កម្មករជាង ១ពាន់នាក់ នៅរោងចក្រកាត់ដេរអូសេអង់ (Ocean) ឋិតនៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ គ្រោងតវ៉ាសាជាថ្មីនៅមុខក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃច័ន្ទ ទី១៤ កក្កដា ដើម្បីទាមទារឲ្យក្រសួងដាក់សម្ពាធទៅថៅកែក្រុមហ៊ុន ឲ្យផ្តល់សំណងផ្តាច់កិច្ចសន្យាការងារដល់ពួកគាត់តាមផ្លូវច្បាប់។
ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា មានប្រសាសន៍ថា ក្រុមគណៈកម្មការដោះស្រាយបាតុកម្មកូដកម្ម គ្រោងនឹងជួបពិភាក្សាគ្នារកដំណោះស្រាយនៅក្នុងរោងចក្រ នៅវេលាម៉ោង ៩ព្រឹកថ្ងៃទី១៤ កក្កដា ប៉ុន្តែកម្មករគិតថា កិច្ចប្រជុំនោះនឹងគ្មានលទ្ធផលអ្វីជាវិជ្ជមានទេ ហើយពួកគេគ្រោងមកតវ៉ានៅមុខក្រសួងការងារ និងបណ្តុះបណ្តាលវិជ្ជាជីវៈ ដើម្បីជំរុញឲ្យរដ្ឋមន្រ្តីក្រសួងការងារ ជួយអន្តរាគមន៍ពីរឿងនេះ។
លោក ប៉ាវ ស៊ីណា៖ «ធាតុពិតរោងចក្រនេះបានបិទទ្វារទៅហើយ ប៉ុន្តែគាត់ (ថៅកែ) អត់ហ៊ានប្រកាសថារោងចក្របិទទ្វារទេ ខ្លាចទទួលខុសត្រូវ ផ្តល់សំណងផ្តាច់កិច្ចសន្យាការងារទៅតាមផ្លូវច្បាប់ជូនបងប្អូនកម្មករ ដូច្នេះគាត់យកហេតុផលព្យួរហ្នឹងជាចេតនាមួយ ឲ្យកម្មករខ្ជិលរង់ចាំការគ្មានការងារធ្វើឲ្យគាត់ចាកចេញទៅធ្វើការរោងចក្រផ្សេង អ៊ីចឹងយើងឃើញចន្លោះនៅពេលព្យួរហ្នឹង ក្រុមហ៊ុនបានគំរាមថា ប្រសិនបើមិនបើកលុយផ្តាច់កិច្ចសន្យាក្នុងកម្រិតដែលក្រុមហ៊ុនបានផ្តល់ឲ្យនោះទេ នោះអត់មានឱកាសក្នុងការទទួលប្រាក់ខែចុងក្រោយ ឬប្រាក់បំណាច់អីដូចដែលរោងចក្របានជម្រាបជូនទេ ដូច្នេះហើយក្រុមហ៊ុនបានព្យាយាមបញ្ចុះបញ្ចូលកម្មករ និងលួចដើរបើកលុយតាមផ្ទះជួលហ្នឹង ហើយជាទង្វើមួយខុសច្បាប់»។
រោងចក្រអូសេអង់ បានព្យួរការងារកម្មករជាង ១.៦០០នាក់ រយៈពេល១ខែ ដោយគិតចាប់ពីថ្ងៃទី២៤ ខែឧសភា។
កាលពីថ្ងៃទី៩ ខែកក្កដា ខាងក្រុមប្រឹក្សាអាជ្ញាកណ្ដាល បង្គាប់ឲ្យភាគីរោងចក្រផ្ដល់ប្រាក់ខែ ១០០% និងអត្ថប្រយោជន៍ផ្សេងៗដល់កម្មករក្នុងរយៈពេលព្យួរការងារនៅរោងចក្រនេះ ដោយគិតចាប់ពីថ្ងៃទី២៦ ខែឧសភា ដល់ថ្ងៃទី២៦ មិថុនា។ ប៉ុន្តែខាងក្រុមហ៊ុនមិនបានអនុវត្តតាមសេចក្តីបង្គាប់របស់ក្រុមប្រឹក្សាអាជ្ញាកណ្ដាលនោះទេ។
បើតាមការអះអាងពីកម្មករ និងសហជីព ឲ្យដឹងថា ១ខែក្រោយការព្យួរនោះ ក្រុមហ៊ុននៅតែបន្តបិទទ្វាររោងចក្រដដែល ហើយពួកគេគិតថា ការព្យួរការងារនោះ គឺគ្រាន់តែលេសប៉ុណ្ណោះ ដើម្បីគេចវេសពីការទទួលខុសត្រូវចំពោះសំណង និងប្រាក់ជំងឺចិត្តផ្សេងៗ នៅពេលដែលក្រុមហ៊ុនបិទទ្វាររោងចក្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។