប្បន្នមានប្រជាពលរដ្ឋកាន់តែច្រើនឡើងៗ បានវ័ណ្ឌកជំពាក់បំណុលមីក្រូហិរញ្ញវត្ថុ និងឯកជន។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តឧត្តរមានជ័យ គឺលោក ស្រី ណារ៉េន។ លោកមានប្រសាសន៍កាលពីរសៀលថ្ងៃច័ន្ទ ទី៤ ខែកក្កដា ថា ពេលបច្ចុប្បន្ន ប្រជាពលរដ្ឋនៅខេត្តនេះបានជំពាក់បំណុលកាន់តែច្រើនឡើងៗ។ ប្រជាពលរដ្ឋខ្លះដែលជំពាក់បំណុលគេធ្ងន់ធ្ងរ រកអ្វីសងមិនបាន រហូតដល់ទៅគេរឹបអូសយកផ្ទះសម្បែង ព្រមទាំងលក់ដីធ្លីធ្វើចំណាកស្រុកក៏មាន។
លោក ស្រី ណារ៉េន បញ្ជាក់ថា នៅសង្កាត់អូរស្មាច់ លើខ្នងភ្នំដងរែក គឺចំនួនអ្នកជំពាក់បំណុលបានកើនច្រើនឡើង ដោយសារតែប្រជាពលរដ្ឋទីនោះមិនសូវមានមុខរបរច្បាស់លាស់ ហើយចេះតែខ្ចី ឬក៏ចងការលុយពីឯកជន មកប្រកបមុខរបរតូចតាច ព្រមទាំងដោះស្រាយជីវភាពប្រចាំថ្ងៃ៖ « មែនទែនទៅ កិច្ចសន្យាខ្លះធ្វើយកប្រាក់ការថ្លៃពេក វាធ្វើឲ្យប្រាក់កម្ចីតិចតួច តែរត់ការមិនរួច ហើយបំណុលចេះតែកើនឡើង »។
លោក ស្រី ណារ៉េន បញ្ជាក់ថា ក្នុងមួយខែៗយ៉ាងហោចណាស់ក៏មានប្រជាពលរដ្ឋ ២នាក់បានមកពិគ្រោះយោបល់ជាមួយរូបលោក ព្រមទាំងសុំឲ្យជួយអន្តរាគមន៍ជុំវិញរឿងសងបំណុលនេះ។
ទោះជាយ៉ាងណា វិទ្យុអាស៊ីសេរី មិនអាចសុំការអធិប្បាយពីអភិបាលក្រុងសំរោង លោក អ៊ុន សុភក្ត្រ ជុំវិញបញ្ហាកង្វល់រឿងបំណុលនោះបានថាយ៉ាងណានៅឡើយ នៅថ្ងៃទី៤ ខែកក្កដា។
បុរសឈ្មោះ ចិន យស នៅភូមិអូរបាត់ដាវ សង្កាត់បន្សាយរាក់ ក្រុងសំរោង ដែលជំពាក់បំណុលមីក្រូហិរញ្ញវត្ថុ បានលក់ដីស្រែ ១ហិកតារសងគេមិនទាន់រួចនៅឡើយ មានប្រសាសន៍ថា កាលពីឆ្នាំ២០១៥ គាត់បានខ្ចីប្រាក់ពីមីក្រូហិរញ្ញវត្ថុចំនួន ២ផ្សេងគ្នានូវទឹកប្រាក់ ១.០០០ដុល្លារអាមេរិក ដើម្បីយកទៅដាំដំឡូងមី។ ក៏ប៉ុន្តែដំឡូងឆ្នាំមុនមិនបានផល បណ្ដាលឲ្យជីវភាពគ្រួសាររបស់គាត់ដុនដាប ដោយសារតែជំពាក់បំណុល។
បុរសដដែលបញ្ជាក់ថា ជាច្រើនខែមុនគាត់បានលក់ដីស្រែទំហំ ១ហិកតារ ដើម្បីយកប្រាក់ទៅសងមីក្រូហិរញ្ញវត្ថុ ប៉ុន្តែសងមិនគ្រប់ រហូតធ្វើឲ្យគាត់ព្រាត់ប្រាសគ្រួសារ គឺប្រពន្ធបានចេញទៅធ្វើការនៅស្រុកថៃ ចោលរូបគាត់៖ « ខ្ញុំជំពាក់ ខ្ញុំបង់រាល់តែថ្ងៃ រាល់តែខែ ខ្ញុំយ៉ាប់ណាស់។ ប្រពន្ធខ្ញុំទៅធ្វើការនៅថៃ ឯខ្ញុំនៅទីនេះធ្វើការដោះបំណុលគេតាមកម្មវាសនា »។
សមាគមការពារសិទ្ធិមនុស្សអាដហុក ខេត្តឧត្តរមានជ័យ រកឃើញថា អ្នកមានលុយខ្លះ គឺអាងអ្នកមានអំណាចនៅពីក្រោយខ្នង បានយកប្រាក់ទៅឲ្យប្រជាពលរដ្ឋខ្ចី ហើយធ្វើកិច្ចសន្យាការប្រាក់ខ្ពស់ហួសហេតុ ដែលធ្វើឲ្យកូនបំណុលកាន់តែវ័ណ្ឌកទៅៗ។ សមាគមការពារសិទ្ធិមនុស្សអាដហុក ចង់ឲ្យអាជ្ញាធររដ្ឋាភិបាល គួរតែពិនិត្យឡើងវិញទៅលើឯកជន និងមីក្រូហិរញ្ញវត្ថុខ្លះដែលធ្វើកិច្ចសន្យាយកការប្រាក់ពីប្រជាពលរដ្ឋថ្លៃហួសហេតុនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។