ប៉ូលិសចរាចរណ៍ជើងគោកនៅរាជធានីភ្នំពេញ នឹងរៀបចំឲ្យមានក្រុមចល័តពិសេស ចាំត្រួតពិនិត្យសកម្មភាពរបស់ប៉ូលិសនៅតាមទីសាធារណៈ ដែលទទួលសំណូក និងបង្កើតប៉ុស្តិ៍ត្រួតពិនិត្យតាមផ្លូវក្នុងរាជធានីភ្នំពេញ។
ស្នងការរងរាជធានីភ្នំពេញ និងជាអតីតនាយការិយាល័យនគរបាលចរាចរណ៍ជើងគោក លោក ហេង ចាន់ធារី មានប្រសាសន៍នៅថ្ងៃទី១១ ខែកុម្ភៈ ថា អគ្គស្នងការដ្ឋាននគរបាលរាជធានីភ្នំពេញ នឹងរឹតបន្តឹងការអនុវត្តច្បាប់ចរាចរណ៍ តាមរយៈបង្កើតអង្គភាពពិសេស ឲ្យតាមដានមន្ត្រីអនុវត្តន៍ច្បាប់ចរាចរណ៍ប្រចាំការនៅតាមផ្លូវសាធារណៈ ឲ្យអនុវត្តច្បាប់ចរាចរណ៍ជើងគោកឲ្យបានត្រឹមត្រូវ។
លោក ហេង ចាន់ធារី បន្តថា អង្គភាពពិសេសនេះបង្កើតដោយស្ថាប័ននគរបាលចំនួន ៥ការិយាល័យ និងអធិការដ្ឋាននគរបាលគ្រប់ខណ្ឌក្នុងរាជធានីភ្នំពេញ ដើម្បីកែទម្រង់អ្នកអនុវត្តន៍ច្បាប់មិនឲ្យពុករលួយ និងមិនឲ្យបង្កើតប៉ុស្តិ៍ត្រួតពិនិត្យអានាធិបតេយ្យ គឺឲ្យអប់រំអ្នកធ្វើចរាចរ ឲ្យគោរពច្បាប់ចរាចរណ៍ និងគោរពជីវិតអ្នកដទៃ៖ «ក្នុងនេះយើងមានកម្លាំងចម្រុះ ដែលយើងបង្កើតបានជាក្រុមចល័តនេះ គឺយើងមានការិយាល័យរហូតទៅដល់៥ អធិការដ្ឋាន ខណ្ឌទាំង៩ មកចូលរួម គឺធ្វើនេះក្នុងខណ្ឌទាំង ៩សិន។ កន្លងមក គឺយើងមានការរឹតបណ្ដឹងច្បាប់ហើយ ប៉ុន្តែគ្រាន់ថាសុំឲ្យប្រជាពលរដ្ឋហ្នឹង លោកភ្ញាក់រលឹកចូលរួមដោយខ្លួនឯង អ្នកដែលប្រើប្រាស់យានហ្នឹង។ អ៊ីចឹង ពាក់មួកហ្នឹងមិនមែនគ្រោះថ្នាក់ចរាចរណ៍ទៅស្លាប់ប៉ូលិសឯណា គឺគ្រោះថ្នាក់ខ្លួនឯង»។
នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល ថ្លែងកោតសរសើរអគ្គស្នងការដ្ឋាននគរបាលជាតិ ដែលបង្កើតអង្គភាពថ្មីនេះ ដើម្បីត្រួតពិនិត្យមន្ត្រីរបស់ខ្លួនឲ្យអនុវត្តច្បាប់ចរាចរណ៍ត្រឹមត្រូវ មិនលម្អៀងតាមទឹកប្រាក់សូកប៉ាន់។ លោកថា ការបង្កើតអង្គភាពពិសេសនេះ គឺរួមចំណែកឲ្យមន្ត្រីចរាចរណ៍កាន់តែពង្រឹងសមត្ថភាពរបស់ខ្លួន ហើយអប់រំអ្នកបើកបរឲ្យកាត់បន្ថយភាពអានាធិបតេយ្យនៃការដឹកទំនិញលើសចំណុះ និងតកន្ទុយសណ្ដោង នាំឲ្យការដឹកធ្ងន់ ធ្វើឲ្យខូចផ្លូវជាតិ។ ឯអ្នកបើកតាក់ស៊ីដឹកមនុស្សលើសចំនួនកៅអី ធ្វើឲ្យអ្នកជិះអង្គុយពីលើក្បាលឡាន និងអង្គុយពីលើដំបូល ដែលជាហេតុឆាប់បង្កគ្រោះថ្នាក់ផង និងខូចសណ្ដាប់ធ្នាប់ក្នុងទីក្រុងផង។
លោក ព្រាប កុល៖ «ប្រសិនបើយន្តការនេះយើងរៀបចំជាលក្ខណៈសម្ងាត់ ឲ្យមានក្រុមមន្ត្រីចល័ត ដើម្បីតាមដានត្រួតពិនិត្យ ហើយមានវិធានការក្នុងការឃ្លាំមើលឲ្យមានភាគីទី៣ ដើម្បីត្រួតពិនិត្យពីលើទៀត អាហ្នឹងយើងអាចយល់ថា មានប្រសិទ្ធភាពខ្លះ តែប្រសិនបើក្រុមមន្ត្រីដែលត្រួតពិនិត្យដែលចល័តហ្នឹង ត្រូវបានគេស្គាល់ ថាគាត់មានតួនាទីក្នុងការចល័ត ខ្ញុំជឿថា ពួកគាត់អាចនឹងមានលេស ឬក៏មានមធ្យោបាយលាក់បាំង ឬក៏ចែកលុយដែលជាលុយទទួលបានពីប្រាក់សំណូក ហើយលាក់បាំងព័ត៌មាន។ ដូច្នេះ យើងមិនទាន់ដឹងថាល្អ ឬក៏មិនល្អ ត្រូវរង់ចាំមើលប្រសិទ្ធភាពវាយ៉ាងម៉េចសិន»។
កន្លងមកមានការបង្ហោះរូបភាពសកម្មភាពប៉ូលិសចរាចរណ៍ វាយដំលើអ្នកបើកបរ តាមរយៈព័ត៌មានសង្គមហ្វេសប៊ុក (Facebook) និងយូធូប (YouTube) ជាដើម ដែលនាំឲ្យអគ្គស្នងការដ្ឋាននគរបាលជាតិធ្វើការកែលំអមន្ត្រីរបស់ខ្លួន។
អ្នកធ្វើដំណើរក្នុងរាជធានីភ្នំពេញ អះអាងថា ក្រោយពីយុទ្ធនាការឃោសនាបោះឆ្នោតរហូតមកដល់បច្ចុប្បន្ន ប៉ូលិសចរាចរណ៍នៅក្នុងរាជធានីភ្នំពេញ ហាក់បន្ថយការផាកពិន័យលើអ្នកបើកបរដែលមិនពាក់មួកសុវត្ថិភាព មិនពាក់ខ្សែក្រវាត់ យានយន្តមិនដាក់កញ្ចក់ មិនមានភ្លើងស៊ីញ៉ូមុខក្រោយ រថយន្តគ្មានស្លាកលេខ ប្រើស្លាកលេខនគរបាល និងកងខេមរភូមិន្ទមិនត្រូវតាមអង្គភាព រថយន្តតាក់ស៊ីចតគ្មានរបៀប និងដឹកឥវ៉ាន់សំពីងសំពោង ជាដើម ដែលមន្ត្រីអនុវត្តន៍ច្បាប់ត្រូវអប់រំណែនាំដោយផាកពិន័យ មានផ្តល់លិខិតទទួលប្រាក់ត្រឹមត្រូវតាមតារាងទារប្រាក់របស់រដ្ឋាភិបាល។
លោក ហេង ចាន់ធារី បានឲ្យដឹងថា អង្គភាពពិសេសបង្កើតដោយកម្លាំងចម្រុះ មានការិយាល័យសណ្ដាប់ធ្នាប់ ការិយាល័យការពារ និងអន្តរាគមន៍ ការិយាល័យនគរបាលចរាចរណ៍ អធិការដ្ឋានខណ្ឌគ្រប់ទាំងអស់ក្នុងរាជធានីភ្នំពេញ គឺអនុវត្តច្បាប់ចរាចរណ៍ រឹតបន្តឹងតែនៅក្នុងមូលដ្ឋានរាជធានីភ្នំពេញសិន មិនទាន់បានអនុវត្តនៅទូទាំងប្រទេសកម្ពុជា ទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។