អង្គការក្រៅរដ្ឋាភិបាលបានយល់ថា ដោយសារតែមានអំពើពុករលួយ បានជាទំនាស់ដីធ្លីរបស់ប្រជាពលរដ្ឋរាប់រយគ្រួសារជាមួយអង្គការអេដស៍នោះ មិនត្រូវបានដោះស្រាយចេញជាច្រើនឆ្នាំមកហើយ។
សមាគមការពារសិទ្ធិមនុស្សអាដហុក (ADHOC) ខេត្តព្រះវិហារ បានដាក់ពាក្យបណ្ដឹងមួយច្បាប់ទៅសាលាដំបូងនៃខេត្តនេះ កាលពីពេលថ្មីៗ ដោយស្នើឱ្យតុលាការស៊ើបអង្កេតទៅលើអាជ្ញាធរស្រុកជាំក្សាន្ត ជាច្រើនរូប ពីបទពាក់ព័ន្ធនឹងអំពើពុករលួយ និងបានទទួលផលប្រយោជន៍ជាថ្នូរមិនដោះស្រាយ និងចែកដីសម្បទានសង្គមកិច្ចជូនប្រជាពលរដ្ឋ។
អ្នកសម្របសម្រួលសមាគមការពារសិទ្ធិមនុស្សអាដហុក ប្រចាំខេត្តព្រះវិហារ គឺលោក ឡោ ច័ន្ទ។ លោកបានមានប្រសាសន៍កាលពីរសៀលថ្ងៃច័ន្ទ ទី២២ ខែកក្កដា ថា កាលពីថ្ងៃទី១៨ ខែកក្កដា កន្លងទៅ លោកបានដាក់ពាក្យបណ្ដឹងមួយច្បាប់ស្នើសុំព្រះរាជអាជ្ញាអមសាលាដំបូង ដើម្បីជំរុញឱ្យបើកការស៊ើបអង្កេតករណីអំពើពុករលួយទៅលើអាជ្ញាធរស្រុកជាំក្សាន្ត ជាច្រើនរូប។
លោក ឡោ ច័ន្ទ បានបញ្ជាក់ថា ប្រជាពលរដ្ឋរាប់រយនាក់ខ្លះជាជនពិការខ្លះបែកបាក់គ្រួសារ រងទុក្ខវេទនាជាច្រើនឆ្នាំមកហើយ ដោយសារតែអាជ្ញាធរមិនបានដោះស្រាយទំនាស់ដីធ្លីជាមួយនឹងអង្គការទប់ស្កាត់គ្រឿងញៀន និងជំងឺអេដស៍ ហើយថ្មីៗនេះ លោកបានរកឃើញភស្តុតាងមួយចំនួនថា អាជ្ញាធរស្រុកជាំក្សាន្ត ខ្លះមានជាប់ពាក់ព័ន្ធនឹងការទទួលបានចំណែកដីទំនាស់ទាំងនោះ ទើបមិនមានការផ្ដល់ដីសម្បទានត្រឹមត្រូវមកឱ្យប្រជាពលរដ្ឋ។
លោក ឡោ ច័ន្ទ៖ «ក្បាលដីលេខប៉ុន្មានរបស់លោកអី ខ្ញុំមានទាំងអស់ កំណត់ហេតុខ្ញុំមាន ទើបខ្ញុំហ៊ានថា ហើយម្យ៉ាងវិញទៀត បញ្ហាដោះស្រាយដីធ្លីរហូតដល់ប្រជាពលរដ្ឋ រាប់រយគ្រួសារគាត់ឡើងទៅរាជធានីភ្នំពេញ ៤ដង មិនដោះស្រាយជូនគាត់ឯណា។ រហូតដល់ថ្មីៗ ក្នុងខែកក្កដា នេះ ខ្ញុំទៅម្ដងទៀតនៅពេលដែលក្រុមនិស្សិតគេបិទផ្សាយក្បាលដីធ្លី ស្រាប់តែមានឈ្មោះមន្ត្រីស្រុកមួយចំនួនមានក្បាលដីនៅក្នុងដីហ្នឹងដែរ»។
បណ្ដឹងចោទប្រកាន់អាជ្ញាធរស្រុកជាំក្សាន្ត ពាក់ព័ន្ធនឹងអំពើពុករលួយនោះ ធ្វើឡើងបន្ទាប់ពីអង្គការក្រៅរដ្ឋាភិបាលរកឃើញថា កាលពីអំឡុងឆ្នាំ២០០៧ កន្លងទៅ រដ្ឋាភិបាលបានផ្ដល់ដីសម្បទានសង្គមកិច្ចចំនួនជាង ៥៥០ហិកតារ នៅឃុំកន្ទួត ទៅឱ្យលោក ស ឈុនលឹម ហៅ ប៉ែន លឹម ជាអ្នកគ្រប់គ្រងអង្គការទប់ស្កាត់គ្រឿងញៀន និងជំងឺអេដស៍ យកទៅចែកជូនប្រជាពលរដ្ឋក្រីក្រ ក៏ប៉ុន្តែក្រោយមក បែរពុះដីនោះជាឡូត៍លក់ឱ្យប្រជាពលរដ្ឋ និងឈ្មួញធំៗខ្លះ។ បន្ថែមលើនេះ ដីឡូត៍មួយចំនួនទៀត ត្រូវបានគេលក់ទៅឱ្យម្ចាស់ ៣-៤នាក់ មានប្លង់ជាន់គ្នា ជាហេតុបណ្ដាលឱ្យមានទំនាស់ដោះស្រាយមិនចេញជាច្រើនឆ្នាំមកហើយ។
ទោះយ៉ាងណា អាជ្ញាធរស្រុកជាំក្សាន្ត បានបដិសេធចោលបណ្ដឹងចោទប្រកាន់នោះ ថាជារឿងមិនពិត។ អភិបាលស្រុកជាំក្សាន្ត លោក សុខ ហៃ បានមានប្រសាសន៍ថា លោកក៏ចង់ដឹងដែរថា តើមានមន្ត្រីស្រុកជាំក្សាន្ត ណាខ្លះ ដែលជាប់ពាក់ព័ន្ធនឹងដីធ្លីរបស់អង្គការទប់ស្កាត់គ្រឿងញៀន និងជំងឺអេដស៍នោះ។
លោក សុខ ហៃ បានទាមទារឱ្យសមាគមការពារសិទ្ធិមនុស្សអាដហុក បញ្ជូនឯកសារដែលពាក់ព័ន្ធទាំងនោះទៅឱ្យរូបលោក គឺលោកនឹងធ្វើការអង្កេតតាមផ្លូវច្បាប់ឱ្យបានច្បាស់លាស់៖ «កន្លងមកសមាគមអាដហុកហ្នឹង មិនបានស៊ើបអង្កេតឱ្យច្បាស់ទេ មិនបានសិក្សាអំពីផ្លូវច្បាប់ឱ្យច្បាស់ទេ ចេះតែបំប៉ោងសភាពការណ៍។ ឥឡូវហ្នឹងសុំឱ្យសមាគមអាដហុក បញ្ជូនរបាយការណ៍ មកឱ្យស្រុកមក ពីព្រោះអង្គការអេដស៍ បានវាស់វែងដីជូន ហើយក្រោយពីការបោះឆ្នោតនឹងចេញកម្មសិទ្ធិជូនប្រជាពលរដ្ឋនៅតំបន់នោះអស់ហើយ»។
ចំណែកព្រះរាជអាជ្ញាអមសាលាដំបូងខេត្តព្រះវិហារ លោក លី លន់ បានឱ្យដឹងថា លោកបានទទួលបណ្ដឹងរបស់សមាគមការពារសិទ្ធិមនុស្សអាដហុកនោះហើយ ក៏ប៉ុន្តែបណ្ដឹងនោះពាក់ព័ន្ធនឹងអំពើពុករលួយ គឺលោកបានផ្ទេរសមត្ថកិច្ចទៅអង្គភាពប្រឆាំងអំពើពុករលួយធ្វើការអង្កេតករណីនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។