សេចក្ដីជូនដំណឹងរបស់ក្រសួងពាណិជ្ជកម្ម នៅថ្ងៃទី២០ វិច្ឆិកា បានឲ្យដឹងថា ក្រុមហ៊ុនធ្វើអាជីវកម្ម ប្រេងសាំងនៅកម្ពុជា ចំនួនប្រាំ បានបញ្ចុះថ្លៃលក់របស់ខ្លួន។
ក្នុងចំណោមក្រុមហ៊ុនទាំងនោះ មានតែក្រុមហ៊ុនឈ្មោះ សាវីមិច (Savimex) មួយទេដែលបញ្ចុះតម្លៃទាបជាងគេ គឺដោយក្នុងប្រេងមួយលីត្រនឹងបញ្ចុះពី ៥.០៥០រៀល មកត្រឹម ៤.៤៥០រៀល។ ចំណែកក្រុមហ៊ុនបួនផ្សេងទៀតរួមមាន សូគិម៉ិច (Sokimex) តេលា (TELA) ភីធីធី (PTT) និងប៊ីវីអិម (BVM) បានបញ្ចុះតម្លៃពី ៥.០៥០រៀល មកត្រឹម ៤.៧៥០រៀលក្នុងមួយលីត្រ។
រីឯក្រុមហ៊ុនប្រេងសាំងដទៃទៀត មិនទាន់ឃើញមានការចុះតម្លៃនេះនៅឡើយទេ។
ការបញ្ចុះតម្លៃរបស់ក្រុមហ៊ុនទាំងប្រាំនេះ ដោយឈរលើមូលដ្ឋានតម្លៃប្រេងសាំងនៅលើទីផ្សារអន្តរជាតិធ្លាក់ថ្លៃ និងមានការស្នើសុំរបស់អនុប្រធានគណៈកម្មការទី៩នៃរដ្ឋសភា ដែលសុំឲ្យរដ្ឋាភិបាល ពិចារណាលើការបញ្ចុះតម្លៃប្រេងសាំងនេះ កាលពីថ្ងៃទី១៧ វិច្ឆិកា។ បច្ចុប្បន្ន តម្លៃប្រេងសាំងអន្តរជាតិក្នុងមួយបារ៉ែលដែលសមាមាត្រនឹង ១៦០លីត្រ មានតម្លៃតិចជាង ១០០ដុល្លារអាមេរិក ឬក្នុងប្រេងសាំងមួយលីត្រ មានតម្លៃតិចជាង ២.៥០០រៀលនៅលើទីផ្សារអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។