និពន្ធនាយកសារព័ត៌មានបោះពុម្ព និងគេហទំព័រ ដែលមានឈ្មោះថា យុវវ័យថ្មី ទើបបានបោះពុម្ពផ្សាយចំនួន ២លើក បានប្រកាសថា នឹងផ្សាយព័ត៌មានពិត ឯករាជ្យ មិនចំណុះឲ្យបក្សនយោបាយ ក្នុងបំណងអូសទាញឲ្យយុវជនទទួលបានចំណេះដឹង និងបទពិសោធន៍។
នៅក្នុងពិធីសម្ពោធន៍សារព័ត៌មានបោះពុម្ព និងគេហទំព័រ យុវវ័យថ្មី នៅទីស្នាក់ការក្លឹបអ្នកកាសែតកម្ពុជា លោក ឆាយ សុផល ដែលជានិពន្ធនាយក និងជាសមាជិកគណៈកម្មការនាយកក្លឹបអ្នកកាសែតកម្ពុជា បានថ្លែងនៅថ្ងៃទី៩ សីហា ថា ការបង្កើតសារព័ត៌មាននេះ មានបំណងផ្ដល់សំឡេងដល់យុវជនកម្ពុជា និងយុវជនអាស៊ាន ព្រមទាំងយុវជននៃបណ្ដាប្រទេសមួយចំនួនទៀតនៅក្នុងអាស៊ី និងពិភពលោក។ លោកថា អ្វីដែលសំខាន់នោះ គឺកាសែតនេះធ្វើដើម្បីផលប្រយោជន៍យុវជន ដែលជាកម្លាំងស្នូលនៃប្រទេសជាតិ ក្នុងការកសាងសន្តិភាព និងការអភិវឌ្ឍសេដ្ឋកិច្ច សង្គម និងសេចក្ដីថ្លៃថ្នូររបស់ជាតិ។
លោក ឆាយ សុផល៖ «ពេលនេះ គឺជាការបោះឆ្នោតហើយ អ៊ីចឹងខ្ញុំគិតថាជាឱកាសមួយសម្រាប់ឲ្យយុវជនយើងបញ្ចេញយោបល់ ឲ្យយុវជនយើងទទួលយកចំណេះដឹងថ្មីៗ។ ២០១៥ គឺ២ឆ្នាំទៀតទេ គឺយុវជនគួរតែចាប់ផ្ដើមពីឥឡូវនេះទៅ តាមរយៈការអានព័ត៌មាន ទោះបីមិនអានព័ត៌មានរបស់ខ្ញុំក៏ដោយ អាចអានព័ត៌មានផ្សេងទៀតដែលទាក់ទងនឹងការងារយុវជន ដើម្បីត្រៀមខ្លួនឯងអភិវឌ្ឍខ្លួនឯងផង អភិវឌ្ឍគ្រួសារផង និងអភិវឌ្ឍសង្គមជាតិផង»។
លោក ឆាយ សុផល បន្តទៀតថា សារព័ត៌មាននេះបានបោះពុម្ពក្នុង ១ខែ ២លើក។ បោះពុម្ពម្ដងចំនួន ៥ពាន់ច្បាប់ មានបុគ្គលិកជាយុវជនចំនួន ១៥នាក់។ ក្នុង ១ច្បាប់ មាន ១២ទំព័រ លក់តម្លៃ ១.៥០០រៀល ដែលមានទាំងភាសាខ្មែរ និងភាសាអង់គ្លេស ផង បោះពុម្ពពណ៌ និងលាយសខ្មៅ។
យុវជន លី បេឡា អាយុ ២១ឆ្នាំ ដែលជាអ្នកសរសេរអត្ថបទផ្សាយឲ្យសារព័ត៌មាននេះ បានចាប់អារម្មណ៍ថា នេះជាឱកាសដែលគាត់អាចផ្ដល់ឲ្យយុវជនមានសំឡេងតាមរយៈអត្ថបទរបស់គាត់៖ «លេខទី១ គឺខ្ញុំសរសេរនេះ នាយករដ្ឋមន្ត្រីរដ្ឋាភិបាលត្រូវស្លាប់សំឡេងពីយុវជន។ ហើយអត្ថបទនេះ គឺវាចេញមុនបោះឆ្នោត កំឡុងពេលឃោសនាបោះឆ្នោត ហើយអីចឹង រយៈពេលប្រមាណ ១០ ទៅ ២០ថ្ងៃក្រោយ យើងបោះឆ្នោតដើម្បីជ្រើសរើសតំណាងរាស្ត្រនាយករដ្ឋមន្ត្រីថ្មី យើងត្រូវតែសួរទៅកាន់យុវជនទាំងអស់នោះ តើគាត់ចង់ឲ្យនាយករដ្ឋមន្ត្រីថ្មីហ្នឹង គាត់ធ្វើអីខ្លះដើម្បីឲ្យប្រទេសជាតិយើងមានការអភិវឌ្ឍ អីចឹងនាយករដ្ឋមន្ត្រីថ្មីនេះត្រូវតែផ្គាប់ផ្គុន និងយកចិត្តទុកដាក់ខ្លះទៅលើយុវជនហ្នឹងឯង»។
អ្នកសរសេរអត្ថបទម្នាក់ទៀត គឺកញ្ញា ស៊ុន ដាលីន បានថ្លែងថា តាមរយៈអត្ថបទនេះ នឹងផ្ដល់ឲ្យយុវជនទទួលបានបទពិសោធន៍ចំណេះដឹង មេរៀនដែលទទួលបានទាំងវិជ្ជមាន និងអវិជ្ជមាន ទាក់ទិននឹងបញ្ហាសង្គមជូនដល់យុវជនកម្ពុជា៖ «ខ្ញុំគិតថា នៅពេលដែលយើងសរសេរទាក់ទងយុវជនទៅ គិតថាវាមានប្រយោជន៍មែនទែនសម្រាប់យុវជនដទៃទៀតមើល»។
នៅក្នុងសេចក្ដីប្រកាសព័ត៌មានរបស់សារព័ត៌មានយុវវ័យ បានសរសេរថា សារព័ត៌មានយុវវ័យថ្មី ជាសមាជិកនៃសមាគមអ្នកកាសែតអាស៊ី ដែលមានមូលដ្ឋាននៅទីក្រុងសេអ៊ូល ប្រទេសកូរ៉េខាងត្បូង ក៏នឹងតាមដានភាពមិនប្រក្រតីក្នុងការដឹកនាំរបស់រាជរដ្ឋាភិបាល ការលួច និងកិបកេងយកទ្រព្យសម្បត្តិរដ្ឋរបស់មន្ត្រីពុករលួយ ដែលតែងតែធ្វើទុក្ខបុកម្នេញមន្ត្រីរាជការក្រោមឱវាទ បក្ខពួក គ្រួសារនិយម យកថវិកាជាតិទិញដីរាប់សិបហិកតារ សង់អគារជួលស្នាក់នៅជាដើម។ ក្នុងសេចក្ដីប្រកាសសរសេរថា សារព័ត៌មាននេះ ក៏នឹងតាមដានពិនិត្យមើលផលិតផលដែលនាំឲ្យអន្តរាយដល់ប្រយោជន៍ និងសុខភាពយុវជន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។