ប្រជាពលរដ្ឋខេត្តព្រះសីហនុ រិះគន់អាជ្ញាធរខេត្តនេះថាបានប្រគល់ទីតាំងសួនច្បារមហោស្រពសម្រាប់លំហែកាយ ស្ថិតនៅចំកណ្ដាលទីក្រុងទេសចរណ៍មួយនេះ ឲ្យទៅឈ្មួញឯកជនធ្វើចំណតរថយន្តដឹកអ្នកដំណើរ ឬរថយន្តដឹកទំនិញបម្រើប្រយោជន៍បុគ្គល ហើយនាំឲ្យប៉ះពាល់ដល់សណ្ដាប់ធ្នាប់សាធារណៈ និងអារម្មណ៍ភ្ញៀវទេសចរ។
ឆ្លើយតបការរិះគន់នេះ អភិបាលខេត្តព្រះសីហនុ លោក យន្ត មីន បានបញ្ជាក់ថា ទីតាំងចតរថយន្តនេះ គឺជាចំណតបណ្ដោះអាសន្នទេ ហើយរដ្ឋបាលខេត្តនេះកំពុងស្វែងរកទីតាំងផ្សេងមកជំនួស។
ការរិះគន់របស់ក្រុមអាជីវករ ឬប្រជាពលរដ្ឋមួយចំនួនរស់នៅខេត្តព្រះសីហនុ ធ្វើឡើងនៅគ្រាអភិបាលខេត្តព្រះសីហនុ លោក យន្ត មីន បានអនុញ្ញាតឲ្យឈ្មួញ ឬអ្នកដេញថ្លៃចំណតរថយន្តដឹកអ្នកដំណើរនាមូលដ្ឋាននេះ អាចយកទីតាំងមហោស្រពនៅចំកណ្ដាលក្រុងទេសចរណ៍នៃខេត្តជាប់សមុទ្រមួយនេះ សម្រាប់ធ្វើចំណតរថយន្តដឹកអ្នកដំណើរ ឬរថយន្តដឹកទំនិញ។
ជាងនេះទៀត ប្រជាពលរដ្ឋដែលធ្លាប់យកទីតាំងមហោស្រពសម្រាប់ជួបជុំហាត់ប្រាណ ឬដើរលំហែកាយនៅពេលល្ងាចជាដើម ត្រូវគេជីកកកាយធ្វើបង្គន់អនាម័យនៅលើសួនសាធារណៈ និងចតរថយន្តណែនណាន់តាន់តាប់ នាំឲ្យប៉ះពាល់ដល់សោភណភាពក្រុង និងកកស្ទះរាល់ថ្ងៃ។
ត្រង់ចំណុចនេះ ប្រជាពលរដ្ឋមួយក្រុមមានគ្នាប្រមាណ ២០នាក់ បានសំណូមពរដល់ លោក យន្ត មីន អភិបាលខេត្តព្រះសីហនុ និងអាជ្ញាធរស្ថាប័នពាក់ព័ន្ធខេត្តនេះ ត្រូវរកទីតាំងផ្សេងសម្រាប់ធ្វើចំណតរថយន្តដឹកអ្នកដំណើរ ឬដឹកទំនិញ ជំនួសទីតាំងសួនច្បារមហោស្រពចាស់៖ « សំណូមពរកុំឲ្យអាជ្ញាធរយកទីតាំងសួនច្បារមហោស្រពសម្រាប់ចំណតរថយន្ត និងជីកកកាយសួនច្បារធ្វើបង្គន់ នាំឲ្យបាត់បង់សោភណភាព និងមានក្លិនស្អុយ ប៉ះពាល់ដល់កិត្តិយសក្រុងទេសចរណ៍ និងប៉ះពាល់ដល់អារម្មណ៍ភ្ញៀវទេសចរ ជាដើម »។
ទន្ទឹមគ្នានេះ ក៏មានប្រជាពលរដ្ឋ ឬអ្នកប្រកបរបរអាជីវករខ្លះ បានគាំទ្រឲ្យមានចំណតរថយន្តដឹកអ្នកដំណើរនៅចំកណ្ដាលក្រុងព្រះសីហនុ ឬត្រង់ចំណុចមហោស្រពនេះដែរ ព្រោះងាយឲ្យពួកគេយកប្រាក់ចំណូលប្រចាំគ្រួសារពីសេវាដឹកជញ្ជូន និងលក់ម្ហូបអាហារ ជាដើម។
ប្រធានសមាគមម៉ូតូឌុប និងម៉ូតូរ៉ឺម៉កប្រចាំខេត្តព្រះសីហនុ លោក ឆេង ពៅ ស្ថិតក្នុងចំណោមពលរដ្ឋផ្សេងទៀត បានសាទរការយកទីតាំងមហោស្រពសម្រាប់ចំណតរថយន្តដឹកអ្នកដំណើរ ព្រោះនាំឲ្យពួកគាត់ងាយដឹកភ្ញៀវ បង្កើនចំណូលចិញ្ចឹមគ្រួសារ និងបង្កលក្ខណៈងាយស្រួលដល់អ្នកធ្វើដំណើរ៖ « ងាយស្រួលដល់សេវាដឹកជញ្ជូនរបស់អ្នកប្រកបរបររត់ម៉ូតូ និងរ៉ឺម៉កកង់បី ក្នុងការរកចំណូលចិញ្ចឹមគ្រួសារ។ ហើយម្យ៉ាង ភ្ញៀវទេសចរក៏បានចំណាយអស់ថវិកាតិចទៅលើសេវាដឹកជញ្ជូន ក្រោយពីចុះពីរថយន្តក្រុង ឬរថយន្តដឹកអ្នកដំណើរ ដើម្បីបន្តដំណើរទៅកាន់ទីតាំងផ្សេងៗ »។
ស្នងការរងនគរបាលខេត្តព្រះសីហនុ លោកវរសេនីយ៍ឯក អ៊ី សុខា និងជាប្រធានការិយាល័យកណ្ដាលនគរបាលសណ្ដាប់ធ្នាប់សាធារណៈ ផ្តល់បទសម្ភាសន៍ដល់វិទ្យុអាស៊ីសេរី ថា អាជ្ញាធរស្ថាប័នពាក់ព័ន្ធ កំពុងពិភាក្សារកទីតាំងចំណតរថយន្តដឹកអ្នកដំណើរ ឬរថយន្តដឹកទំនិញ ជាដើម នៅទីតាំងផ្សេង ដើម្បីបញ្ចៀសរាល់បាតុភាពនានា៖ « ខ្ញុំកំពុងរកវិធីជូនយោបល់ទៅលោកអភិបាលខេត្ត និងលោកឧត្តមសេនីយ៍ស្នងការនគរបាលខេត្តព្រះសីហនុ អំពីតាំងចំណតរថយន្តដឹកអ្នកដំណើរ និងរថយន្តដឹកទំនិញ ថាតើគួរទុកយកទីតាំងសួនច្បារមហោស្រពសម្រាប់ធ្វើចំណត ឬត្រូវរកទីតាំងផ្សេងមកជំនួសទីតាំងនេះ »។
ឆ្លើយតបកង្វល់ពលរដ្ឋ អភិបាលខេត្តព្រះសីហនុ លោក យន្ត មីន មានប្រសាសន៍ខ្លីថា ទីតាំងមហោស្រពនោះ គឺជាទីតាំងបេនឡាន ឬចំណតរថយន្តតាំងពីអតីតកាល ប៉ុន្តែយ៉ាងណាក៏ដោយចុះ ចំណតរថយន្តដឹកអ្នកដំណើរដែលរដ្ឋបាលខេត្តអនុញ្ញាតនៅទីធ្លាមហោស្រពនេះ ជាចំណតបណ្ដោះអាសន្នទេ។ លោក យន្ត មីន អះអាងថា រដ្ឋបាលខេត្តព្រះសីហនុ កំពុងរកទីតាំងផ្សេងមកជំនួសទីតាំងចំណតរថយន្តនៅមហោស្រពនេះហើយ ហើយស្នើឲ្យពលរដ្ឋស្ងប់អារម្មណ៍៖ « កន្លែងមហោស្រពនេះ កន្លងមកក៏ជាទីតាំងបេនឡាន ឬចំណតរថយន្តដឹកអ្នកដំណើរចាស់ដែរ ក៏ប៉ុន្តែត្រូវគេអភិវឌ្ឍធ្វើជាផ្ទះល្វែងអស់ទៅ។ ឥឡូវនេះ ខ្ញុំស្នើសុំយកទីតាំងមហោស្រពនេះសម្រាប់ធ្វើចំណតរថយន្តដឹកអ្នកដំណើរ ឬរថយន្តដឹកទំនិញជាបណ្ដោះអាសន្ន ទម្រាំអាជ្ញាធររកទីតាំងថ្មីមកជំនួសទីតាំងនេះបាន »។
មន្ត្រីរាជការចូលនិវត្តន៍ និយាយប្រាប់វិទ្យុអាស៊ីសេរី ថា ទីតាំងមហោស្រពដែលមានទីតាំងនៅចំកណ្ដាលទីក្រុងព្រះសីហនុ កាលពីក្នុងអាណត្តិ លោក ស្បោង សារ៉ាត ដឹកនាំជាអភិបាលខេត្ត គឺត្រូវអតីតអភិបាលខេត្តរូបនេះពុះច្រៀកលក់ឲ្យឯកជនមួយចំហៀង ហើយរហូតមកដល់ពេលនេះ ត្រូវគេសង់ផ្ទះល្វែងរាប់រយល្វែងនៅលើទីតាំងនោះ ដែលនាំឲ្យទីធ្លាមហោស្រពនេះមានផ្ទៃតូចចង្អៀត ឬគ្មានទីតាំងសម្រាប់ចំណតរថយន្ត ជាដើម។
មនុស្សវ័យចាស់ចូលនិវត្តន៍ដែលស្នើមិនបង្ហាញឈ្មោះរូបនេះ ក៏ស្នើដល់លោកនាយករដ្ឋមន្ត្រី ហ៊ុន សែន គួរល្មមដល់ពេលបញ្ចេញកណ្ដាប់ដៃដែក ជួយទប់ស្កាត់សកម្មភាពរបស់ថ្នាក់ដឹកនាំនៅតាមស្ថាប័នមួយចំនួននៃរាជរដ្ឋាភិបាល ឲ្យបញ្ឈប់ទង្វើអាក្រក់ ឃុបឃិតលក់ទ្រព្យសម្បត្តិរដ្ឋ ឬទ្រព្យសម្បត្តិជាតិជាបន្តទៀត ព្រោះអាចជះឥទ្ធិពលស្អុយអសោចដល់ថ្នាក់ដឹកនាំដទៃទៀត ដែលពួកគេមានឆន្ទៈ និងខំបំពេញការងារបម្រើប្រទេសជាតិមានភាពស្អាតស្អំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។