ការរកឃើញសពគ្រូបង្រៀន គឺបន្ទាប់ពីព្រះចៅអធិការវត្តថ្នាញ ត្រូវបានជនមិនស្គាល់មុខធ្វើឃាតដែរ កាលពីអាធ្រាត្រថ្ងៃទី២៣ ឧសភា នៅក្នុងទីអារាមនោះ។ បន្ទាប់ពីបានស៊ើបអង្កេត សមត្ថកិច្ចបានចេញការសន្និដ្ឋានពីដើមហេតុនៃអំពើឃាតកម្មនេះ។
មន្ត្រីនគរបាលខេត្តស្វាយរៀង អះអាងថា រឿងក្ដីឃាតកម្មលើចៅអធិការវត្ត និងគ្រូបង្រៀន គឺជាសំណុំរឿងពាក់ព័ន្ធនឹងការប្លន់សម្លាប់ ដែលមិនពាក់ព័ន្ធនឹងរឿងនយោបាយឡើយ។
ស្នងការរងនគរបាលខេត្តស្វាយរៀង លោក ឡឹក ចំរើន មានប្រសាសន៍ថា សមត្ថកិច្ចបានរកឃើញសាកសពគ្រូបង្រៀនឈ្មោះ សំ វុទ្ធី ដែលស្នាក់នៅក្នុងកុដិជាមួយព្រះតេជព្រះគុណ កែវ តូច និងបានបាត់ខ្លួននៅយប់មានឃាតកម្ម ថ្ងៃទី២៣ ខែឧសភា នោះនៅក្នុងត្រពាំងទឹក។ សមត្ថកិច្ចបានរកឃើញថា ទ្រព្យសម្បត្តិរបស់គាត់រួមមានម៉ូតូហុងដាឌ្រីម (Honda Dream) កុំព្យូទ័រយួរដៃ ប្រាក់កាស និងសម្ភារៈមួយត្រូវបាត់បង់។
កាលពីអាធ្រាត្រថ្ងៃទី២៣ ខែឧសភា ព្រះតេជព្រះគុណ កែវ តូច ព្រះជន្ម ៧៨ព្រះវស្សា ជាព្រះចៅអធិការវត្តថ្នាញ ស្ថិតនៅក្នុងសង្កាត់បាទី ក្រុងបាវិត ត្រូវធ្វើគត់នៅក្នុងវត្ត ដោយមានស្នាមជាំកខាងឆ្វេង រយះលើចិញ្ចើម និងទ្រុឌលលាដក្បាល។ ចំណែកគ្រូបង្រៀនម្នាក់ទៀតឈ្មោះ សំ វុទ្ធី ដែលស្នាក់នៅក្នុងកុដិជាមួយព្រះតេជព្រះគុណ កែវ តូច នោះ ក៏បានបាត់ខ្លួននៅយប់មានឃាតកម្មថ្ងៃទី២៣ ឧសភា នោះដែរ។
មន្ត្រីបក្សនយោបាយ និងសង្គមស៊ីវិល បានចុះស្វែងរកការពិតជុំវិញរឿងឃាតកម្មនេះ និងបានរកឃើញថា មានការសង្ស័យមួយចំនួន ប៉ុន្តែក៏ពុំទាន់មានការសន្និដ្ឋានថា រឿងក្ដីនេះថាជាប់ពាក់ព័ន្ធនឹងរឿងនយោបាយនៅឡើយ។
អ្នកស៊ើបអង្កេតជាន់ខ្ពស់នៃ អង្គការសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា លោកគ្រាន់តែអាចសន្និដ្ឋានថា ករណីនេះជាឃាតកម្មគ្រោងទុកជាមុន ដែលទាមទារអោយមានការស៊ើបអង្កេតបន្ថែមពីរឿងរ៉ាវដែលនៅពីខាងក្រោយ។
ភ្លាមៗនៅក្រោយករណីឃាតកម្មលើព្រះតេជព្រះគុណ កែវ តូច មន្ត្រីបក្សនយោបាយបានសង្ស័យថា នេះជារឿងដែលអាចពាក់ព័ន្ធដល់ការគំរាមកំហែងផ្នែកនយោបាយ នៅពេលដែលព្រះសង្ឃអង្គនេះមានកូនប្រុស និងសមាជិកគ្រួសារជាច្រើននាក់ទៀត ជាសកម្មជនគណបក្សសង្គ្រោះជាតិ។ ប៉ុន្តែ ក្រោយមក មន្ត្រីគណបក្សនយោបាយបានសុំពេលវេលាធ្វើការស្រាវជ្រាវសិន មុនឈានដល់ការសន្និដ្ឋានថា អំពើមនុស្សឃាតនេះទាក់ទងរឿងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។