ប្រជានេសាទចោទប្រកាន់មន្ត្រីជលផលខណ្ឌឫស្សីកែវ ថាបានបង្កការលំបាកដល់ដំណើរការដាក់ពាក្យសុំដេញថ្លៃឡូត៍នេសាទសម្រាប់ឆ្នាំ២០១៣ នេះ ជាចេតនាមិនចង់ឲ្យមានការដេញថ្លៃដោយតម្លាភាព។
ក្រុមប្រជានេសាទដែលប្រតិកម្មក្នុងរឿងនេះបានពន្យល់ថា បើពុំមានការដេញថ្លៃទេ ឬការដេញថ្លៃនោះមិនមានតម្លាភាព ធ្វើឲ្យម្ចាស់ឡូត៍ចាស់មានលទ្ធភាពគ្រប់គ្រងផ្ដាច់មុខបន្តទៀត ដោយពុំមានការប្រកួតប្រជែង ហើយបញ្ហានេះអាចធ្វើឲ្យបាត់ចំណូលក្នុងថវិកាជាតិ ឯចំណែកមន្ត្រីខិលខូចអាចទទួលលាភសការៈច្រើនពីការឃុបឃិតគ្នាក្នុងរឿងនេះ។
អ្នកចូលរួមដេញថ្លៃម្នាក់សុំមិនបញ្ចេញឈ្មោះបានឲ្យដឹងថា ការលំបាកទាំងនោះមានដូចជា ការលក់ពាក្យស្នើសុំមានតម្លៃខ្ពស់រហូតទៅដល់ ១០០ដុល្លារ ហើយពាក្យស្នើសុំនោះ ពេលយកដាក់មន្ត្រីជលផលថាខុសទៀត។ ក្រៅពីនេះ មន្ត្រីជលផលបានប្ដូរថ្ងៃកំណត់ឈប់ទទួលពាក្យចុះឡើង និងតម្រូវឲ្យរកឯកសារផ្សេងៗទៀតភ្ជាប់មកជាមួយដែលនាំឲ្យមានការលំបាកខុសពីឆ្នាំមុន។ លោកបន្តថា ក្រៅពីបញ្ហាដែលបានលើកឡើងមកនេះ ក៏នៅមានបញ្ហាស្មុគស្មាញជាច្រើនទៀតដែលជាភាពមិនប្រក្រតីក្នុងរឿងដេញថ្លៃឡូត៍នេសាទនៅឆ្នាំនេះ។
តែទោះយ៉ាងណា ប្រធានរដ្ឋបាលជលផលខណ្ឌឫស្សីកែវ លោក ងិន ឌី មានប្រសាសន៍នៅថ្ងៃទី៦ កញ្ញា ដោយបដិសេធថា ពាក្យស្នើសុំដេញថ្លៃនោះពុំមានលក់ដូរទេ។
ទាក់ទងនឹងការផ្លាស់ប្ដូរថ្ងៃកំណត់ទទួលពាក្យ និងថ្ងៃឈប់ទទួលនោះ លោកទទួលស្គាល់ថា មានការកំណត់ខុសបច្ចេកទេសមួយចំនួន ហើយឥឡូវនេះ មន្ត្រីលោកក៏រៀបចំឯកសារមិនទាន់ ដូច្នេះលោកនឹងសុំគណៈកម្មការសុំពន្យារពេលក្នុងការដេញថ្លៃនេះសិន ដើម្បីឲ្យអ្នកចង់ចូលរួមដេញថ្លៃនោះបានដាក់ពាក្យស្នើសុំទាន់ពេលទាំងអស់គ្នា និងមានតម្លាភាព។ ប៉ុន្តែលោកមិនបញ្ជាក់ថា នឹងពន្យារពេលដល់ត្រឹមថ្ងៃណានោះទេ។
ការដេញថ្លៃឡូត៍នេសាទនៅខណ្ឌឫស្សីកែវ ស្ថិតនៅលើដងទន្លេសាបនៅឆ្នាំនេះមានទ្រង់ទ្រាយធំជាងឆ្នាំកន្លងទៅ។ ឆ្នាំ២០១២ មានការដេញថ្ងៃតែ ៤ឡូត៍ទេ តែនៅឆ្នាំនេះមានការដេញថ្លៃដល់ទៅ ១៤ឡូត៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។