ថ្នាក់ដឹកនាំខេត្តព្រះសីហនុ និងមន្ត្រីស្ថាប័នពាក់ព័ន្ធ បានបង្កើតកម្មវិធីប្រគំតន្ត្រី និងលក់ទំនិញផ្សេងៗនៅមាត់សមុទ្រឆ្នេរអូរឈើទាល ដើម្បីទាក់ទាញភ្ញៀវទេសចរជាតិ និងអន្តរជាតិ ឲ្យចូលមកទស្សនាខេត្តជាប់មាត់សមុទ្រមួយនេះឲ្យបានច្រើនកុះករ នៅក្នុងពិធីឆ្លងឆ្នាំសកលឆ្នាំ២០១៥។
ពិធីនេះ អាជ្ញាធរមានសមត្ថកិច្ចគ្រប់ស្ថាប័នជំនាញ ក៏បានត្រៀមវិធានការការពារសន្តិសុខ និងចរាចរណ៍ ដើម្បីរក្សាសុវត្ថិភាព ព្រមទាំងបញ្ចៀសរាល់ការកកស្ទះជូនភ្ញៀវដែលមកកម្សាន្តតំបន់ឆ្នេរ។
មន្ត្រីពាក់ព័ន្ធខេត្តព្រះសីហនុ ត្រៀមរៀបចំប្រគំតន្ត្រី និងស្តង់តាំងពិព័រណ៍លក់ផលិតផលទំនិញចម្រុះគ្រប់ប្រភេទជិត ១០០ស្តង់ ដើម្បីអបអរសាទរពិធីបុណ្យឆ្លងឆ្នាំសកល ឆ្នាំ២០១៥ ដែលនឹងចូលមកដល់ក្នុងប៉ុន្មានថ្ងៃទៀតនេះ។
អភិបាលខេត្តព្រះសីហនុ លោក ឈិត សុខុន មានប្រសាសន៍ថា ស្តង់លក់ទំនិញ ឆាកប្រគំតន្ត្រីសម័យ និងទីកន្លែងប្រកួតកីឡាជាដើម កំពុងរៀបចំនៅតាមប្របមាត់ឆ្នេរអូរឈើទាល មានទីតាំងទល់មុខវិមានលំហែកាយរបស់លោកនាយករដ្ឋមន្ត្រី ហ៊ុន សែន។ ជាងនេះ ក៏នឹងត្រៀមបង្ហោះគោមភ្លើងចម្រុះព័ណ៌ចំនួនជាង ២ពាន់គោម និងបាញ់កាំជ្រួចរាប់រយដើម ដើម្បីសាទរឆ្លងឆ្នាំសកលឆ្នាំ២០១៥។
លោកបន្ថែមថា ចំពោះការថែរក្សាសន្តិសុខសុវត្ថិភាពជូនភ្ញៀវជាតិ និងអន្តរជាតិវិញ គឺកម្លាំងសមត្ថកិច្ចជំនាញ ស្ថាប័នពាក់ព័ន្ធនានា បានត្រៀមលក្ខណៈជាស្រេចទៅតាមជំនាញ និងតាមគោលដៅចេញចូលមកខេត្តព្រះសីហនុ រៀងៗខ្លួន៖ «ហេតុផលសំខាន់ គឺយើងចង់បានភ្ញៀវទេសចរចូលមកទស្សនាខេត្តព្រះសីហនុ ឲ្យបានច្រើន។ ហើយបើកាលណាមានភ្ញៀវទេសចរមកច្រើន ក៏បានចម្រើនដល់អាជីវករលក់ដូរទំនិញ ឬបម្រើសេវាលក់ដូរផ្សេងៗនៅខេត្តព្រះសីហនុ ហើយបានចំណូលច្រើនទៅតាមហ្នឹងដែរ»។
នៅក្នុងឱកាសពិធីឆ្លងឆ្នាំសកលនេះដែរ លោក ឈិត សុខុន ក៏បានអំពាវនាវទៅដល់អាជីវករ និងប្រជាពលរដ្ឋទាំងអស់ដែលមកកម្សាន្តនៅខេត្តជាប់មាត់សមុទ្រមួយនេះ ត្រូវចូលរួមសម្អាតអនាម័យបរិស្ថានដោយការទទួលខុសត្រូវខ្ពស់ ពិសេសត្រូវវេចខ្ចប់សំរាម ឬកាកសំណល់ផ្សេងៗចូលក្នុងថង់ ហើយទុកដាក់ឲ្យមានរបៀបរៀបរយ។ ចំណែកបញ្ហាចរាចរណ៍វិញ លោក ឈិត សុខុន បានឲ្យដឹងដែរថា នគរបាលជំនាញពាក់ព័ន្ធក៏បានត្រៀមលក្ខណៈ ដើម្បីបញ្ចៀសរាល់ការកកស្ទះនានាដោយប្រុងប្រយ័ត្នបំផុត។
លោកបញ្ជាក់ថា គោលបំណងនៃការបង្កើតឲ្យមានពិធីឆ្លងឆ្នាំសកល ឆ្នាំ២០១៥ នេះ គឺដើម្បីទាក់ទាញភ្ញៀវទេសចរជាតិ និងអន្តរជាតិ ឲ្យមកកម្សាន្តតំបន់ឆ្នេរខេត្តព្រះសីហនុ ឲ្យបានច្រើនថែមទៀត។ លោកព្យាករថា អាចមានភ្ញៀវចូលមកទស្សនានៅក្នុងឱកាសឆ្លងឆ្នាំសកលឆ្នាំ២០១៥ មានចំនួនរហូតដល់ជិត ១០ម៉ឺននាក់ ព្រោះតាមការឲ្យដឹងពីម្ចាស់សណ្ឋាគារ ឬផ្ទះសំណាក់ជាដើម បានឲ្យដឹងថា បន្ទប់ស្នាក់នៅភាគច្រើនត្រូវភ្ញៀវកក់ស្ទើរគ្មានសល់បន្ទប់៖ «យើងបានធ្វើផែនការលម្អិតដើម្បីរក្សាសន្តិសុខសុវត្ថិភាព និងបញ្ចៀសរាល់ការកកស្ទះចរាចរណ៍ កម្លាំងជំនាញបានត្រៀមលក្ខណៈដោយយកចិត្តទុកដាក់។ លោកថា រថយន្តគ្រប់ប្រភេទ គឺឲ្យធ្វើដំណើរទៅមុខរហូត គឺមួយទិស ហើយឲ្យបកក្រោយតាមផ្លូវផ្សេង ដើម្បីជៀសវាងការកកស្ទះ»។
ទាក់ទិនបញ្ហានេះដែរ លោក សុខ សុង ប្រធានសភាពាណិជ្ជកម្មខេត្តព្រះសីហនុ ឲ្យដឹងដែរថា ដើម្បីញាំងឲ្យពិធីឆ្លងឆ្នាំថ្មីឆ្នាំសកល ឆ្នាំ២០១៥ មានភាពរីករាយ សភាពាណិជ្ជកម្មខេត្តបានសហការ និងបង្កើតឲ្យមានការប្រគំតន្ត្រីសម័យ ការប្រកួតកីឡា និងស្តង់លក់ទំនិញជាច្រើនស្តង់ជូនភ្ញៀវទស្សនា។ លោកបន្តថា អ្នកចម្រៀង និងក្រុមតារាកំប្លែងល្បីៗនៅក្នុងប្រទេសកម្ពុជា នឹងមកបង្ហាញទេពកោសល្យ ឬសម្ដែងជូនភ្ញៀវទស្សនាក្នុងរយៈពេល ៣ថ្ងៃ៖ «គោលបំណងរៀបចំពិធីឆ្លងឆ្នាំសកលនេះ គឺមានគោលបំណងបង្កភាពសប្បាយ និងផ្សព្វផ្សាយទំនិញផ្សេងៗទាំងទំនិញក្នុងស្រុក និងក្រៅស្រុក។ ពិធីនេះក៏មានសម្ដែងសិល្បៈសម័យ កំប្លែង និងមានតារាចម្រៀង និងពិធីករល្បីៗនឹងមកពីភ្នំពេញ នឹងមកចូលរួមសម្ដែងជូនភ្ញៀវទស្សនា និងកម្សាន្តសប្បាយក្នុងរយៈពេល ៣ថ្ងៃ»។
យ៉ាងណាក៏ដោយ អភិបាលខេត្តព្រះសីហនុ លោក ឈិត សុខុន បានអំពាវនាវដល់ភ្ញៀវជាតិ និងអន្តរជាតិ ឲ្យមកចូលរួមទស្សនា ឬកម្សាន្តតាមតំបន់ឆ្នេរខេត្តព្រះសីហនុ នាឱកាសឆ្លងឆ្នាំសកលឆ្នាំ២០១៥ ឲ្យបានច្រើនកុះករ ចាប់ពីថ្ងៃទី២៩ ដល់ថ្ងៃទី៣១ ខែធ្នូ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។