ពលរដ្ឋ​រិះគន់​គុណភាព​ផ្លូវ​ថ្នល់

ដោយ យ៉ង ចាន់តារា
2013-07-13
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ជួលជុល​ផ្លូវ​លេខ​២ ៦១០
១១-កក្កដា-២០១៣៖ សកម្មភាព​ជួសជុល​កំណាត់​ផ្លូវ​ជាតិ​លេខ​២។
RFA/Yang Chandara

យោង​តាម​របាយការណ៍​ក្រសួង​ផែនការ មូលដ្ឋាន​បង្អែក​សម្រាប់​ធ្វើ​ការ​អភិវឌ្ឍ​ប្រកប​ដោយ​ចីរភាព គឺ​ហេដ្ឋារចនាសម្ព័ន្ធ​រូបវន្ត មាន​ដូច​ជា ផ្លូវ​ថ្នល់ និង​ស្ពាន​ជាដើម។ កន្លង​មក ប្រជាជន​មួយ​ចំនួន​បាន​រិះគន់ និង​ត្អូញត្អែរ​ពី​ការ​សាងសង់ និង​គុណភាព​ផ្លូវ។ ទន្ទឹម​នឹង​នេះ ពួក​គេ​ក៏​ចង់​បាន​ផ្លូវ​ថ្នល់​ដែល​មាន​លក្ខណៈ​ល្អ​ប្រសើរ ដើម្បី​បម្រើ​ដល់​សកម្មភាព​ប្រចាំ​ថ្ងៃ​របស់​ពួក​គេ។

តើ​ប្រជាពលរដ្ឋ​រំពឹង និង​មាន​សំណូមពរ​ដូចម្តេច​ចំពោះ​ការ​សាងសង់​ផ្លូវ​ថ្នល់?

ជា​រៀង​រាល់​ឆ្នាំ កម្ពុជា បាន​ទទួល​ជំនួយ​ជា​ច្រើន​លាន​ដុល្លារ​ពី​សហគមន៍​អន្តរជាតិ។ ជំនួយ​ទាំង​នេះ ត្រូវ​បាន​ប្រើ​ប្រាស់​ទៅ​លើ​ការ​អភិវឌ្ឍ​វិស័យ​ផ្សេងៗ ហើយ​ក្នុង​នោះ មាន​មួយ​ចំណែក​ត្រូវ​បាន​ផ្ដោត​សំខាន់​លើ​ការ​ស្ថាបនា និង​ជួសជុល​ផ្លូវ​ថ្នល់។

កាល​ពី​ថ្ងៃ​ទី១០ ខែ​កក្កដា កន្លង​ទៅ​នេះ រដ្ឋាភិបាល​កម្ពុជា និង​សាធារណរដ្ឋ​កូរ៉េ បាន​ចុះ​ហត្ថលេខា​លើ​កិច្ច​ព្រមព្រៀង​ក្របខ័ណ្ឌ​ស្ដីពី​ការ​សន្យា​ផ្តល់​ឥណទាន​សម្រាប់​ឆ្នាំ​២០១៣-២០១៦ ដែល​មាន​ទឹក​ប្រាក់​ចំនួន ២០០​លាន​ដុល្លារ​អាមេរិក។ ទឹក​ប្រាក់​នោះ នឹង​ត្រូវ​បាន​ប្រើប្រាស់​សម្រាប់​អនុវត្ត​គម្រោង​អភិវឌ្ឍន៍​ទំនប់​ពហុ​បំណង​ស្ទឹង​ដូនទ្រី និង​គម្រោង​ធ្វើ​ឱ្យ​ប្រសើរ​ឡើង​នូវ​បណ្ដា​ផ្លូវ​ជាតិ និង​ផ្លូវ​ជន​បទ​មួយ​ចំនួន។

អ្នកស្រី គង់ ភាវីន គ្រូបង្រៀន​នៅ​វិទ្យាល័យ​រលួស ហើយ​ដែល​រស់នៅ​តាម​បណ្តោយ​ផ្លូវ​ជាតិ​លេខ​២ បាន​ឱ្យ​ដឹង​ថា អ្នកស្រី​មាន​អារម្មណ៍​ត្រេកអរ​នៅ​ពេល​ដែល​ដឹង​ថា ផ្លូវ​ជាតិ​លេខ​២ ស្ថិត​ក្នុង​គម្រោង​កែលំអ​ឡើង​វិញ។ អ្នកស្រី​បន្ត​ថា អ្វី​ដែល​អ្នកស្រី និង​អ្នក​ភូមិ​ដទៃ​ទៀត​ចង់​បាន​នោះ គឺ​ផ្លូវ​ថ្នល់​ដែល​ស្អាត រឹងមាំ​បាន​យូរ ដែល​បង្ក​ភាព​ងាយ​ស្រួល​ដល់​ការ​ធ្វើ​ដំណើរ​របស់​ប្រជាជន។

អ្នកស្រី គង់ ភាវីន៖ «រំពឹង​ថា​នឹង​បាន​ងាយ​ស្រួល​ក្នុង​ការ​ធ្វើ​ដំណើរ​អី​ហ្នឹង​ណា! កន្លង​មក​អីចឹង ពេល​ដែល​មាន​ភ្លៀង​មាន​អីចឹង វា​មាន​ទឹក​ដក់​ទឹក​អី​តាម​ផ្លូវ ចៀស​គ្នា​មាន​បញ្ហា​គ្រោះ​ថ្នាក់​អីចឹង​ណា។ ដល់​ពេល​បាន​ផ្លូវ​ល្អ​អីចឹង ដូច​ថា​រំពឹង​ទុក​ថា ការ​ធ្វើ​ដំណើរ​របស់​យើង​ហ្នឹង វា​ស្រួល​អីចឹង​ទៅ​ណា»

ចំណែក​បុរស​ម្នាក់​ទៀត​ឈ្មោះ តូណា ដែល​ផ្លូវ​នៅ​ខាង​មុខ​ផ្ទះ​របស់​គាត់​កំពុង​ត្រូវ​បាន​ជួសជុល​ឡើង​វិញ បាន​ឱ្យ​ដឹង​ដែរ​ថា លោក​រំពឹង​នឹង​បាន​ផ្លូវ​ល្អ​ស្អាត តាម​រយៈ​គម្រោង​ផ្សេងៗ​របស់​រដ្ឋាភិបាល ក្រោម​ជំនួយ​ឧបត្ថម្ភ​ពី​សហគមន៍​អន្តរជាតិ។ លោក​បាន​សំណូមពរ​ដល់​រដ្ឋាភិបាល​ដែល​ជាប់​ឆ្នោត​នៅ​អាណត្តិ​ក្រោយៗ​ទៀត ឱ្យ​បន្ត​ការ​ស្ថាបនា និង​ជួស​ជុល​ផ្លូវ​ទាំង​ឡាយ ប៉ុន្តែ​លោក​ក៏​សូម​ឱ្យ​មាន​ការ​ប្រើប្រាស់​ថវិកា​ជំនួយ​ឱ្យ​សមស្រប និង​ចំ​ទិស​ដៅ​ផង​ដែរ។

លោក តូណា៖ «សប្បាយ​ចិត្ត! ធ្វើ​យ៉ាង​ម៉េច​ក៏​ដោយ​ឱ្យ​តែ​ជាប់​បាន​យូរ កុំ​ឱ្យ​តែ​ធ្វើ​អា​មុខ ខូច​អា​ក្រោយ ធ្វើ​អា​ក្រោយ ខូច​អា​មុខ! ជ្រុល​តែ​ធ្វើ​ឲ្យ​ហុយ ហុយ​ម្តង​ឱ្យ​ចប់​ហ្មង​ទៅ កុំ​ឱ្យ ៤-៥​ឆ្នាំ​ហុយៗ​អីចឹង​ណា! ខ្ញុំ​ចង់​សំណូម​ពរ​ធ្វើ​ម៉េច​កុំ​ឱ្យ​ធ្វើ​ជាប់ ធ្វើ​ផ្លូវ​ធ្វើ​ម៉េច​កុំ​ចាក់​ស្តើង​ស៊ី​ក្រាស់ ចាក់​ក្រាស់​ស៊ី​ស្តើង! អា​ហ្នឹង ខ្ញុំ​ស្តាប់​ព័ត៌មាន ខ្ញុំ​ឮ​គេ​និយាយ​អីចឹង​ដែរ​ហ្នឹង​បាទ»

អនុរដ្ឋលេខាធិការ​ទទួល​បន្ទុក​កិច្ចការ​សាធារណការ នៃ​ក្រសួង​សាធារណការ និង​ដឹក​ជញ្ជូន លោក យិត បូណា បាន​ឱ្យ​ដឹង​ថា ក្រសួង​កំពុង​តែ​រៀប​ចំ​ផែន​ការ​ជា​ជំហាន ដើម្បី​ដោះស្រាយ​បញ្ហា​ស្ថាបនា​ផ្លូវ​ថ្នល់។ ទាក់ទិន​នឹង​ការ​ខូចខាត​វិញ លោក យិត បូណា បាន​លើក​ឡើង​ថា វា​មាន​លក្ខណៈ​បច្ចេកទេស​ដែល​ពិបាក​នឹង​ធ្វើ​ការ​បកស្រាយ ប៉ុន្តែ​បញ្ហា​ចោទ​ដែល​អាច​មើល​ឃើញ​ជា​សាមញ្ញ មាន​ដូច​ជា ធាតុ​អាកាស ទម្ងន់​ផ្ទុក​របស់​យានយន្ត ការ​លុប​ប្រព័ន្ធ​លូ​ជាដើម។

ទាក់ទង​នឹង​ថវិកា និង​ការ​ចំណាយ​ផ្សេងៗ លោក​សុំ​មិន​ធ្វើ​អត្ថាធិប្បាយ​ឡើយ ដោយ​លោក​បញ្ជាក់​ថា ជា​ការ​គ្រប់គ្រង​របស់​អង្គភាព​មួយ​ផ្សេង​ទៀត។ ប៉ុន្តែ លោក​បាន​ឱ្យ​ដឹង​ថា ការ​ចំណាយ​លើ​ការ​អភិវឌ្ឍ​ផ្លូវ​ថ្នល់​មាន​ចំនួន​ច្រើន ដែល​មិន​សូវ​មាន​ការ​វិនិយោគ ហើយ​ជា​ទូទៅ ក្រសួង​ចាត់​ចែង​ទៅ​តាម​ថវិកា​ដែល​មាន។ លោក​បាន​បញ្ជាក់​បន្ថែម​ថា ការ​ចំណាយ​លើ​ការ​សាងសង់​ជា​រឿង​មួយ ហើយ​ក្រោយ​ពី​នោះ គឺ​នឹង​ត្រូវ​ចំណាយ​លើ​ការ​ថែទាំ និង​ជួស​ជុល ហើយ​លោក​ក៏​បាន​អំពាវនាវ​ឱ្យ​អ្នក​ប្រើប្រាស់​ផ្លូវ ចូលរួម​ថែ​រក្សា​ទាំងអស់​គ្នា។

លោក យិត បូណា៖ «សំខាន់​បំផុត អ្នក​ប្រើប្រាស់ ហើយ​អ្នក​ដែល​ប្រជាជន​ដែល​នៅ​ជុំវិញ​ផ្លូវ​ថ្នល់​ហ្នឹង ជួយ​គ្នា​ទាំងអស់ ព្រោះ​អា​ហ្នឹង​វា​ជា​ផល​ប្រ​យោជន៍​របស់​សង្គម​ជាតិ​យើង​ទាំង​មូល មិន​មែន​របស់​រដ្ឋាភិបាល​សុទ្ធ​តែ​ម្នាក់​ឯង​នោះ​ទេ។ រដ្ឋាភិបាល​មាន​កាតព្វកិច្ច​បម្រើ​ប្រជាជន ហើយ​បើ​ប្រជាជន​យើង​អ្នក​ប្រើប្រាស់​មិន​បាន​យក​ចិត្ត​ទុក​ដាក់ និង​ជួយ​ថែទាំ ក៏​ពិបាក​ដែរ»

ទាក់ទិន​នឹង​បញ្ហា​នេះ​ដែរ អ្នក​ស្រាវជ្រាវ​ខាង​ការ​អភិវឌ្ឍ​សង្គម លោក កែម ឡី បាន​ឱ្យ​ដឹង​ថា ការ​ស្ថាបនា​ផ្លូវ​ថ្នល់​នៅ​កម្ពុជា មិន​មាន​តម្លាភាព​ទាំង​ថវិកា ទាំង​ការ​ដេញ​ថ្លៃ និង​ទាំង​ការ​ចូលរួម​វាយ​តម្លៃ​គុណភាព។ លោក​បាន​លើក​ឡើង​ថា បើ​ទោះ​ជា​កម្ពុជា ទទួល​បាន​ជំនួយ​ពី​ប្រទេស​ចិន ឬ​កូរ៉េ ប៉ុន្តែ​ហាក់​ដូច​ជា​មិន​មាន​គណៈកម្មការ​ឱ្យ​ច្បាស់​លាស់ ដើម្បី​ឱ្យ​ក្រុមហ៊ុន​ល្អៗ​អាច​ដេញ​ថ្លៃ​បាន​ឡើយ។

លោក កែម ឡី៖ «បាទ! យើង​មិន​ឃើញ​អ្វី​ដែល​មាន​តម្លាភាព​សោះ ពីព្រោះ​អី ទី​មួយ យើង​យក​ជំនួយ​ចិន យក​ជំនួយ​ពី​កូរ៉េ យក​ជំនួយ​អី​ថ្មីៗ​ហ្នឹង គឺ​ហាក់​បី​ដូច​ជា​មិន​មាន​ដេញ​ថ្លៃ​ឱ្យ​បាន​ច្បាស់​លាស់ មើល​ឃើញ​ហើយ​មិន​មាន​គណៈកម្មការ​ឱ្យ​បាន​ច្បាស់​លាស់ ដើម្បី​ឱ្យ​ក្រុមហ៊ុន​ល្អៗ​ចូល​ដេញ​ថ្លៃ​បាន»

ដើម្បី​អនុវត្ត​ថវិកា​ឱ្យ​មាន​ប្រសិទ្ធភាព​ចំពោះ​ការ​អភិវឌ្ឍ​ផ្លូវ​ថ្នល់ លោក កែម ឡី បាន​មាន​ប្រសាសន៍​បន្ថែម​ថា វា​ជា​ការ​ចាំ​បាច់​ដើម្បី​បង្កើត​ផែន​ការ​រយៈពេល​វែង ដែល​ផែន​ការ​ទាំងអស់​នោះ គឺ​ផ្អែក​ទៅ​លើ​ក្រសួង​ផែន​ការ មិន​មែន​ផ្អែក​ទៅ​លើ​ការ​ចង្អុល​បង្ហាញ​របស់​ថ្នាក់​ដឹក​នាំ​នោះ​ឡើយ។ លើស​ពី​នេះ​ទៅ​ទៀត ក្រសួង​ពាក់ព័ន្ធ ត្រូវ​កំណត់​អាទិភាព​ចំពោះ​ថវិកា​ដែល​នឹង​ត្រូវ​ចំណាយ​ទៅ​លើ​ការ​ស្ថាបនា។

លោក កែម ឡី៖ «យើង​គួរ​តែ​មាន​រៀប​ចំ​ផែន​ការ​រយៈពេល​វែង ២០​ឆ្នាំ ៣០​ឆ្នាំ ហើយ​យើង​បាន​លុយ​មក យើង​ធ្វើ​អា​ណា​មុន យើង​គួរ​កំណត់​អាទិភាព ហើយ​ផែន​ការ​ទាំងអស់​ហ្នឹង គួរ​តែ​ផ្អែក​លើ​ផែន​ការ​របស់​ក្រសួង​ផែន​ការ មិន​មែន​ផ្អែក​ទៅ​លើ​ការ​ចង្អុល​បង្ហាញ​ថ្នាក់​ដឹក​នាំ ចង់​ធ្វើ​កន្លែង​នេះ​បាន បាន​នេះ ចង់​អ្នក​ណា​ស្នើ​បាន​អីចឹង​ទេ។ អា​ហ្នឹង គឺ​បំណង​ប្រាថ្នា​អ្នក​នយោបាយ ដើម្បី​ស្វែង​រក​ប្រជាប្រិយភាព​ហើយ។ គេ​មិន​ដែល​ផ្តល់​សាលា​រៀន ផ្តល់​មន្ទីរពេទ្យ ផ្អែក​ទៅ​លើ​សំបុត្រ​មួយ​ដែល​សរសេរ​ដោយ​លោក​អាចារ្យ ឬ​ប្រជាពលរដ្ឋ​ទេ​អីចឹង​ទេ។ គេ​ផ្អែក​ទៅ​លើ​ផែន​ការ​អភិវឌ្ឍន៍​រយៈពេល​វែង ដែល​មាន​កំណត់​អាទិភាព​ត្រឹមត្រូវ​បាទ»

ការ​បន្ត​ស្ដារ និង​កសាង​ហេដ្ឋារចនាសម្ព័ន្ធ​រូបវន្ត មាន​ដូច​ជា ផ្លូវ​ថ្នល់​ជា​ដើម គឺ​ជា​ផ្នែក​មួយ​នៃ​យុទ្ធសាស្ត្រ​ចតុកោណ​របស់​រាជ​រដ្ឋាភិបាល​កម្ពុជា។ ផែន​ការ​យុទ្ធសាស្ត្រ​អភិវឌ្ឍន៍​ជាតិ​របស់​ក្រសួង​ផែន​ការ​ឆ្នាំ​២០០៦-២០១០ បាន​បង្ហាញ​ថា ការ​ស្ដារ​ផ្លូវ​គ្រប់​ប្រភេទ គឺ​ដើម្បី​ធ្វើ​ឱ្យ​ប្រសើរ​ឡើង​នូវ​ផ្លូវ​ថ្នល់ ដែល​ជា​ផ្នែក​មួយ​នៃ​បណ្ដាញ​ផ្លូវ​ថ្នល់​អាស៊ាន។

អាទិភាព​សម្រាប់​ដំណាក់​កាល​នៃ​ផែន​ការ​យុទ្ធសាស្ត្រ​អភិវឌ្ឍន៍​ជាតិ គឺ​ការ​បញ្ចប់​ការ​រៀប​ចំ និង​អនុម័ត​ច្បាប់​ប្រើប្រាស់​ផ្លូវ​ថ្នល់ ការ​កំណត់​អាទិភាព​ស្ដារ និង​ជួស​ជុល​ឡើង​វិញ​នូវ​ផ្លូវ​សំខាន់ៗ ការ​ពង្រីក​បណ្ដាញ​ផ្លូវ​ជន​បទ ការ​ដោះស្រាយ​បញ្ហា​ជូន​ប្រជាជន​ដែល​ត្រូវ​រុះរើ​ទីលំនៅ​ដោយសារ​ការ​សង់​ផ្លូវ ការ​ធានា​ឱ្យ​មាន​ការ​ថែទាំ​ផ្លូវ​គ្រប់​ប្រភេទ ការ​ប្រើប្រាស់​ឱ្យ​អស់​លទ្ធភាព​នូវ​វិធាន​ការ​ដែល​ប្រើប្រាស់​កម្លាំង​ពលកម្ម​ច្រើន ពិសេស​ការ​សង់ និង​ថែទាំ​ផ្លូវ និង​ការ​ធ្វើ​ឱ្យ​មាន​ការ​ចូលរួម​ពី​វិស័យ​ឯកជន​ក្នុង​ការ​ថែទាំ​ផ្លូវ និង​ស្ពាន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (4)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

នៅតាមក្រុមហ៊ុនឯកជនប្រសិនបើធ្វើការអ្វីមិនមានផលល្អ(គុណភាពអន់) នោះគេនឹងដាក់ទណ្ឌកម្ម ឬបញ្ឈប់ការងារ។ ដោយឡែកខាងស្ថាប័នរដ្ឋាភិបាល បើអ្វីមិនមានគុណភាពតួយ៉ាងដូចជាផ្លូលថ្នល់ នោះគេនឹងលើកសរសើរថាជាមនុស្សឆ្លាតព្រោះចេះពុករលួយ។ សូមជ្រាបជាពត៌មានបាទ!!!!

Jul 14, 2013 05:21 AM

អ្នក​អាន​អនាមិក

ថវិកាធ្វើផ្លូវ កំពប់ពាក់កណ្តាលផ្លូវ តើអោយផ្លូវមានគុណភាពយ៉ាងម៉េច?

Jul 14, 2013 04:38 AM

អ្នក​អាន​អនាមិក

ពី Washington, USA

Folks-Khmers need CHANGES Every Four Years For Better Future- Change From CPP to CNRP.

Jul 13, 2013 07:27 AM

អ្នក​អាន​អនាមិក

ពី phnom penh

ដូច ផ្លូវ(មនីរេត&វេងឫផ្លូវចុះអព្វ័ )ធ្វើរហូត.បណ្ដាលមកពីបញ្ហាពុករលួយ

Jul 13, 2013 06:44 AM