មន្ត្រីសង្គមស៊ីវិល អំពាវនាវឲ្យសមត្ថកិច្ចជំនាញបង្ក្រាបទីតាំងលេងល្បែងចាក់កន្ទុយលេខ ដែលរីករាលដាលដូចផ្សិតក្នុងក្រុងស្ទឹងត្រែង។ ការអំពាវនាវនេះ នៅបន្ទាប់ពីមន្ត្រីសង្គមស៊ីវិលរកឃើញថា សមត្ថកិច្ចជំនាញក្នុងខេត្តស្ទឹងត្រែង ដូចជាស្នងការនគរបាលខេត្តស្ទឹងត្រែង និងកងរាជអាវុធហត្ថខេត្ត ហាក់ដូចធ្វើមិនដឹងមិនឮចំពោះល្បែងកន្ទុយលេខជាច្រើនកន្លែងក្នុងខេត្តនេះ កំពុងបង្កផលប៉ះពាល់ដល់ភូមិឃុំមានសុវត្ថិភាព និងអស្ថិរភាពសង្គម។
មន្ត្រីសម្របសម្រួលសមាគមអាដហុក (adhoc) ខេត្តស្ទឹងត្រែង លោក ហូ សំអុល រិះគន់ចំណាត់ការរបស់សមត្ថកិច្ចជំនាញខេត្តនេះថា មិនបានបំពេញតួនាទីបង្ក្រាបទីតាំងល្បែងកន្ទុយលេខខុសច្បាប់ក្នុងខេត្តនេះទេ ដែលបង្កផលប៉ះពាល់ធ្ងន់ធ្ងរដល់សន្តិសុខសុវត្ថិភាពសង្គម និងអំពើហិង្សាជាដើម៖ «ទីតាំងឆ្នោតល្បែងហ្នឹង គឺនៅចំកណ្ដាលផ្សារ សមត្ថកិច្ចណាក៏ឃើញដែរ ឬមួយក៏ប្រជាពលរដ្ឋណាក៏ឃើញដែរ សូមមេត្តាឲ្យជំនាញហ្នឹងមេត្តាចាត់ការ ជាពិសេសគឺលោកព្រះរាជអាជ្ញា ចាត់ចែងទៅនីតិវិធីច្បាប់ ព្រោះអីបុគ្គលជាមេឆ្នោត ឬមួយក៏កូនកញ្ច្រែងយើងបានស្គាល់បានដឹងទីតាំងគាត់អស់ហើយ យើងមិនពិបាកធ្វើទេ បើសិនជាយើងមានចេតនានឹងចាត់ការតាមផ្លូវច្បាប់ ឲ្យស្របទៅតាមគោលនយោបាយរបស់ភូមិឃុំមានសុវត្ថិភាពរបស់ក្រសួងមហាផ្ទៃ ហ្នឹង»។
លោក ហូ សំអុល បន្តថា ទីតាំងល្បែងកន្ទុយលេខធំៗមានចំនួន ២កន្លែងក្នុងខេត្តនេះ គឺនៅកណ្ដាលក្រុងស្ទឹងត្រែង មានឈ្មោះថា ងី ហៅ ងី កំប៉ោង និងទីតាំងមួយកន្លែងផ្សេងទៀតមានឈ្មោះថា កាន់ វិសាំង ហៅ តាមាំង និងមានបណ្ដាញឆ្នោតតូចៗជាច្រើនកន្លែងទៀត។ លោកថា ល្បែងកន្ទុយលេខនេះមានប្រភពមកពីប្រទេសវៀតណាម និងប្រទេសឡាវ។ បន្ថែមពីលើនេះ ល្បែងកន្ទុយលេខនេះបានប្រមូលថវិកាពលរដ្ឋក្នុងខេត្តនេះក្នុងមួយថ្ងៃៗរាប់សែនដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។