សង្គមស៊ីវិលជំរុញឲ្យអាជ្ញាធររដ្ឋាភិបាលអនុវត្តច្បាប់តឹងរ៉ឹង ដើម្បីប្រយុទ្ធប្រឆាំងនឹងការចរាចរផលិតផលក្លែងក្លាយ ឬខូចគុណភាពនៅលើទីផ្សារក្នុងប្រទេសកម្ពុជា។ រដ្ឋាភិបាលកាលពីពេលថ្មីៗ នេះប្រកាសថា បានរកឃើញផលិតផលខូចគុណភាពនានានៅលើទីផ្សារ ហើយអំពាវនាវឲ្យពលរដ្ឋចូលរួមសហការផ្តល់ព័ត៌មានដើម្បីទប់ស្កាត់ការចរាចរផលិតផលទាំងនោះ។
សង្គមស៊ីវិលលើកឡើងថា ការអនុវត្តច្បាប់ធូររលុង គឺជាមូលហេតុសំខាន់មួយដែលនាំឲ្យមានការចរាចរផលិតផលក្លែងក្លាយ ខូចគុណភាពនៅលើទីផ្សារក្នុងប្រទេសកម្ពុជា។
ការលើកឡើងនេះ ស្របពេលសេចក្ដីជូនដំណឹងរបស់គណៈកម្មាធិការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃ ចុះថ្ងៃទី២ ខែមីនា ឲ្យដឹងថា គណៈកម្មាធិការមួយនេះបានចុះពិនិត្យផលិតផលដែលត្រូវបានគេចរាចរណ៍នៅលើទីផ្សារ ហើយរកឃើញថា មានផលិតផលខូចគុណភាព ផលិតផលបន្លំគុណភាព ផលិតផលវេចខ្ចប់ ឬស្តុកទុកមិនត្រឹមត្រូវតាមស្តង់ដារបច្ចេកទេស ផលិតផលហួសសុពលភាពនៃការប្រើប្រាស់ ផលិតផលក្នុងស្រុក និងនាំចូលគ្មានការអនុញ្ញាតពីក្រសួង-ស្ថាប័នមានសមត្ថកិច្ច កំពុងត្រូវបានគេដាក់បន្លំលក់ជាមួយផលិតផលពិត មានច្បាប់អនុញ្ញាតត្រឹមត្រូវនៅលើទីផ្សារ។
គណៈកម្មាធិការប្រយុទ្ធប្រឆាំងផលិតផលក្លែងក្លាយបញ្ជាក់ថា ផលិតផលទាំងនោះធ្វើឲ្យប៉ះពាល់ធ្ងន់ធ្ងរដល់សុខភាព និងសុវត្ថិភាពសង្គម និងជាគ្រោះថ្នាក់សម្រាប់ជីវភាពរស់នៅរបស់ពលរដ្ឋ។ ពួកគេអំពាវនាវឲ្យពលរដ្ឋសហការផ្ដល់ព័ត៌មានពីទីតាំង ឬជនដែលផលិត ទីតាំង ឬជនដែលចែកចាយផលិតផលទាំងនេះដល់សមត្ថកិច្ច ដើម្បីចុះពិនិត្យ តាមដាន ស៊ើបអង្កេត និងឈានដល់ការបង្ក្រាបទៅតាមនីតិវិធី។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា លោក ស ម៉ូរ៉ា កត់សម្គាល់ថា កន្លងមករដ្ឋាភិបាលបានបង្កើតយន្តការច្រើនក្នុងការគ្រប់គ្រងចំណីអាហារ ឬទំនិញ ប៉ុន្តែលោកថា ការអនុវត្តជាក់ស្ដែងនៅពុំទាន់មានប្រសិទ្ធភាពនៅឡើយ ដោយសារតែមានអំពើពុករលួយ។ លើសពីនេះ លោកថា ការគ្រប់គ្រងការត្រួតពិនិត្យទំនិញនាំចូលពីបរទេស ក៏នៅមានភាពធូររលុងនៅឡើយ៖ «យើងឃើញនៅមានបញ្ហាច្រើនកន្លងមក ប្រព័ន្ធនៅក្នុងស្រុកយើងនៅតែដដែល នៅតែពឹងលើគណៈកម្មាធិការខាងលើដែលអត់មានវិធានការ អត់មានយុទ្ធសាស្ត្រឲ្យច្បាស់លាស់ ជាសង្គមស៊ីវិលយើងគិតថា ជាការខ្វះសមត្ថភាពរបស់រដ្ឋាភិបាលក្នុងការគ្រប់គ្រងបញ្ហាទាំងអស់នេះ»។
កម្ពុជា ជាប្រទេសដែលនាំចូលនូវផលិតផលជាច្រើនពីបរទេសសម្រាប់បម្រើដល់តម្រូវការប្រើប្រាស់ប្រចាំថ្ងៃរបស់ពលរដ្ឋ ក្នុងនោះមានតាំងពីបន្លែ ផ្លែឈើ និងសម្ភារៈប្រើប្រាស់ជាច្រើនផ្សេងទៀត។ ការស្រាវជ្រាវកន្លងមកបង្ហាញថា គ្រាន់តែបន្លែហូបចុក កម្ពុជាបាននាំចូលបន្ថែមពីប្រទេសជិតខាងប្រមាណពី ២០០ ដល់ ៤០០តោនក្នុងមួយថ្ងៃ ដែលមានតម្លៃជាទឹកប្រាក់ជាង ២០០លានដុល្លារអាមេរិកក្នុងមួយឆ្នាំ។
លោក ស ម៉ូរ៉ា ថ្លែងថា ដើម្បីជៀសវាងការចរាចរទំនិញខូចគុណភាពនៅលើទីផ្សាររដ្ឋាភិបាលត្រូវរឹតបន្តឹងការត្រួតពិនិត្យការនាំចូលទំនិញនៅតាមច្រកនានាតាមព្រំដែន ត្រូវពង្រីកការត្រួតពិនិត្យផលិតផលខូចគុណភាពឲ្យដល់ថ្នាក់មូលដ្ឋាន និងត្រូវដាក់ទោសទណ្ឌទៅលើមន្ត្រីដែលប្រព្រឹត្តអំពើពុករលួយដែលអនុញ្ញាតឲ្យឈ្មួញផលិត ឬនាំចូលទំនិញខូចគុណភាពខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។