ជនចាស់ជរានៅស្រុកឯកភ្នំស្នើអាជ្ញាធរសង់ប្រព័ន្ធប្រឡាយទឹកដើម្បីកាត់បន្ថយចំណាកស្រុក
2016.06.27
ជនចាស់ជរាមួយចំនួននៅស្រុកឯកភ្នំ ខេត្តបាត់ដំបង កំពុងជួបការលំបាក និងខ្វះភាពកក់ក្ដៅ ដោយសារមនុស្សដែលពេញកម្លាំងការងារក្នុងបន្ទុកគ្រួសាររបស់ពួកគាត់ ធ្វើចំណាកស្រុកទៅប្រទេសថៃ។ អ្នកភូមិអះអាងថា កត្តាចម្បងដែលជំរុញឲ្យពលរដ្ឋធ្វើចំណាកស្រុក គឺបណ្ដាលមកពីគ្មានប្រព័ន្ធប្រឡាយទឹកសម្រាប់ស្រោចស្រពផលដំណាំនៅក្នុងមូលដ្ឋាន។
ជនចាស់ជរានៅស្រុកឯកភ្នំ លើកឡើងថា ប្រសិនបើអាជ្ញាធរពាក់ព័ន្ធសង់ប្រឡាយទឹកនៅក្នុងមូលដ្ឋានរស់នៅ នោះកូនចៅរបស់ពួកគាត់ នឹងមិនធ្វើចំណាកស្រុកឡើយ។ ពលរដ្ឋថ្លែងបែបនេះនៅក្នុងទិវាដាំដើមឈើផ្សារភ្ជាប់នឹងការរើសអើងមនុស្សចាស់ ដែលរៀបចំឡើងដោយអង្គការមនុស្សចាស់កម្ពុជា (Help Age Cambodia) ហើយមានប្រជាពលរដ្ឋ និងមន្ត្រីពាក់ព័ន្ធប្រមាណ ៧០នាក់ចូលរួមនៅវត្តព្រែកត្រប់ ឃុំព្រែកនរិន្ទ ស្រុកឯកភ្នំ ខេត្តបាត់ដំបង កាលពីថ្ងៃទី២៤ ខែមិថុនា ឆ្នាំ២០១៦។
តំណាងជនចាស់ជរានៅភូមិព្រែកត្រប់ លោក ទូច ឈុនឡៃ ថ្លែងនៅក្នុងពិធីនោះថា ពួកគាត់រស់នៅពឹងផ្អែកទៅលើការដាំដុះផលដំណាំ មានជាអាទិ៍ ដំណាំស្រូវ ពោត ឪឡឹក ត្រសក់ និងសណ្ដែកបាយ ជាដើម ដើម្បីដោះស្រាយជីវភាពរស់នៅប្រចាំថ្ងៃ។ លោកបញ្ជាក់ថា កន្លងមក ផលដំណាំរបស់ពួកគាត់ធ្វើមួយឆ្នាំម្ដង ហើយពឹងផ្អែកទៅលើអំណោយផលពីធម្មជាតិ គឺអាស្រ័យទឹកពីដងស្ទឹងសង្កែ និងតាមដងអូរមួយចំនួនក្នុងតំបន់រស់នៅ សម្រាប់ស្រោចស្រពផលដំណាំរៀងរាល់ឆ្នាំ។ លោកអះអាងថា រយៈពេលប្រមាណ ៣ឆ្នាំកន្លងមកនេះ អាកាសធាតុបានប្រែប្រួលខ្លាំង ធ្វើឲ្យទឹកស្ទឹងដងអូរដែលធ្លាប់ប្រើប្រាស់រីងហួតហែង និងគ្មានទឹកសម្រាប់ស្រោចស្រពផលដំណាំដូចពេលមុនឡើយ។ បញ្ហាទាំងនេះ ធ្វើឲ្យពលរដ្ឋពេញកម្លាំងធ្វើការជាច្រើននាក់នៅក្នុងបន្ទុកគ្រួសាររបស់ពួកគាត់ បង្ខំចិត្តធ្វើចំណាកស្រុកទៅស្វែងរកការងារធ្វើនៅក្រៅប្រទេស ជាពិសេសគឺប្រទេសថៃ ដើម្បីយកប្រាក់ដោះស្រាយជីវភាពគ្រួសារ៖ «ដោយសារតែតំបន់នេះខ្វះទឹក បានជាយើងត្រូវប្រឡាយទឹក។ ដូចលោកបានឃើញស្រាប់ហើយ រាល់ឆ្នាំដល់ខែមិថុនា ស្រូវដុះប្រហែលមួយចង្អាមអស់ហើយ ប៉ុន្តែឆ្នាំនេះយើងមិនទាន់បានភ្ជួរដីព្រោះស្រូវនៅឡើយទេ»។
ស្រដៀងគ្នានេះដែរ ជនចាស់ជរានៅភូមិអន្សងសក ឃុំព្រែកនរិន្ទ ម្នាក់ទៀត អ្នកស្រី ច្រែង រ៉េត ថ្លែងថា ដោយសារតែការធ្វើចំណាកស្រុកនេះ ធ្វើឲ្យគ្រួសាររបស់អ្នកស្រីបាត់បង់ភាពកក់ក្ដៅ កូនរស់នៅបែកពីឪពុកម្ដាយ និងជួបការលំបាកនៅមើលថែទាំចៅៗនៅផ្ទះ។ អ្នកស្រីបន្ថែមថា ទុក្ខលំបាករបស់ពួកគាត់មួយទៀត គឺបញ្ហាខ្វះមណ្ឌលសុខភាពសម្រាប់ព្យាបាលអ្នកជំងឺ ពីព្រោះតំបន់ពួកគាត់រស់នៅឆ្ងាយពីមណ្ឌលសុខភាពជាង ១៥គីឡូម៉ែត្រ ហើយខែវស្សាផ្លូវពិបាកធ្វើដំណើរ៖ «ម្ល៉ោះហើយសូមឲ្យអាជ្ញាធរពាក់ព័ន្ធ បញ្ជូនអ្នកមានជំនាញសុខភាពជួយមកពិនិត្យសុខភាពពួកយើងខ្ញុំឲ្យបានញឹកញាប់ផង»។
ឆ្លើយតបនឹងបញ្ហានេះ អភិបាលស្រុកឯកភ្នំ លោក ឡុង សុភឿន មានប្រសាសន៍ទទួលស្គាល់ថា ប្រជាពលរដ្ឋនៅភូមិព្រែកត្រប់ និងភូមិមួយចំនួនទៀតនៅតំបន់នោះ ពិតជាធ្វើចំណាកស្រុក ដោយសារខ្វះទឹកស្រោចស្រពផលដំណាំប្រាកដមែន។ ប៉ុន្តែលោកអះអាងថា អាជ្ញាធរស្រុកបានសហការជាមួយអាជ្ញាធរក្នុងមូលដ្ឋាន ត្រៀមចុះជីកអណ្ដូងទឹកចែកជូនប្រជាពលរដ្ឋនៅចុងឆ្នាំ២០១៦៖ «យើងកំពុងតែធ្វើសំណើទៅថ្នាក់ជាតិ ដើម្បីសិក្សាធ្វើប្រព័ន្ធប្រឡាយមេ និងស្រះទឹកនៅក្នុងមូលដ្ឋានជូនពួកគាត់ ពីព្រោះពួកគាត់ភាគច្រើនពឹងផ្អែកទៅលើរបរធ្វើកសិកម្ម»។
របាយការណ៍អាជ្ញាធរស្រុកឯកភ្នំ បង្ហាញថា ប្រជាពលរដ្ឋនៅក្នុងស្រុកនេះទៅស្វែងរកការងារធ្វើនៅក្រៅប្រទេសក្នុងឆ្នាំ២០១៦ ៥.២៧០នាក់ នៅក្នុងនោះ ឃុំព្រែកនរិន្ទ ធ្វើចំណាកស្រុកច្រើនជាងគេ គឺប្រមាណ ១.៦០០នាក់។
ប្រធានអង្គការមនុស្សចាស់កម្ពុជា (Help Age Cambodia) លោក ទុំ វីរ៉ា មានប្រសាសន៍ថា ពលរដ្ឋធ្វើចំណាកស្រុកច្រើន ធ្វើឲ្យមនុស្សចាស់បាត់បង់ភាពកក់ក្ដៅក្នុងគ្រួសារ ពីព្រោះសមាជិកគ្រួសាររស់នៅបែកឆ្ងាយពីគ្នា ហើយខ្វះការមើលថែដល់ជនចាស់ជរានៅពេលពួកគាត់មានបញ្ហាសុខភាពផ្ទាល់ខ្លួន។ លោកអះអាងថា ប្រជាពលរដ្ឋស្ទើរគ្រប់ខេត្ត ជាពិសេសនៅទីជនបទតែម្ដង តែងកើតមានករណីមនុស្សចាស់នៅមើលចៅៗនៅផ្ទះ។ ចំណែកមនុស្សពេញកម្លាំងចេញទៅធ្វើការងារនៅក្រៅប្រទេស។ លោកពន្យល់ថា ដើម្បីជួយសម្រួលឲ្យមនុស្សចាស់នៅស្រុកឯកភ្នំ បានរស់នៅជួបជុំក្នុងគ្រួសារ អាជ្ញាធរពាក់ព័ន្ធត្រូវអភិវឌ្ឍប្រព័ន្ធប្រឡាយទឹកតាមការស្នើសុំពួកគាត់ឲ្យបានឆាប់រហ័ស៖ «បញ្ហាទាក់ទងមនុស្សមិនខុសគ្នាជាមួយក្រុមដែលងាយរងគ្រោះផ្សេងៗទៀតទេ ប៉ុន្តែកត្តាប្រឈមនៅក្នុងវ័យរបស់គាត់ គឺរាងកាយ ត្រូវមានការគាំទ្រយកចិត្តទុកដាក់ឲ្យបានច្រើនជាងក្មេងនោះ គឺកូនចៅរបស់គាត់ធ្វើចំណាកស្រុក ហើយផ្ញើគាត់នឹងអ្នកជិតខាងឲ្យមើលនោះ គឺអាជ្ញាធរ និងអ្នកជិតខាងត្រូវមើលពួកគាត់ឲ្យបានល្អ»។
លោក ទុំ វីរ៉ា បន្ថែមថា រដ្ឋាភិបាលកម្ពុជា ខ្វះការយកចិត្តទុកដាក់ជួយដល់ជនចាស់ជរា ហើយជាទូទៅ ច្រើនចាត់ទុកពួកគាត់ថាជាមនុស្សដែលជាបន្ទុកមួយនៅក្នុងសង្គមទៀតផង៖ «បើទោះបីជារដ្ឋចាត់ទុកមនុស្សចាស់ជាធនធានសំខាន់ក៏ដោយ ប៉ុន្តែការអភិវឌ្ឍជាក់ស្ដែង អាជ្ញាធរមិនសូវរំលេចមនុស្សចាស់ដែលជាធនធានដ៏កម្រនោះ ត្រូវបានគេមើលរំលងទៅវិញ»។
របាយការណ៍អង្គការមនុស្សចាស់កម្ពុជា នៅឆ្នាំ២០១៥ បង្ហាញថា ក្នុងខេត្តបាត់ដំបង មានមនុស្សចាស់សរុប ៩៣.៨០០នាក់ ក្នុងចំណោមប្រជាពលរដ្ឋជិត ១លាន ២សែននាក់ (១.១៧៣.០០០នាក់) នៅក្នុងនោះមានសហគមន៍មនុស្សចាស់ចំនួន ៩៥កន្លែង៕