ប្រជាពលរដ្ឋធ្វើដំណើរតាមផ្លូវជាតិលេខ១ ដែលត្រូវឆ្លងកាត់ទន្លេមេគង្គនៅចំណុចអ្នកលឿងនោះ នឹងបានប្រើប្រាស់ស្ពានឆ្លងជំនួសឆ្លងសាឡាង នៅដើមខែមេសា ឆ្នាំ២០១៥ ខាងមុខនេះ។
មន្ត្រីនៃក្រសួងសាធារណការ ឲ្យដឹងថា ក្រុមវិស្វករសាងសង់ស្ពាន នឹងខិតខំប្រឹងប្រែងបញ្ចប់ការងារ ដើម្បីបើកស្ពានឲ្យប្រជាពលរដ្ឋប្រើប្រាស់បានក្នុងពេលចូលឆ្នាំខ្មែរមកដល់។
មន្ត្រីក្រសួងសាធារណការ និងដឹកជញ្ជូន បានឲ្យដឹងនៅថ្ងៃទី២៦ ខែធ្នូ ឆ្នាំ២០១៤ ថា ស្ពានអ្នកលឿងឆ្លងកាត់ទន្លេមេគង្គ នឹងត្រូវបើកឲ្យពលរដ្ឋប្រើប្រាស់នៅសប្ដាហ៍ទី១ នៃខែមេសា ឆ្នាំ២០១៥ ខាងមុខ។
ប្រធាននាយកដ្ឋានសហប្រតិបត្តិការអន្តរជាតិ នៃក្រសួងសាធារណការ និងដឹកជញ្ជូន គឺលោក ឈឹម ផល្លា មានប្រសាសន៍ថា ប្រមុខរដ្ឋាភិបាល និងអនុរដ្ឋមន្ត្រីក្រសួងការបរទេសជប៉ុន តំណាងឲ្យរដ្ឋាភិបាលជប៉ុន នឹងធ្វើពិធីចាក់បេតុងដើម្បីតភ្ជាប់តំណស្ពាននៅថ្ងៃទី១៤ ខែមករា ឆ្នាំ២០១៥៖ «រដ្ឋាភិបាលនឹងបើកឲ្យប្រជាពលរដ្ឋប្រើប្រាស់មុនពេលចូលឆ្នាំខ្មែរ បើទោះជាសល់ការងារខ្លះមិនទាន់ហើយក៏ដោយ ពួកគាត់នឹងធ្វើឲ្យរួចរាល់។ ប្រមុខរដ្ឋាភិបាលនឹងមកចាក់បេតុងតភ្ជាប់ស្ពាននៅថ្ងៃទី១៤ ខែមករា ឆ្នាំ២០១៥ ហើយបើកឲ្យប្រើដើមខែមេសា»។
ស្ពានអ្នកលឿងជាស្ពានមួយតភ្ជាប់ស្រុកពីរ ឋិតនៅត្រើយម្ខាងម្នាក់នៃទន្លេមេគង្គក្រោម នៃស្រុកលើកដែក ខេត្តកណ្ដាល និងស្រុកពាមរ ខេត្តព្រៃវែង។ ស្ពាននេះមានប្រវែងបណ្ដោយ ២.២១៥ម៉ែត្រ ទទឹង ១៣ម៉ែត្រកន្លះ ជាជំនួយឥតសំណងរបស់ប្រទេសជប៉ុន មានទឹកប្រាក់ប្រមាណជាង ៩៥លានដុល្លារសហរដ្ឋអាមេរិក។
ប្រធានក្រុមហ៊ុនសាងសង់ស្ពានអ្នកលឿង លោក អ៊ីកូ គិតាដា (Ikoo Kitada) មានប្រសាសន៍ថា ស្ពានអ្នកលឿងដែលមានកម្ពស់សសរបេតុងប្រវែង ៣០០ម៉ែត្រនេះ ជាប្រភេទស្ពានដែលវែងបើធៀបទៅប្រទេសជប៉ុន ឬទៅពិភពលោកនោះ៖ «វាពិបាកក្នុងការប្រៀបធៀបរវាងស្ពានគីសូណា ខេត្តកំពង់ចាម និងស្ពានអ្នកលឿង ព្រោះថា ស្ពានគីសូណា ធ្វើដោយបេតុងប្រអប់ ហើយស្ពានអ្នកលឿងបេតុងស្ដើង ហើយមានយោង ដោយមើលទៅមានសោភណភាពជាង។ ស្ពានដែលមានសសរស្ពានកម្ពស់ ៣០០ម៉ែត្រនេះជាស្ពានដែលមានកម្ពស់វែងក្នុងចំណោមស្ពាននានានៅពិភពលោក»។
ទោះជាយ៉ាងណា ពលរដ្ឋដែលធ្វើដំណើរឆ្លងកាត់អ្នកលឿង សម្ដែងក្ដីរីករាយនៅពេលដែលឮដំណឹងថា ស្ពានអាចឲ្យពលរដ្ឋប្រើប្រាស់បានក្នុងពេលឆាប់ៗនេះ។
អ្នកបើករថយន្តឈ្នួលម្នាក់ឈ្មោះ ស្រស់ បានថ្លែងថា លោកនឹងបានធ្វើដំណើរទៅមកទីក្រុងភ្នំពេញបានលឿន ហើយម្យ៉ាងទៀតមិនចំណាយប្រាក់ដើម្បីឆ្លងសាឡាងផង៖ «ខ្ញុំទិញសំបុត្រឡានឆ្លង ៩ពាន់ សំបុត្រសម្រាប់មនុស្សជិះ ១ពាន់ ហើយថ្លៃហែកសំបុត្រ ៥ពាន់ សរុបគឺ ១ម៉ឺន ៥ពាន់។ ខ្ញុំគិតថា ប្រសិនបើស្ពានធ្វើហើយ គឺបើកបរលឿន ហើយងាយស្រួលទៀត»។
ប្រធាននាយកដ្ឋានសហប្រតិបត្តិការអន្តរជាតិ នៃក្រសួងសាធារណការ និងដឹកជញ្ជូន គឺលោក ឈឹម ផល្លា មានប្រសាសន៍ថា ស្ពានអ្នកលឿងនេះ ក្រៅពីតភ្ជាប់ប្រជាពលរដ្ឋនៅក្នុងប្រទេស វាជាស្ពានមួយដែលតភ្ជាប់សេដ្ឋកិច្ចរបស់ប្រទេសនៅក្នុងតំបន់ទាំងមូល ដែលមានតម្លៃមិនអាចកាត់ថ្លៃបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។