ប្រជាពលរដ្ឋមានវ័យចាស់ និងកុមារតូចៗ ដែលមានលំនៅឋាននៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ ជិត ១០០នាក់ បានជួបជុំគ្នាលើកបដាតវ៉ានៅពីមុខសាលារាជធានីភ្នំពេញ ព្រឹកថ្ងៃពុធ ទី១៦ ខែកក្កដា ដើម្បីស្នើសុំឲ្យមន្ត្រីសាលារាជធានី ជួយស្ថាបនាផ្លូវលិចទឹកក្នុងមូលដ្ឋានមានប្រវែងជាង ៨០០ម៉ែត្រ។
លោក យ៉ុន យ៉ុម តំណាងពលរដ្ឋជាង ៣៥០គ្រួសារ រស់នៅភូមិព្រែកតាគង់១ ឲ្យដឹងថា គោលបំណងនៃការប្រមូលផ្តុំគ្នានៅពីមុខសាលាក្រុង គឺដើម្បីស្នើឲ្យអាជ្ញាធរក្រុងពិចារណា ស្ថាបនាផ្លូវលំក្នុងភូមិ ដែលលិចទឹកតាំងពីដើមឆ្នាំ២០១៣ មក។ ប៉ុន្តែលោកថា ការប្រមូលផ្តុំគ្នានេះ មន្ត្រីសាលារាជធានីមិនបានចេញមកជួបពលរដ្ឋទេ។
លោក យ៉ុន យ៉ុម៖ «ព្រឹកមិញមិនមានដំណោះស្រាយអ្វីពីសាលាក្រុងទេបាទ ព្រោះអីខាងក្រុមសន្តិសុខប្រាប់យើងថា ឲ្យរង់ចាំៗ គេជាប់ប្រជុំៗអ៊ីចឹង។ ហើយដល់គេប្រជុំចប់នៅម៉ោងជា ១១ព្រឹកទៅហើយ ក៏មានក្រុមមន្ត្រីណាចេញទៅផ្ទះជាបណ្ដើរៗ ហើយពួកយើងបានធ្វើសកម្មភាពស្រែកទាមទារស្នើសុំពីខាងសាលាក្រុងដែរ ក៏មិនមានមន្ត្រីរូបណាចេញមកជួប ឬក៏ថាយ៉ាងណាៗនោះ គឺអត់មានទេ»។
ទោះជាបែបណា តំណាងប្រជាពលរដ្ឋ លោក យ៉ុន យ៉ុម ឲ្យដឹងថា ពលរដ្ឋសហគមន៍ភូមិព្រែកតាគង់១ មានគម្រោងហែយករូបថតផ្លូវលិចទឹក ធ្វើជាប្រអប់កាដូមួយឈុត យកទៅផ្តល់ជូនដល់ផ្ទះ លោក ប៉ា សុជាតិវង្ស នៅថ្ងៃអាទិត្យ ទី២០ ខែកក្កដា ខាងមុខនេះ។ ពលរដ្ឋឲ្យដឹងថា ដើមហេតុនាំឲ្យផ្លូវលំ១ខ្សែក្នុងភូមិព្រែកតាគង់១ លិចទឹកធ្ងន់ធ្ងរ គឺបណ្ដាលមកពីក្រុមហ៊ុនបុរី ប៉េង ហ៊ួត បូមខ្សាច់ ដើម្បីអភិវឌ្ឍសំណង់ផ្ទះល្បែងនៅតំបន់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។