មន្ត្រីជាន់ខ្ពស់រដ្ឋាភិបាលកម្ពុជា អះអាងថា ស្ថានការណ៍នៅតាមបន្ទាត់ព្រំដែនកម្ពុជា មានសភាពស្ងប់ស្ងាត់ ហើយអាជ្ញាធរប្រទេសទាំងពីរបានបន្តកិច្ចសហប្រតិបត្តិការ និងមានទំនាក់ទំនងល្អជាមួយគ្នាធម្មតា នៅក្រោយកើតមានរដ្ឋប្រហារយោធាក្នុងប្រទេសថៃ។
ប៉ុន្តែ មន្ត្រីសង្គមស៊ីវិលមានការព្រួយបារម្ភចំពោះការបិទច្រករបៀងតូចៗរបស់ភាគីថៃ នៅតាមខេត្តជាប់ព្រំដែន ថាបានបង្កការលំបាកដល់ពលករខ្មែរចំណាកស្រុក ទៅធ្វើការងារនៅប្រទេសថៃ។
លោក ផៃ ស៊ីផាន មន្ត្រីនាំពាក្យ និងជារដ្ឋលេខាធិការទីស្ដីការគណៈរដ្ឋមន្ត្រី មានប្រសាសន៍នៅថ្ងៃសុក្រ ទី២៣ ខែឧសភា ថាទោះរដ្ឋាភិបាលថៃ ត្រូវមេបញ្ជាការយោធាថៃ ធ្វើរដ្ឋប្រហារបែបណាក្តី ក៏ទាំងភាគីកម្ពុជាថៃ នៅបន្តរក្សាទំនាក់ទំនងល្អជាមួយគ្នាធម្មតា។
លោកបន្តថា ចលាចលនៅក្នុងប្រទេសមិនជះឥទ្ធិពលដល់សហប្រតិបត្តិការរវាងប្រទេសទាំងពីរទេ ហើយអាជ្ញាធរនៅតាមព្រំដែនកម្ពុជាថៃ បានបន្តរក្សាទំនាក់ទំនងជាមួយគ្នាធម្មតា៖ «ពេលនេះ គឺស្ថានភាពនៅដដែល ហើយទំនាក់ទំនងល្អរវាងយោធាកម្ពុជា និងយោធារបស់ថៃ គឺអត់មានអ្វីប្រែប្រួលទេ។ យើងនៅមានការជជែកគ្នាទៅវិញទៅមក។ ចំពោះគោលជំហររបស់យោធាកម្ពុជា ហ្នឹង គឺទទួលបានការផ្តាំផ្ញើរបស់សម្ដេចអគ្គមហាសេនាបតីតេជោ ហ៊ុន សែន មុនដែលលោកចេញទៅក្រៅប្រទេស គឺលោកសុំឲ្យរក្សាទំនាក់ទំនងល្អ។ ទោះជាស្ថានការណ៍ប្រទេសថៃ វិវឌ្ឍន៍ទៅដល់ណា គឺមិនមែនជាទិសដៅនៃការជជែករបស់កម្ពុជា ទេ គឺទុកសេចក្តីសម្រេចរបស់ប្រជាពលរដ្ឋថៃ ដែលជាម្ចាស់អំណាច»។
ទាក់ទងភាពវឹកវរនេះ រាជរដ្ឋាភិបាលកម្ពុជា បានដាក់ចេញនូវបទបញ្ជាចំនួន ៣ចំណុច ជូនមេបញ្ជាការកម្លាំងប្រដាប់អាវុធគ្រប់ផ្នែកនៅខេត្តតាមព្រំដែនកម្ពុជាថៃ ឲ្យបន្តកិច្ចសហការល្អជាមួយថៃ និងមិនត្រូវចល័តកម្លាំងទ័ពជាដាច់ខាត។
បទបញ្ជាចុះថ្ងៃទី២២ ខែឧសភា ចុះហត្ថលេខាដោយ លោក ស ខេង នាយករដ្ឋមន្ត្រីស្តីទី មានខ្លឹមសារថា ដើម្បីរក្សាសន្តិសុខ កិច្ចសហប្រតិបត្តិការ និងការអភិវឌ្ឍតាមព្រំដែនកម្ពុជា ជាមួយភាគីថៃ ឲ្យនៅដដែល មេបញ្ជាការកងទ័ព និងប៉ូលិស ត្រូវណែនាំដល់កងកម្លាំងឈរជើងការពារព្រំដែន ឲ្យបន្តទំនាក់ទំនងល្អជាមួយថៃ។ ជាងនេះ ក៏ត្រូវពិនិត្យតាមដានរាល់ការវិវឌ្ឍន៍សភាពការណ៍នៅប្រទេសថៃ ឬតាមព្រំដែន និងរាយការណ៍ជូនទីស្ដីការគណៈរដ្ឋមន្ត្រីឲ្យបានទាន់ពេល។
ត្រង់ចំណុចនេះ លោក ផៃ ស៊ីផាន ថ្លែងអះអាងថា ការទំនាក់ទំនងរវាងកងទ័ពប្រទេសទាំងពីរ គឺនៅរក្សាដដែល និងគ្មានការចល័តកម្លាំងទ័ពទេ។
បញ្ហានេះដែរ លោក ស៊ុម ចាន់គា មន្ត្រីមន្ត្រីសម្របសម្រួលសមាគមអាដហុក (adhoc) ប្រចាំខេត្តបន្ទាយមានជ័យ ថ្លែងថា អំឡុងពេលមានស្ថានការណ៍វឹកវរ ឬរដ្ឋប្រហារនៅថៃ ច្រករបៀងតូចៗនៅតាមខេត្តជាប់ព្រំដែន ត្រូវភាគីថៃ បិទជាបណ្ដោះអាសន្ន។ លោកថា ការបិទច្រករបៀងនេះ អាចបង្កផលវិបាកដល់ពលករខ្មែរ ចេញទៅធ្វើការនៅក្នុងប្រទេសថៃ ឬការដោះដូរទំនិញផ្សេងៗរវាងពលរដ្ឋទាំងពីរប្រទេស៖ «ការបិទច្រកនេះឃើញថា បានប៉ះពាល់យ៉ាងខ្លាំងដល់ខ្មែរយើង ដែលកំពុងរស់នៅធ្វើការនៅក្នុងទឹកដីថៃ ជាច្រើនម៉ឺនសែននាក់។ នៅក្នុងហ្នឹង បើពួកគេចង់ត្រឡប់មកវិញ គឺពិបាកមិនអាចចេញចូលបាន ដោយសារតែខ្មែរយើងដែលចេញចូលទៅធ្វើការងារនៅប្រទេសថៃ គឺមិនអាចទៅធ្វើការតាមផ្លូវត្រង់ទេ គឺមានតែតាមផ្លូវច្រករបៀង ដែលត្រូវរ៉ូវជាមួយមន្ត្រីអាជ្ញាធរច្រក ឬក៏មន្ត្រីថៃ ផង និងខ្មែរផង ជាដើម»។
មន្ត្រីសិទ្ធិមនុស្សរូបនេះ កត់សម្គាល់ថា នៅថ្ងៃសុក្រ ទី២៣ ខែឧសភា ច្រកព្រំដែនកម្ពុជាថៃ មួយចំនួនមានដូចជា ច្រកព្រំដែនប៉ោយប៉ែត ច្រកជាំសាងុំា និងអូស្មាច់ ជាដើម គឺមានស្ថានភាពខុសប្លែករាល់ថ្ងៃ ដោយអាជ្ញាធរថៃ និងកម្ពុជា បានស្នើឲ្យប្រជាពលរដ្ឋ ឬអាជីវកររៀងៗខ្លួន ប្រុងប្រយ័ត្ន និងរក្សាភាពស្ងៀមស្ងាត់។
ទាក់ទិនបញ្ហានេះ លោក កុយ គួង មន្ត្រីនាំពាក្យក្រសួងការបរទេសកម្ពុជា ឲ្យដឹងដែរថា កម្ពុជា កំពុងតាមដានការវិវឌ្ឍន៍នៃស្ថានការណ៍នយោបាយក្នុងប្រទេសថៃ ដោយយកចិត្តទុកដាក់។ លោកថា មកដល់ល្ងាចថ្ងៃសុក្រ ទី២៣ ខែឧសភា ស្ថានការណ៍នៅតាមបន្ទាត់ព្រំដែនកម្ពុជាថៃ មានសភាពស្ងប់ស្ងាត់ ហើយអាជ្ញាធរខេត្តជាប់ព្រំដែនប្រទេសទាំងពីរ នៅបន្តសហប្រតិបត្តិការល្អជាមួយគ្នាធម្មតា៖ «ខ្ញុំមិនបានឮថាមានភាពខុសប្លែកអីទេមកដល់ពេលនេះ មានន័យថា ប្រព្រឹត្តទៅជាធម្មតា។ អ្វីដែលខ្ញុំចង់និយាយ គឺពិសេសពលករខ្មែរយើងដែលកំពុងស្ថិតនៅក្នុងប្រទេសថៃ ត្រូវបន្តធ្វើការងារជាធម្មតា តាមកន្លែងរៀងៗខ្លួន។ ធ្វើយ៉ាងណា កុំឲ្យតែធ្វើសកម្មភាពណាមួយដែលផ្ទុយពីបទបញ្ជា និងច្បាប់ជាធរមាននៅក្នុងប្រទេសគេហ្នឹងទៅ»។
ទោះជាបែបណា មន្ត្រីរដ្ឋាភិបាលកម្ពុជា បានអំពាវនាវដល់កងកម្លាំងចម្រុះនៅខេត្តតាមព្រំដែន និងប្រជាពលរដ្ឋ ត្រូវបន្តទំនាក់ទំនងល្អជាមួយអាជ្ញាធរ ឬពលរដ្ឋថៃ នៅក្នុងកាលៈទេសៈប្រទេសថៃ កំពុងមានទំនាស់ផ្ទៃក្នុងធ្ងន់ធ្ងរ។ ជាងនេះ ក៏រំឭកដល់អ្នកទេសចរ និងពលរដ្ឋខ្មែរទូទៅ ត្រូវផ្អាកឆ្លងចេញចូលទៅកាន់ប្រទេសថៃ ជាបណ្ដោះអាសន្ន រហូតស្ថានការណ៍នៅប្រទេសថៃ ស្ងប់ស្ងាត់។
កាលពីល្ងាចថ្ងៃទី២២ ខែឧសភា អគ្គមេបញ្ជាការកងទ័ពថៃ លោកឧត្ដមសេនីយ៍ ប្រាយុទ្ធ ចានអ៊ូចា បានធ្វើរដ្ឋប្រហាររដ្ឋាភិបាលថៃ ដើម្បីស្ដារស្ថានភាពវឹកវរនៅក្នុងប្រទេសនេះ។ ក្រោយធ្វើរដ្ឋប្រហារ លោក ប្រាយុទ្ធ ចានអ៊ូចា បានប្រកាសតាំងខ្លួនឯងជានាយករដ្ឋមន្ត្រី រង់ចាំប្រទេសថៃ មាននាយករដ្ឋមន្ត្រីថ្មីមកជំនួស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។