អង្គការសង្គមស៊ីវិលដែលធ្វើការពាក់ព័ន្ធនឹងពលករចំណាកស្រុក បានជំរុញរដ្ឋាភិបាលឲ្យពង្រឹងការអនុវត្តច្បាប់ឲ្យមានប្រសិទ្ធភាព ព្រមទាំងលុបបំបាត់នូវបញ្ហានិទ្ទណ្ឌភាព ដើម្បីការពារពលករធ្វើចំណាកស្រុកមានសុវត្ថិភាពពិតប្រាកដ។
ការលើកឡើងបែបនេះ បន្ទាប់ពី លោក ហេង សំរិន ប្រធានរដ្ឋសភា ស្នើសុំឲ្យរដ្ឋាភិបាលកូរ៉េ ទទួលពលករកម្ពុជា ទៅធ្វើការឲ្យកាន់តែមានចំនួនច្រើនបន្ថែមទៀត។
ការពង្រឹងយន្តការការពារពលករ ការបង្កើនការវិនិយោគឱកាសការងារក្នុងស្រុក ផ្តល់ចំណេះជំនាញដល់ពលករ ពង្រឹងកិច្ចព្រមព្រៀង ឬអនុស្សរណៈជាមួយប្រទេសទទួល និងការលុបបំបាត់និទ្ទណ្ឌភាពលើពលករ ជាចំណុចសំខាន់ៗដែលសង្គមស៊ីវិលចង់ឃើញរដ្ឋាភិបាលកម្ពុជា ដោះស្រាយ។
ប្រធានអង្គការខារ៉ាមកម្ពុជា ដែលធ្វើការពាក់ព័ន្ធនឹងពលករចំណាកស្រុក លោក យ៉ា ណាវុធ បាននិយាយថា លោកមិនជំទាស់នោះទេ ប្រសិនបើរដ្ឋាភិបាលបញ្ជូនពលករដែលមានជំនាញពិតប្រាកដ ទៅធ្វើការនៅក្រៅប្រទេស មិនមែនគ្រាន់តែបញ្ជូនពលករដែលគ្មានជំនាញឲ្យទៅរងគ្រោះនោះទេ។ លោកបន្តថា រដ្ឋាភិបាលត្រូវពង្រឹងយន្តការការពារ និងលុបបំបាត់និទ្ទណ្ឌភាពទៅលើពលករចំណាកស្រុក ព្រោះកន្លងមក ពលករចំណាកស្រុកមិនថានៅប្រទេសកូរ៉េ នោះទេ តែងទទួលបានប្រាក់ខែតិច ធ្វើការគ្មានពេលសម្រាក បាត់បង់សេរីភាព ហើយរងនូវការរំលោភបំពានរាងកាយ មានការវាយដំជាដើម៖ «នៅក្នុងរយៈពេលខ្លី នៅពេលដែលកម្ពុជា មិនទាន់មានលទ្ធភាពគ្រប់គ្រាន់ ការពិភាក្សាដើម្បីបន្ថែមចំនួនកូតាពលករកម្ពុជា ជារឿងមួយវិជ្ជមានហើយ តែសម្រាប់រយៈពេលវែង កម្ពុជា ត្រូវដោះស្រាយវិបត្តិគ្មានការងារធ្វើ បញ្ហានិទ្ទណ្ឌភាព ដោយធ្វើយ៉ាងណាឲ្យកម្ពុជា មាននិរន្តរភាពពិតប្រាកដ»។
ជាមួយគ្នានេះ ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក (adhoc) លោក នី ចរិយា មានប្រសាសន៍ថា ការស្នើសុំរបស់ប្រធានរដ្ឋសភាទៅកាន់ប្រទេសកូរ៉េ នៅពេលនេះ គឺជាការបង្ហាញពីភាពខ្សោយរបស់រដ្ឋាភិបាល និងជារឿងគួរឲ្យខកចិត្តមួយក្នុងនាមពលរដ្ឋខ្មែរ ព្រោះរដ្ឋាភិបាលគួរតែដោះស្រាយបញ្ហាពលករនៅក្នុងប្រទេសជាមុនសិន មុននឹងស្នើឲ្យបរទេសជួយ។
អ្នកធ្វើការពាក់ព័ន្ធនឹងសិទ្ធិមនុស្សរូបនេះ ចង់ឲ្យរដ្ឋាភិបាលបង្កើនឱកាសការងារនៅក្នុងស្រុក ដោះស្រាយបញ្ហាការរំលោភសិទ្ធិ និងត្រូវចាត់វិធានការការពារពលករឲ្យមានប្រសិទ្ធភាព៖ «ខ្ញុំគិតថា រដ្ឋាភិបាលក្នុងដំណាក់កាលនេះ គួរតែនាំគ្នាគិតរិះរកវិធីដោះស្រាយ មិនមែនស្នើទៅកាន់បរទេសឲ្យដោះស្រាយបញ្ហាពលករនោះទេ ហើយខ្ញុំមើលឃើញថា នៅកម្ពុជា មានដីសម្បទានច្រើនណាស់ដែលបានវិនិយោគទៅឲ្យវៀតណាម ដែលបានបណ្តោយឲ្យជនជាតិវៀតណាម មានឱកាសការងារនៅកម្ពុជា ដូច្នេះរដ្ឋាភិបាលគួរតែគិតគូរពីបញ្ហានេះ»។
ចំណែកឯប្រធានចលនាយុវជននៅក្នុងប្រទេសកូរ៉េ លោក យឹម ស៊ីណន បាននិយាយថា លោកមិនគាំទ្រការស្នើសុំឲ្យចំនួនពលករមកធ្វើការនៅប្រទេសកូរ៉េ កាន់តែច្រើនជាងនេះទេ ព្រោះពលករនៅកូរ៉េ ភាគច្រើនគឺជាយុវជនដែលសុទ្ធតែជាទំពាំងស្នងឫស្សីសម្រាប់ជាតិ។ លោកបន្តថា បើទោះប្រទេសកូរ៉េ មានលក្ខខណ្ឌការងារខុសពីបណ្ដាប្រទេសមួយចំនួននៅអាស៊ានក្តី ប៉ុន្តែបញ្ហាផ្សេងនៅតែបន្តកើតឡើងចំពោះពលករនៅប្រទេសកូរ៉េ ដូចជាបញ្ហាផ្លូវច្បាប់ ភាសា ការរំលោភសិទ្ធិលើប្រាក់ខែ និងកម្លាំងពលកម្ម និងការប្រឹក្សាយោបល់ជាដើម។ លោក យឹម ស៊ីណន ចង់ឃើញរដ្ឋាភិបាលកាត់បន្ថយចំនួនពលករធ្វើការនៅក្រៅប្រទេស៖ «ខ្ញុំគិតថា ពលករខ្មែររបស់យើងចាប់ពីអាយុ ១៨ឆ្នាំឡើងទៅ គាត់គួរតែនៅក្រេបយកចំណេះដឹង ចំណេះវិជ្ជា ដើម្បីជួយការពារប្រទេសជាតិ គាត់មិនគួរណាបញ្ជូនពលករទាំងនោះឲ្យទៅធ្វើការនៅក្រៅប្រទេស ដែលជាកម្មករធ្វើការដ៏លំបាកនោះទេ»។
ជុំវិញបញ្ហានេះ វិទ្យុអាស៊ីសេរី មិនអាចទាក់ទង លោក ឈាង វុន អ្នកនាំពាក្យរដ្ឋសភា ដើម្បីសុំការបំភ្លឺបន្ថែមជុំវិញរឿងនេះបានទេនារសៀលថ្ងៃទី១៤ ខែឧសភា។
ប៉ុន្តែកាលពីថ្ងៃទី១២ ឧសភា នៅឯវិមានរដ្ឋសភាកន្លងទៅ ប្រធានរដ្ឋសភា លោក ហេង សំរិន បានស្នើទៅ លោក ជុង អូយវ៉ា (CHUN Ui-HWA) ប្រធានរដ្ឋសភានៃសាធារណរដ្ឋកូរ៉េខាងត្បូង ដោយសុំឲ្យរដ្ឋាភិបាលកូរ៉េខាងត្បូង បន្តបង្កើនចំនួនកូតាទទួលពលករកម្ពុជា ទៅធ្វើការឲ្យបានចំនួនច្រើនបន្ថែមទៀត និងជួយជំរុញអ្នកវិនិយោគទុន ទេសចរណ៍កូរ៉េ មកកម្ពុជា ឲ្យបានច្រើន។ លើសពីនេះ ក៏សុំឲ្យកូរ៉េ ទទួលទិញអង្ករពីកម្ពុជា ព្រមទាំងស្នើសុំឲ្យសភានៃប្រទេសទាំងពីរ ចុះអនុស្សរណៈសហការជាមួយគ្នានាពេលឆាប់ៗខាងមុខ។
សង្គមស៊ីវិលនៅក្នុងប្រទេសកម្ពុជា ដែលធ្វើការពាក់ព័ន្ធនឹងពលករចំណាកស្រុក បានឲ្យដឹងថា គេមិនមានទិន្នន័យជាក់លាក់ពីចំនួនពលករខ្មែរ ទៅធ្វើការនៅប្រទេសកូរ៉េ នេះទេ។ បើទោះជាកន្លងមក ពលករដែលទៅធ្វើការនៅប្រទេសកូរ៉េ មិនសូវជួបបញ្ហាដូចប្រទេសថៃ និងម៉ាឡេស៊ី ក្តី ក៏សង្គមស៊ីវិល ស្នើឲ្យរដ្ឋាភិបាលពង្រឹងយន្តការការពារពលករចំណាកស្រុកនៅប្រទេសកូរ៉េ បន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។