លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានឲ្យដឹងថា សមាគមនេះបានដាក់លិខិតសុំជួប លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ដោយកំណត់យកថ្ងៃទី២៧ ខែវិច្ឆិកា ដើម្បីលើកពីកម្រិតស្ថានភាពគ្រូបង្រៀន និងស្ថានភាពវិស័យអប់រំនៅកម្ពុជា។ ប៉ុន្តែលោកថា លិខិតដាក់ជូនក្រសួងអប់រំ តាំងពីថ្ងៃទី២១ ខែវិច្ឆិកា គ្មានការឆ្លើយតបបែបណាពីក្រសួងអប់រំ ទេមកដល់ពេលនេះ។
«សំឡេង»
លោក រ៉ុង ឈុន ឲ្យដឹងថា ការណាត់ជួបលោករដ្ឋមន្ត្រីក្រសួងអប់រំ គឺមានបំណងចូលរួមចំណែកកែលំអស្ថានភាពជីវភាពគ្រូបង្រៀន និងកែលំអគុណភាពអប់រំនៅកម្ពុជា ឲ្យបានប្រសើរនាថ្ងៃអនាគត។ របៀបវារៈសំខាន់ចំនួន៤ ដែល លោក រ៉ុង ឈុន ស្នើចូលជួប លោក ហង់ ជួនណារ៉ុន រួមមាន ការកែលំអការរៀន ការបង្រៀន និងបរិស្ថានអប់រំ ការបង្កើនមូលនិធិចំពោះវិស័យអប់រំ ការកែលំអនៃការចូលរួមនូវរាល់អ្នកពាក់ព័ន្ធក្នុងវិស័យអប់រំ និងការកែលំអគុណភាពគ្រូ និងកែលំអគុណភាពនៃការអប់រំ។
ទោះជាបែបណា លោក សំ សេរីរ័ត្ន អគ្គនាយកនៃអគ្គនាយកដ្ឋានអប់រំ មានប្រសាសន៍ថា មិនបានទទួលលិខិតសមាគមគ្រូបង្រៀនស្នើជួបពិភាក្សាជាមួយលោករដ្ឋមន្ត្រីក្រសួងអប់រំ នៅឡើយទេ មកដល់រសៀលថ្ងៃទី២៨ ខែវិច្ឆិកា។
ផ្ដើមពីបញ្ហានេះ លោក រ៉ុង ឈុន គ្មានជំនឿថា លោក ហង់ ជួនណារ៉ុន អាចកែលំអវិស័យអប់រំបានទេ ដរាបណាមិនបានយកចិត្តទុកដាក់ទៅលើកង្វល់ ឬការរិះគន់របស់ក្រុមគ្រូបង្រៀនយកទៅពិនិត្យ និងកែលំអឲ្យបានច្រើននោះ។
យ៉ាងណាក៏ដោយ លោក ហង់ ជួនណារ៉ុន រដ្ឋមន្ត្រីក្រសួងអប់រំថ្មី បានអះអាងប្រាប់ប្រព័ន្ធផ្សព្វផ្សាយក្នុងស្រុកថា នឹងជំរុញកែលំអគុណភាពអប់រំ និងបញ្ហាប្រឈមនានា ដែលកើតមាននៅក្នុងវិស័យអប់រំឲ្យបានប្រសើរ នៅក្នុងអាណត្តិដឹកនាំរបស់លោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។