អ្នកទេសចរជនជាតិជប៉ុន វ័យក្មេងម្នាក់ បានស្លាប់ក្នុងហេតុការណ៍ដាច់ក្បាលរថភ្លើង ដែលឯកជនធ្វើសម្រាប់ជិះកម្សាន្តមួយនៅក្នុងតំបន់អង្គរឃ្យុងយូ ខេត្តសៀមរាប កាលពីរាត្រីថ្ងៃសុក្រ ទី២២ ខែមីនា កន្លងទៅ។
ក្នុងហេតុការណ៍នោះ គឺស្ត្រីជនជាតិជប៉ុន ឈ្មោះ តាគីតា សាគី (Takita Saki) អាយុ ២២ឆ្នាំ បានស្លាប់ និងបុរសជាតិខ្មែរម្នាក់ដែលជាមគ្គុទ្ទេសក៍ទេសចរណ៍ ជាអ្នកបកប្រែភាសា បានរងរបួសធ្ងន់។
ប្រភពពីសាក្សីដែលឃើញហេតុការណ៍ បានឱ្យដឹងថា កាលពីវេលាម៉ោងប្រមាណ ៧ និង ៣០នាទីយប់ថ្ងៃសុក្រ ស្ត្រីជនជាតិជប៉ុន និងអ្នកបកប្រែរបស់គាត់ បានឡើងជិះក្នុងរថភ្លើងសម្រាប់កម្សាន្តនោះ។ បន្តិចក្រោយមក នៅពេលដែលរថភ្លើងកំពុងមានល្បឿនលឿន ក៏ស្រាប់តែដាច់កំណាត់ទូររថភ្លើងនៅត្រង់កន្លែងនាងជិះ ធ្លាក់មកដី ហើយបោកផ្ទប់នឹងដីយ៉ាងខ្លាំង។
អគ្គនាយកអាជ្ញាធរអប្សរា លោក ប៊ុន ណារិទ្ធិ បានមានប្រសាសន៍ថា អាជ្ញាធរអប្សរាមិនទទួលខុសត្រូវចំពោះគ្រោះថ្នាក់នោះទេ ដោយសារតែតំបន់ដែលគេរៀបចំផ្សាររាត្រី និងសួនកម្សាន្តនោះ មិនស្ថិតក្រោមការគ្រប់គ្រងរបស់លោកឡើយ៖ «យើងអត់មានទទួលខុសត្រូវជាមួយគាត់នោះទេ វានៅក្រៅសមត្ថកិច្ចរបស់អប្សរាទេ។ អប្សរាគ្រប់គ្រងតែកន្លែងពិព័រណ៍ឃ្យុងយូ អាកន្លែងផ្សាររាត្រី ខេត្តគេសុំទុកឱ្យប្រជាពលរដ្ឋលក់ដូរ ដើម្បីជួបជុំគ្នាកម្សាន្ត។ អីចឹងអ្នកដែលទៅលក់ដូរទៅធ្វើស្អី ខ្ញុំមិនដឹងច្បាស់ថាសុំពីអាជ្ញាធរក្រុង ឬអាជ្ញាធរខេត្តទេ ប៉ុន្តែមានតំណាងក្រុងសៀមរាប គេនៅប្រចាំការនៅទីនោះ»។
ទោះយ៉ាងណា វិទ្យុអាស៊ីសេរី មិនអាចសុំការពន្យល់ពីលោក សត ណាឌី ជាស្នងការនគរបាលខេត្តសៀមរាប និងសមត្ថកិច្ចពាក់ព័ន្ធមួយចំនួនជុំវិញឧបទ្ទវហេតុនោះបានទេ ដោយសារតែមិនទទួលទូរស័ព្ទ។
អ្នកឃើញហេតុការណ៍មួយចំនួនបានរិះគន់ថា អាជ្ញាធរទំនងជាអនុញ្ញាតឱ្យមានការដាក់រថភ្លើងជិះកម្សាន្តនោះ ដោយមិនមានការត្រួតពិនិត្យបច្ចេកទេសត្រឹមត្រូវ ទើបបណ្ដាលឱ្យមានគ្រោះថ្នាក់កើតឡើងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។