សង្គមស៊ីវិលស្នើក្រសួងអប់រំរៀបចំកន្លែងស្នាក់នៅដល់សិស្សក្រីក្រពេលប្រឡងបាក់ឌុប
2015.08.10
ចាប់ពីឆ្នាំ២០១៤ មក ក្រសួងអប់រំ តម្រូវឱ្យមណ្ឌលប្រឡងបាក់ឌុប ទាំងអស់ត្រូវប្រមូលផ្តុំនៅទីរួមខេត្ត និងរាជធានី។ ប្រការនេះ ធ្វើឱ្យមានតម្រូវការកន្លែងស្នាក់នៅកាន់តែច្រើននៅថ្ងៃប្រឡងសម្រាប់សិស្សមកពីតាមបណ្ដាស្រុកនានា ជួលស្នាក់នៅពេលប្រឡង ដែលអាចជំរុញឱ្យម្ចាស់ផ្ទះសំណាក់ ឬសណ្ឋាគារខ្លះ ឆ្លៀតឱកាសដំឡើងថ្លៃស្នាក់នៅ។ ដើម្បីទប់ស្កាត់ចរន្តនៃការឡើងថ្លៃ ក្រុមអង្គការសង្គមស៊ីវិលអំពាវនាវដល់អាជ្ញាធរ ពិសេសក្រសួងអប់រំ ឱ្យយកចិត្តទុកដាក់ដោះស្រាយបញ្ហានេះជូនបេក្ខជនប្រឡង។
អង្គការសង្គមស៊ីវិលមួយចំនួនអំពាវនាវដល់អាជ្ញាធរមានសមត្ថកិច្ចចាត់វិធានការផ្នែករដ្ឋបាល ដើម្បីទប់ស្កាត់ការដំឡើងថ្លៃស្នាក់នៅតាមបណ្ដាផ្ទះសំណាក់ ឬសណ្ឋាគារ នៅគ្រប់ទីរួមខេត្តទាំងអស់ទូទាំងប្រទេស ក្នុងឱកាសប្រឡងសញ្ញាប័ត្រមធ្យមសិក្សាទុតិយភូមិ។
សេចក្ដីអំពាវនាវនេះ ត្រូវបានធ្វើឡើងដោយអង្គការសម្ព័ន្ធគណនេយ្យភាពសង្គម អាស៊ីបូព៌ា និងប៉ាស៊ីហ្វិក វិទ្យាស្ថានខ្មែរដើម្បីការអភិវឌ្ឍជាតិ សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធបណ្ដាញយុវជនកម្ពុជា និងអង្គការសំឡេងសង្គម ខណៈដែលការប្រឡងសញ្ញាប័ត្រមធ្យមសិក្សាទុតិយភូមិ ឬបាក់ឌុប កាន់តែខិតជិតមកដល់នៅថ្ងៃទី២៤ និងទី២៥ ខែសីហា។
ក្រៅពីស្នើដល់អាជ្ញាធរមានសមត្ថកិច្ច ក្រុមអង្គការសង្គមស៊ីវិលក៏អំពាវនាវដល់ក្រសួងអប់រំយុវជន និងកីឡា ឱ្យរៀបចំកន្លែងស្នាក់នៅរយៈពេលខ្លីដល់បេក្ខជនដែលធ្វើដំណើរមកពីជនបទផងដែរ។ អង្គការសង្គមស៊ីវិលអះអាងថា ការដំឡើងថ្លៃស្នាក់នៅអំឡុងថ្ងៃប្រឡង នឹងបង្កផលប៉ះពាល់យ៉ាងធ្ងន់ធ្ងរដល់ការចំណាយរបស់បេក្ខជន ដែលភាគច្រើនជាសិស្សមកពីគ្រួសារក្រីក្រនៅតាមទីជនបទ។
ការអំពាវនាវនេះ នៅស្របពេលសិស្សថ្នាក់ទី៩ បានចាប់ផ្ដើមប្រឡងសញ្ញាប័ត្របឋមភូមិទូទាំងប្រទេស ចាប់ផ្ដើមនៅថ្ងៃទី១០ ខែសីហា ដែលមានសិស្សប្រឡងចំនួន ១៥៣.៥៤០នាក់។
លោក សន ជ័យ តំណាងអង្គការសម្ព័ន្ធគណនេយ្យភាពសង្គម អាស៊ីបូព៌ា និងប៉ាស៊ីហ្វិក សន្និដ្ឋានថា យុវជនដែលត្រូវឡើងមកប្រឡងនៅទីរួមខេត្ត អាចមានចំនួនពី ៧០ ទៅ ៨០ភាគរយ។ ក្នុងចំណោមយុវជនទាំងនោះ មានខ្លះមកពីគ្រួសារដែលមិនសូវធូរធារ ហើយចាំបាច់ណាស់ពួកគេនឹងត្រូវចំណាយលើការធ្វើដំណើរ អាហារ និងការស្នាក់នៅក្នុងពេលប្រឡងជាដើម៖ «យកល្អអាជ្ញាធរខេត្តអាចមានការកោះប្រជុំជាមួយម្ចាស់ផ្ទះសំណាក់ និងសណ្ឋាគារដើម្បីឱ្យមានការយោគយល់ដល់ការស្នាក់នៅរបស់សិស្ស និងគ្រូ ដែលពាក់ព័ន្ធនឹងការប្រឡងបាក់ឌុបហ្នឹង»។
ឆ្លើយតបនឹងបញ្ហានេះ លោក រស់ សាលីន អ្នកនាំពាក្យក្រសួងអប់រំ បានបញ្ជាក់ថា ក្រសួងអប់រំ និងអាជ្ញាធរតាមខេត្តនីមួយៗ នឹងធ្វើការរួមគ្នាដើម្បីណែនាំដល់ម្ចាស់ផ្ទះសំណាក់ ឬសណ្ឋាគារ កុំឱ្យដំឡើងថ្លៃនៅថ្ងៃប្រឡង។ បន្ថែមពីលើនេះ លោកស្នើដល់បេក្ខជនទាំងអស់ឱ្យត្រៀមខ្លួនមុនក្នុងការស្វែងរកកន្លែងស្នាក់នៅ មុនពេលដែលការប្រឡងមកដល់ ដើម្បីកុំឲ្យម្ចាស់សណ្ឋាគារឆក់ឱកាសដំឡើងថ្លៃ៖ «បេក្ខជនទាំងអស់ គាត់អញ្ជើញមកពីតំបន់ដាច់ស្រយាលអ៊ីចឹង គាត់អាចនៅជុំគ្នា។ អាច ៥នាក់ ១០នាក់ គាត់ជួលផ្ទះគេ ហើយអ្នកខ្លះ គាត់មានសាច់ញាតិនៅទីរួមខេត្ត គាត់អាចមកស្នាក់នៅជាមួយសាច់ញាតិក្នុងរយៈពេល ៣ថ្ងៃ។ ពេលខ្លះហ្នឹង មានសាច់ញាតិ ក៏អាចស្នើសុំសាច់ញាតិហ្នឹង ឱ្យមិត្តភក្តិស្នាក់នៅបានដែរ»។
ក្នុងឆ្នាំសិក្សា២០១៤-២០១៥ នេះ បេក្ខជនដែលចូលរួមប្រឡងសញ្ញាប័ត្រមានចំនួន ៨៨.៤៨៨នាក់ ក្នុងនោះស្រីមានចំនួន ៤២.០៣៦នាក់ ដោយចែកចេញជា ១៥០មណ្ឌល។ មណ្ឌលប្រឡងត្រូវប្រមូលផ្តុំនៅទីរួមខេត្ត និងរាជធានី ដោយយកគ្រឹះស្ថានគ្រប់ប្រភេទ ចាប់ពីបឋមសិក្សាឡើងទៅទាំងសាធារណៈ និងឯកជនធ្វើជាមណ្ឌលប្រឡង។ ក្នុងករណីខេត្តណាមិនអាចអនុវត្តបាន មណ្ឌលប្រឡងត្រូវប្រមូលផ្តុំនៅទីរួមស្រុកដែលនៅជិតទីរួមខេត្តជាងគេ។ ក្រសួងអប់រំ បានប្រកាសថា នឹងមិនមានការរៀបចំប្រឡងលើកទី២ ទេ សម្រាប់ការប្រឡងសញ្ញាប័ត្រមធ្យមសិក្សាទុតិយភូមិនៅឆ្នាំនេះ។
ទាក់ទងនឹងការប្រឡងនេះដែរ ការប្រឡងសញ្ញាប័ត្រមធ្យមសិក្សាបឋមភូមិ ឆ្នាំ២០១៥ ដែលមានរយៈពេល ២ថ្ងៃ នឹងត្រូវបញ្ចប់នៅថ្ងៃទី១១ ខែសីហា ស្អែកនេះ។ ដំណើរការប្រឡងកំពុងប្រព្រឹត្តទៅនៅទូទាំងប្រទេស ហើយបេក្ខជនចូលរួមប្រឡងមានជាង ១០ម៉ឺននាក់ ចែកជា ១.៥៧៣មណ្ឌល។ នេះបើតាមការបញ្ជាក់ពីលោក លោក រស់ សាលីន មន្ត្រីនាំពាក្យក្រសួងអប់រំ ។ ចាប់ពីឆ្នាំ២០១៤ មក ក្រសួងអប់រំបានប្រគល់សិទ្ធិអំណាច និងការទទួលខុសត្រូវទាំងស្រុង ជូនគ្រឹះស្ថានមធ្យមសិក្សានីមួយៗរៀបចំការប្រឡង រាប់ទាំងពីការរៀបចំប្រធានវិញ្ញាសា ដំណើរការសំណេរ កំណែ ស្រង់បូកពិន្ទុ និងប្រកាសលទ្ធផលនៅតាមគ្រឹះស្ថានមធ្យមសិក្សានីមួយៗ។ គ្រឹះស្ថានមធ្យមសិក្សានីមួយៗ ប្រើប្រាស់បុគ្គលិកអប់រំធ្វើជាមេប្រយោគប្រឡង ហើយមន្ទីរអប់រំយុវជន និងកីឡា មានភារកិច្ចចេញវិញ្ញាបនបត្របណ្ដោះអាសន្នមធ្យមសិក្សាបឋមភូមិ ជូនដែលបេក្ខជនដែលប្រឡងជាប់៕