តំណាងប្រជាពលរដ្ឋប្រមាណ ១០០នាក់ មកពីពីរឃុំនៅក្នុងខេត្តព្រៃវែង បាននាំគ្នាបើកកិច្ចពិភាក្សាជាមួយមន្ត្រីជលផលខេត្តព្រៃវែង និងក្រុមអាជ្ញាធរក្នុងមូលដ្ឋាន ពីការការពារធនធានជលផល។
ការជួបប្រជុំនេះ កើតឡើងនៅពេលដែលធនធានជលផលកំពុងតែរងការបំផ្លាញពីក្រុមអ្នកនេសាទ ប្រើឧបករណ៍នេសាទត្រីខុសច្បាប់នៅក្នុងសហគមន៍។
ឧបករណ៍ខុសច្បាប់សម្រាប់ឆក់ត្រីចំនួនជិត ១ពាន់គ្រឿង ត្រូវអាជ្ញាធរក្នុងស្រុកមេសាង ខេត្តព្រៃវែង ចាប់បានពីជនល្មើសយកទៅបំផ្លាញចោលនៅក្នុងរដូវនេសាទកន្លងទៅនេះ។ នេះជាការបញ្ជាក់របស់ លោក សេង សំអៀន នាយរងខណ្ឌរដ្ឋបាលជលផលខេត្តព្រៃវែង ដែលថ្លែងក្នុងពេលពិភាក្សាជាមួយពលរដ្ឋ និងអាជ្ញាធរឃុំស្វាយជ្រុំ ក្នុងស្រុកមេសាង និងឃុំពានរោង ក្នុងស្រុកស្វាយអន្ទរ។
លោកបញ្ជាក់ទៀតថា អាជ្ញាធរជលផល និងអាជ្ញាធរដែនដី បានចាត់វិធានការតាមផ្លូវច្បាប់ និងអប់រំណែនាំចំពោះប្រជាពលរដ្ឋដែលប្រកបរបរនេសាទ ហើយកន្លេងមក អាជ្ញាធរបានចាប់ឧបករណ៍នេសាទល្មើសច្បាប់មានស្បៃមុង និងឧបករណ៍កែច្នៃអាគុយសម្រាប់ឆក់ត្រី ជាដើម៖ «ខាងខ្ញុំតែងតែមានវិធានការបង្ក្រាបបទល្មើសជាប្រចាំ ប៉ុន្តែដោយសារតែបឹងនេះវាស្ថិតនៅឆ្ងាយពីដែនទឹក ទីនេះគេហៅថា ទឹកអចិន្ត្រៃយ៍ដែលជាបឹងមួយអចិន្ត្រៃយ៍ ប៉ុន្តែវានៅឆ្ងាយពីដែននេសាទ។ ក៏ប៉ុន្តែទោះបីជាយ៉ាងណាក៏ដោយ ខាងខ្ញុំនៅតែមានវិធានការ ជាពិសេសមានមន្ត្រីម្នាក់ដែលប្រចាំការនៅស្រុកហ្នឹង ហើយកន្លងមក ក៏ធ្លាប់បានសហការគ្នាដែរ គឺបានប្រមូលអាគុយឆក់ត្រី។ បាទ! ហៅនៅឆ្នាំនេះ គឺនឹងនៅបន្តធ្វើបន្តទៅទៀត នឹងធ្វើយ៉ាងណាឲ្យអស់ការឆក់ត្រីនៅខេត្តព្រៃវែង នេះ។ គឺឲ្យឃុំហ្នឹងស្រង់ឈ្មោះ (អ្នកនេសាទល្មើសច្បាប់) ឲ្យខ្ញុំរួចហើយ ខ្ញុំដាក់ឈ្មោះហ្នឹងទៅតុលាការ ដើម្បីឲ្យតុលាការមានវិធានការ»។
ប្រជាពលរដ្ឋដែលរស់នៅក្បែរតំបន់ព្រែកឈើទាលបឹងខ្ចី បានឲ្យដឹងថា កន្លងមកជនឆ្លៀតឱកាស បានប្រើប្រាស់ឧបករណ៍ខុសច្បាប់លួចទៅឆក់ត្រីនៅពេលយប់ ក្នុងពេលដែលសមត្ថកិច្ចចូលសម្រាក។ ពលរដ្ឋបានបន្តថា សកម្មភាពទាំងនេះ គឺបានធ្វើឲ្យផលត្រីក្នុងបឹងថយចុះពីមួយឆ្នាំទៅមួយឆ្នាំ។
កញ្ញា ភី ផល្លា ជាយុវជនស្ម័គ្រចិត្តរបស់សមាគមយុវជនខ្មែរ ប្រចាំស្រុកមេសាង បានរៀបចំកម្មវិធីការពារធនធានជលផល ដោយបានលែងកូនត្រីផងនោះ បានបញ្ជាក់ថា បច្ចុប្បន្ននេះ គឺពលរដ្ឋដែលរស់នៅក្បែរបឹង ស្ទើរតែមិនអាចរកត្រីដើម្បីចិញ្ចឹមគ្រួសារបានឡើយ៖ «ធ្លាប់តែពីមុនមកនេះ គឺសម្បូរត្រីណាស់ ធ្លាប់តែអ្នកស្រុកអ្នកភូមិអ៊ីចឹង គាត់គ្រាន់តែដាក់មងតែបន្តិច បានត្រីស្លហូប ប៉ុន្តែឥឡូវហ្នឹង ទៅដាក់មងអីហ្នឹងរកតែត្រីបង់ឆ្នាំងស្លមិនបានផង។ ចា៎! ហើយដោយឃើញថា ទឹកព្រែកហ្នឹងវារងផលប៉ះពាល់ ដូចជា ការនេសាទត្រីរបស់ប្រជាពលរដ្ឋហ្នឹងវាខុសនឹងច្បាប់អ៊ីចឹង ប្រើដែកឆក់ (អាគុយ) ដល់ពេលជួបជាមួយពួកគាត់អ៊ីចឹង គាត់ថា បើគាត់មិនឆក់មិនដឹងបានអីផ្គត់ផ្គង់ជីវភាពក្រុមគ្រួសាររបស់គាត់ អ៊ីចឹងជាផលវិបាកមួយដែរ»។
ទោះយ៉ាងណា មេឃុំស្វាយជ្រុំ លោក ឡាយ សារ៉េត បានបញ្ជាក់ថា អាជ្ញាធរឃុំរបស់លោកបានចាប់ និងដកហូតឧបករណ៍ឆក់ត្រីចំនួន ៥០០គ្រឿងយកទៅបំផ្លាញចោលក្នុងឆ្នាំកន្លងទៅ ដើម្បីទប់ស្កាត់បទល្មើសនេសាទដែលបានកើតឡើង៖ «ពីព្រោះថា មុខរបរនេះបើមិនឈប់ទេ! ជនដែលប្រព្រឹត្តបទល្មើសត្រូវតែទទួលទោសទៅតាមផ្លូវច្បាប់។ ជនខ្លះក៏គេមិនប្រព្រឹត្តទៅ ខ្លះទៅក៏នៅប្រព្រឹត្តទៅ។ អ៊ីចឹងដល់យើងបានឃាត់បានហាម ចាប់បានអ៊ីចឹងទៅ គ្រាន់តែបានអប់រំគាត់ហ្នឹងឲ្យគាត់ឈប់ទៅ។ អ៊ីចឹងយើងបានសុំរបស់របរពីគាត់ហ្នឹងយកទៅកម្ទេចចោលនៅសាលាស្រុកអ៊ីចឹងទៅទាំងអស់គ្នា ហើយអញ្ជើញប្រជាពលរដ្ឋហ្នឹងចូលរួមឲ្យឃើញការកម្ទេចរបស់យើង កុំឲ្យគាត់ថាប្រមូលរបស់គាត់ហើយ យកទៅលក់ទៅដូរជួញអីហ្នឹង»។
ព្រែកឈើទាលបឹងខ្ញី នេះ គឺពលរដ្ឋ និងអាជ្ញាធរបានរក្សាអភិរក្សជាបឹងធម្មជាតិសហគមន៍ និងជាជម្រកត្រី សម្រាប់បម្រើផលប្រយោជន៍រួមរបស់ពលរដ្ឋទាំងពីរឃុំដែលនៅជុំវិញនោះ។
លោក សេង សំអៀន នាយរងខណ្ឌរដ្ឋបាលជលផលខេត្តព្រៃវែង បានឲ្យដឹងថា នៅទូទាំងខេត្តព្រៃវែង មានបឹង ស្រះ ឬទំនប់ចំនួន ៧១កន្លែង សម្រាប់សហគមន៍អភិរក្ស និងកន្លែងជម្រកពូជត្រី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។